មេដឹកនាំសហជីព៖ រដ្ឋាភិបាលគួរឆ្លើយតបជាវិជ្ជមានចំពោះសំណើរបស់ក្រុមហ៊ុនបញ្ជាទិញធំៗ ដើម្បីរក្សា EBA
ក្រុមហ៊ុនអ្នកបញ្ជាទិញដែលមានម៉ាកល្បីៗនៅលើពិភពលោក ដែលរួមមាន Adidas, Levis Strauss និង Under Armor ជាដើម បានផ្ញើលិខិតចំហថ្មីមួយទៀត ទៅកាន់ប្រមុខរដ្ឋាភិបាលកម្ពុជាលោក ហ៊ុន សែន ដើម្បីជំរុញឲ្យមានការធ្វើកំណែរទម្រង់ថែមទៀត លើបញ្ហាសិទ្ធិការងារនិងសិទ្ធិមនុស្សនៅកម្ពុជា។ សំណើនេះ បានធ្វើឡើង នៅប៉ុន្មានថ្ងៃមុនពេលដែលគណៈកម្មការអឺរ៉ុបនឹងធ្វើសេចក្តីសម្រេចចិត្ត លើការរក្សាប្រព័ន្ធអនុគ្រោះពន្ធ EBA ដល់កម្ពុជា ឬក៏អត់។ គួរកត់សំគាល់ថា នេះគឺជាលិខិតទី៥ហើយ ដែលក្រុមអ្នកបញ្ជាទិញបានផ្ញើទៅកាន់ប្រមុខរដ្ឋាភិបាលកម្ពុជា។ ប៉ុន្តែមន្ត្រីរដ្ឋាភិបាលចាត់ទុកថា គ្រាន់តែជាសម្លេងរំខានមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
«រដ្ឋាភិបាលកម្ពុជាត្រូវតែចាប់អារម្មណ៍ និងគិតគូរពីបញ្ហានេះ (សំណើរ) ព្រោះនេះគឺជាក្រុមអ្នកបញ្ជារទិញ។ ប្រសិនបើកម្ពុជាយើងគ្មានអ្នកបញ្ជាទិញទេ នោះមានន័យថា ក៏អត់មានអ្នកផលិតដើម្បីនាំចេញទៅបានដែរ»។ នេះគឺជាការលើកឡើងរបស់លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) បន្ទាប់ពីក្រុមហ៊ុនបញ្ជាទិញដែលមានម៉ាកល្បីៗនៅលើពិភពលោក បានផ្ញើលិខិតមួយច្បាប់ទៅកាន់ប្រមុខរដ្ឋាភិបាលកម្ពុជាលោក ហ៊ុន សែន ដើម្បីជំរុញឲ្យមានការធ្វើកំណែទម្រង់បន្ថែមទៀត លើបញ្ហាសិទ្ធិការងារ និងសិទ្ធិមនុស្សនៅកម្ពុជា។ លិខិតរបស់ក្រុមហ៊ុនបញ្ជាទិញ កាលពីថ្ងៃទី ២២ មករា ដែលបានជំរុញឲ្យលោកនាយករដ្ឋមន្ត្រី ហ៊ុន សែន កែប្រែច្បាប់ស្តីពីសហជីព ដែលរឹតត្បិតដល់សេរីភាពសហជីព ធ្វើវិសោធនកម្មច្បាប់ ស្ដីពីសមាគមនិងអង្គការសង្គមស៊ីវិល រួមទាំងទម្លាក់ចោលការចោទប្រកាន់ទាំងអស់មកលើមេដឹកនាំសហជីពនៅកម្ពុជា។
លោក អាត់ ធន់ ដែលជាប្រធានសហភាពការងារកម្ពុជាផងនោះបានលើកឡើងថា សំណើខាងលើនេះ មិនគួរជារឿងលំបាកសម្រាប់រដ្ឋាភិបាលកម្ពុជាដោះស្រាយនោះទេ លើកលែងតែរឿងនយោបាយ ដែលមេដឹកនាំសហជីពដ៏ធំនៅកម្ពុជារូបនេះបានមើលឃើញថា អាចជារឿងលំបាក។ មេដឹកនាំសហជីពរូបនេះ បានកត់សំគាល់ថា សំណើរបស់ក្រុមហ៊ុនបញ្ជាទិញដែលមានម៉ាកល្បីៗគឺជារឿងចាំបាច់ និងបន្ទាន់មួយ ដែលប្រមុខរដ្ឋាភិបាលកម្ពុជា មិនគួរមើលរំលងនោះទេ។ យ៉ាងណាក្តី លោក ហេង សួរ អ្នកនាំពាក្យក្រសួងការងារ មិនបានចាត់ទុកលិខិតនេះ ថាមានទម្រង់ជាលិខិតនោះទេ ទំនងជាសេចក្តីថ្លែងការណ៍ដែលផ្តួចផ្តើមឡើងដោយអង្គការ ឬក្រុមណាមួយប៉ុណ្ណោះ។ បន្ថែមលើនេះ លោកបានចាត់ទុកថា កង្វល់របស់ក្រុមអ្នកបញ្ជាទិញទាំងនេះ អាចហួសសម័យទៅហើយ នោះបើគេពិនិត្យទៅលើវឌ្ឍនភាពរបស់កម្ពុជានាពេលបច្ចុប្បន្ននេះ។ លោកបានអះអាងថា អ្វីដែលមានលើកឡើងនៅក្នុងសេចក្តីថ្លែងការណ៍នេះ គឺរដ្ឋាភិបាលកម្ពុជាបានដោះស្រាយរួចរាល់អស់ទៅហើយ ដោយអនុលោមតាមច្បាប់កម្ពុជា។
គួរជំរាបជូនថា ក្រុមហ៊ុនបញ្ជាទិញដែលមានម៉ាកល្បីៗទាំងនេះ រួមមាន៖ សមាគមអ្នកបញ្ជាទិញសំលៀកបំពាក់ និងស្បែកជើងរបស់អាមេរិក អាល្លឺម៉ង់ និងសមាគមក្រុមហ៊ុនបញ្ជាទិញនៅសហភាពអឺរ៉ុប ក្នុងនោះក៏មានក្រុមហ៊ុនធំៗ ដូចជា Adidas Levis Strauss និង Under Armor ជាដើម។ អ្វីជាការកត់សំគាល់ នេះគឺជាលិខិតទី៥ហើយ ដែលក្រុមហ៊ុនអ្នកបញ្ជាទិញដែលមានម៉ាកល្បីៗនៅលើពិភពលោកបានស្នើមករដ្ឋាភិបាលកម្ពុជា ស្របពេលដែលគណៈកម្មការអឺរ៉ុបគ្រោងនឹងធ្វើសេចក្តីសម្រេចចិត្តមួយនៅថ្ងៃទី ១២ កុម្ភៈ ខាងមុខនេះ ថាតើត្រូវបន្តកិច្ចព្រមព្រៀងអនុគ្រោះពន្ធ EBA ដល់កម្ពុជា ឬអត់ ឬក៏ត្រូវផ្តាច់នៅផ្នែកណាមួយនោះ?
យ៉ាងណាក្តីលោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានថ្លែងថា លោកមិនបានដឹងពីលិខិតដែលផ្ញើទៅកាន់ប្រមុខរដ្ឋាភិបាលកម្ពុជានេះទេ។ ហើយថា ជាគោលការណ៍កម្ពុជាក្នុងនាមជារដ្ឋអធិបតេយ្យមួយ នឹងមិនស្ថិតនៅក្រោមការបង្គាប់បញ្ជាពីក្រុមណាមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ