កម្ពុជាស្នើវៀតណាម ចាត់វិធានការម៉ឹងម៉ាត់លើកម្មាភិបាល ដែលរំខានមេដឹកនាំប្រទេសកម្ពុជា
អ្នកនាំពាក្យក្រសួងការបរទេសកម្ពុជានៅល្ងាចថ្ងៃទី២៧សីហា បានចេញសេចក្តីថ្លែងការណ៍អំពាវនាវឲ្យអាជ្ញាធរមានសមត្ថកិច្ចវៀតណាម ចាត់វិធានការផ្លូវច្បាប់ យ៉ាងម៉ឹងម៉ាត់បំផុតទៅលើកម្មាភិបាល និងក្រុមបុគ្គល ដែលបានប្រព្រឹត្តអំពើប្រមាថមកលើប្រមុខរដ្ឋាភិបាលកម្ពុជា។ គួរជំរាបជូនថា សេចក្តីថ្លែងការណ៍ផ្លូវការរបស់ក្រសួងការបរទេសកម្ពុជា បានធ្វើឡើង បន្ទាប់ពីមានគណនីយហ្វេសបុក (Facebook) មានឈ្មោះជាជនជាតិវៀតណាម បានចូលមកខាំមិនត៍ (Comment) ក្នុងហ្វេសបុករបស់លោកនាយករដ្ឋមន្ត្រី ហ៊ុន សែន ដោយបានស្តីបន្ទោសពីជំហររបស់កម្ពុជាលើបញ្ហាសមុទ្រចិនខាងត្បូង ដែលវៀតណាម គឺជាគូរជម្លោះជាមួយចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅក្នុងសេចក្តីថ្លែងការណ៍របស់អ្នកនាំពាក្យក្រសួងកាបរទេសកម្ពុជា ចុះថ្ងៃទី ២៧ សីហា បានកត់សំគាល់ថា ក្នុងរយៈពេលចុងក្រោយនេះ មានកម្មាភិបាល និងបុគ្គលជាជនជាតិវៀតណាមមួយក្រុមបានចូលក្នុងទំព័រ Facebook ផ្លូវការរបស់លោកនាយករដ្ឋមន្ត្រី ហ៊ុន សែន ហើយបានធ្វើការជេរប្រមាថលើប្រមុខរដ្ឋាភិបាលកម្ពុជា ដោយប្រើពាក្យសំដីធ្ងន់ៗ និងព្រហើនជាទីបំផុត។
បើតាមសេចក្តីថ្លែងការណ៍របស់ក្រសួងការបរទេសកម្ពុជានេះ ការចូលខាំមិនត៍ (Comment) របស់កម្មាភិបាល ឬបុគ្គលជាជនជាតិវៀតណាមនេះ គឺបន្ទាប់ពីប្រមុខរដ្ឋាភិបាលកម្ពុជា លោក ហ៊ុន សែន បានបង្ហាញជំហរដ៏ច្បាស់លាស់របស់កម្ពុជា លើបញ្ហាជម្លោះនៅសមុទ្រចិនខាងត្បូង។ នៅក្នុងសេចក្តីថ្លែងការណ៍ដដែល អ្នកនាំពាក្យក្រសួងការបរទេសកម្ពុជាបានថ្កោលទោសយ៉ាងដាច់អហង្ការ និងបានហៅសកម្មភាពនេះថា គឺជាអំពើអសីលធម៌របស់កម្មាភិបាល ឬក្រុមបុគ្គលជាជនជាតិវៀតណាម ដែលបានធ្វើឲ្យប៉ះពាល់យ៉ាងធ្ងន់ធ្ងរលើកិត្តិយស និងសេចក្តីថ្លៃថ្នូររបស់ប្រមុខដឹកនាំកំពូលនៃប្រទេសជាតិមួយដែលមានឯករាជ្យ និងអធិបតេយ្យភាពពេញលេញ។
គួរជំរាបជូនថា សេចក្តីថ្លែងការណ៍របស់អ្នកនាំពាក្យក្រសួងការបរទេសកម្ពុជាទៅកាន់សមភាគីវៀតណាម បានធ្វើឡើងនៅមួយថ្ងៃប៉ុណ្ណោះ បន្ទាប់ពីប្រមុខរដ្ឋាភិបាលកម្ពុជាលោក ហ៊ុន សែន បានឆ្លើយតបទៅនឹងខាំមិនត៏ (Comment) ឬការបញ្ចេញមតិយោបល់របស់ជនជាតិវៀតណាមម្នាក់ឈ្មោះ Nguyen Van Tai ថា លោកមិនមែនជាអាយ៉ងរបស់វៀតណាមនោះទេ។
សូមបញ្ជាក់ថា ចាប់តាំងពីចុងខែកក្កដាមក មានម្ចាស់គណនីយ Facebook ជាជនជាតិវៀតណាម៣នាក់ហើយ ដែលបានចូលមកសរសេរ ខាំមិនត៏ (Comment) នៅក្នុងទំព័រហ្វេសបុក Facebook ផ្លូវការរបស់មេដឹកនាំកម្ពុជា នឹងបានចោទប្រកាន់លោក ហ៊ុន សែន ថា បានក្បត់នឹងវៀតណាម តាមរយៈការបង្ហាញជំហររបស់កម្ពុជា លើបញ្ហាជម្លោះនៅសមុទ្រចិនខាងត្បូងដែលវៀតណាមគឺជាគូភាគីជម្លោះជាមួយនឹងប្រទេសចិន។
នៅក្នុងសេចក្តីថ្លែងការណ៍របស់អ្នកនាំពាក្យក្រសួងការបរទេសកម្ពុជា ក៏បានអំពាវនាវដល់អាជ្ញាធរមានសមត្ថកិច្ចវៀតណាម ចាត់វិធានការយ៉ាងម៉ឺងម៉ាត់បំផុត ក្នុងការស្រាវជ្រាវ និងកំណត់អត្តសញ្ញាណរបស់កម្មាភិបាល និងក្រុមបុគ្គលជនជាតិវៀតណាម ដែលបានប្រព្រឹត្តអំពើប្រមាថមកលើប្រមុខរដ្ឋាភិបាលកម្ពុជា និងផ្តន្ទាទោសទៅតាមផ្លូវច្បាប់ជាធរមាន ដើម្បីថែរក្សាការពារកិត្តិយស និងសេចក្តីថ្លៃថ្នូររបស់ថ្នាក់ដឹកនាំកម្ពុជា ក៏ដូចជា ទំនាក់ទំនងជាប្រពៃណី និងភាពជាអ្នកជិតខាងល្អរវាងកម្ពុជានិងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ