គណៈអចិន្ត្រៃយ៍ព្រឹទ្ធសភា CPP ច្រានចោលសំណើសុំបញ្ចប់ក្តីដោយការសូមទោស
សមាជិកគណៈកម្មាធិការអចិន្ត្រៃយ៍ព្រឹទ្ធសភាចំនួន១៣រូបបានបើកកិច្ចប្រជុំ នៅថ្ងៃទី៣១ ខែសីហានេះ ដើម្បីពិនិត្យនិងសម្រេច លើកអភ័យឯកសិទ្ធិសមាជិកព្រឹទ្ធសភាគណបក្សសម រង្ស៊ី និងលោកស្រី ថាក់ ឡានី។ នៅក្នុងកិច្ចប្រជុំនេះ សមាជិកគណៈអចិន្ត្រៃយ៍នៃព្រឹទ្ធសភាមិនទាន់សម្រេចនៅឡើយទេ តែបានសម្រេចបញ្ជូនករណីលើកអភ័យឯកសិទ្ធិសភារបស់លោកស្រី ថាក់ ឡានី ទៅប្រជុំសម្រេចនៅថ្ងៃទី ១កញ្ញាស្អែកនេះ និងបានច្រានចោលសំណើសុំបញ្ចប់ក្តីដោយត្រឹមការសូមអភ័យទោស។ សម្រាប់គណបក្សកាន់អំណាចការប្រជុំដកអភ័យឯកសិទ្ធសភារបស់សមាជិកព្រឹទ្ធសភាគណបក្សប្រឆាំងរូបនេះ គឺមិនពិបាកនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
សំណើសុំបញ្ចប់ក្តីក្តាំដោយការសូមអភ័យទោស ត្រូវបានលើកឡើងដោយលោក ទាវ វណ្ណុល សមាជិកព្រឹទ្ធសភាគណបក្ស សម រង្ស៊ី តែម្នាក់គត់ ដែលបានចូលរួមនៅក្នុងកិច្ចប្រជុំគណៈកម្មាធិការអចិន្ត្រៃយ៍នៃព្រឹទ្ធសភានៅព្រឹកថ្ងៃទី ៣១សីហា ឆ្នាំ២០១៦នេះ។ ប៉ុន្តែសំណើនេះ ត្រូវបានច្រានចោលភ្លាមៗ ដោយសមាជិកគណៈកម្មាធិការអចិន្ត្រៃយ៍ព្រឹទ្ធសភាមកពីគណបក្សកាន់អំណាចចំនួន១២រូប ដែលធ្វើឡើងនៅចំពោះមុខលោក សាយ ឈុំ ប្រធានព្រឹទ្ធសភា។
លោក ម៉ម ប៊ុននាង អ្នកនាំពាក្យព្រឹទ្ធសភា បានប្រាប់ក្រុមអ្នកកាសែតកាលពីព្រឹកមិញថា ការច្រានចោលគឺដោយសារតែ៖
ទី១.តុលាការបានរកឃើញនូវពិរុទ្ធភាព ឬភាពដែលមានកំហុសរបស់លោកស្រីថាក់ ឡានី ដែលបានថ្លែងចោទប្រកាន់តាមរយៈខ្សែវីដេអូខ្លីបមួយថា លោកនាយករដ្ឋមន្ត្រី ហ៊ុន សែន គឺជាអ្នកនៅពីក្រោយនៃឃាត់កម្មបាញ់សម្លាប់លោក កែម ឡី អ្នកវិភាគនយោបាយនៅកម្ពុជា ដោយមានការបញ្ជាក់ពីសាក្សីចំនួន៤រូប និងទី២. គឺដោយសារតែកន្លងមក លោកស្រីថាក់ ឡានី ខ្លួនឯងតែម្តង ដែលបានថ្លែងបដិសេធតាមប្រព័ន្ធផ្សព្វផ្សាយថា មិនបាននិយាយដូចការចោទប្រកាន់នោះទេ និងថែមទាំងបានអះអាងថា សំឡេងនៅក្នុងវីដេអូខ្លីបនោះ គឺជាការកាត់ត ឬប្រឌិតឡើងប៉ុណ្ណោះ។ ប៉ុន្តែយ៉ាងណាក៏ដោយ លោក ម៉ម ប៊ុននាង បានចោទជាសំណួរថា តើមានអ្វីគួរត្រូវសូមទោស បើលោកស្រីមិនទទួលស្គាល់កំហុសផង?
សូមបញ្ជាក់ថា យោងតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃទី ១ ខែកញ្ញាស្អែកនេះ ដើម្បីប្រជុំលើកអភ័យឯកសិទ្ធិសភារបស់លោកស្រី ថាក់ ឡានី នៅក្នុងសម័យប្រជុំព្រឹទ្ធសភា លើកទី៩ នីតិកាលទី៣។ ហើយចំពោះដំណើរការដកអភ័យឯកសិទ្ធិសមាជិកព្រឹទ្ធសភារូបនេះវិញ ទំនងជាមិនពិបាកនោះទេ សម្រាប់គណបក្សកាន់អំណាច។ ព្រោះបើយោងតាមមាត្រា១០៤ថ្មី នៃច្បាប់រដ្ឋធម្មនុញ្ញនៃព្រះរាជាណាចក្រកម្ពុជា និងប្រការទី៧ និងទី៨នៃលក្ខន្តិកៈសមាជិកព្រឹទ្ធសភាបានចែងពីការដកអភ័យឯកសិទ្ធិសភាសមាជិកព្រឹទ្ធសភា គឺតម្រូវឲ្យមានសំឡេងបោះឆ្នោតតែ ២ភាគ៣ ប៉ុណ្ណោះ។ ហើយបើផ្អែកតាមចំនួនសមាជិកព្រឹទ្ធសភារបស់គណបក្សប្រជាជនកម្ពុជាបច្ចុប្បន្នចំនួន ៤៦រូប បូករួមនឹងសមាជិកព្រឹទ្ធសភាតំណាងព្រះបរមរាជវាំង ២រូប និងសមាជិកព្រឹទ្ធសភាតំណាងរដ្ឋសភា ២រូប គឺមិនពិបាកនោះទេក្នុងការរកសម្លេង ២ភាគ៣ ទល់នឹងសម្លេងសមាជិកព្រឹទ្ធសភារបស់គណបក្សប្រឆាំងតែ១១រូបនោះ។
សូមបញ្ជាក់ដែរថា ការប្រជុំដកអភ័យឯកសិទ្ធសមាជិកព្រឹទ្ធសភាគណបក្សសម រង្ស៊ី លោកស្រី ថាក់ ឡានី គឺធ្វើឡើងតាមសំណើរបស់អគ្គព្រះរាជអាជ្ញអមតុលាការសាលាឧទ្ធរណ៍កាលពីថ្ងៃទី២៦សីហា និងបន្ទាប់ពីលោកស្រី ថាក់ ឡានី បានបដិសេធចូលខ្លួនតាមដីកាកោះហៅរបស់តុលាការសាលាដំបូងក្រុងភ្នំពេញចំនួន២លើករួចមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ