អង្គការលើកលែងទោសអន្តរជាតិអំពាវនាវឲ្យកម្ពុជាបញ្ចប់យុទ្ធនាការបំភ័យអ្នកនយោបាយប្រឆាំង
នៅក្នុងថ្ងៃតែមួយដែលតុលាការក្រុងភ្នំពេញកាត់ទោសលោក កឹម សុខា ប្រធានស្តីទីគណបក្សសង្គ្រោះជាតិ ឲ្យជាប់ពន្ធនាគារ៥ខែនិងពិន័យជាប្រាក់៨០ម៉ឺនរៀលមក អង្គការលើកលែងទោសអន្តរជាតិ (Amnesty International) បានអំពាវនាវឲ្យកម្ពុជាបញ្ចប់យុទ្ធនាការបំភ័យដល់អ្នកនយោបាយប្រឆាំង។ លោក ផៃ ស៊ីផាន បានចាត់ទុកការអំពាវនាវរបស់អង្គការអន្តរជាតិនេះថា កំពុងដើរតួជាប៉ូលីសអន្តរជាតិ ហើយបំពានលើអធិបតេយ្យភាពរបស់កម្ពុជា។
ចុះផ្សាយនៅថ្ងៃ៖
ស្តាប់ - ០២:០៧
សេចក្តីថ្លែងការណ៍របស់អង្គការលើកលែងទោសអន្តរជាតិ(Amnesty International) ដែលមានមូលដ្ឋាននៅប្រទេសអង់គ្លេស បានធ្លាក់មក បន្ទាប់ពីតុលាការក្រុងភ្នំពេញបានកាត់ទោសលោក កឹម សុខា ដោយកំបាំងមុខឲ្យជាប់ពន្ធនាគាររយៈពេល៥ខែនិងពិនិយជាប្រាក់៨០ម៉ឺនរៀល ពីបទ “បដិសេធក្នុងការចូលខ្លួន” តាមមាត្រា៥៣៨នៃក្រមព្រហ្មទណ្ឌកាលពីថ្ងៃទី៩កញ្ញា ។
លោក Josef Benedict អនុប្រធានអង្គការលើកលែងទោសអន្តរជាតិប្រចាំតំបន់អាស៊ីប៉ាស៊ីហ្វិចបានលើកឡើងថា “កម្ពុជាកំពុងធ្លាក់ក្នុងវិបត្តិ បន្ទាប់ពីរដ្ឋាភិបាលប្រទេសនេះ បានបើកយុទ្ធនាការបំភិតបំភ័យប្រឆាំងនឹងសកម្មជនសិទ្ធិមនុស្ស និងអ្នកនយោបាយបក្សប្រឆាំង ដោយប្រើប្រាស់ប្រព័ន្ធតុលាការ។ លោកបានចាត់ទុកថា ករណីកាត់ទោសលោក កឹម សុខា ប្រធានស្តីទីគណបក្សសង្គ្រោះជាតិ គឺជាឧទាហរណ៍ចុងក្រោយមួយនៃយុទ្ធនាការនេះ។ លោក កឹម សុខា ប្រធានស្តីទីគណបក្សសង្គ្រោះជាតិ ដែលបានថ្លែងការណ៍ជាសាធារណៈលើកដំបូងកាលពីថ្ងៃម្សិលមិញ ក៏បានចាត់ទុកដំណើរការកាត់ទោសលោកកាលពីថ្ងៃ៩កញ្ញាថា គឺដើម្បីបញ្ចប់ជីវិតនយោបាយរបស់លោកផងដែរ។
យ៉ាងណាក៏ដោយនៅចុងក្រោយនៃសេចក្តីថ្លែងការណ៍នេះ អង្គការលើកលែងទោសអន្តរជាតិ (Amnesty International) បានអំពាវនាវឲ្យរដ្ឋាភិបាលកម្ពុជាបញ្ចប់យុទ្ធនាការធ្វើទុក្ខបុកម្នេញលើគណបក្សប្រឆាំងនិងសកម្មជនសិទ្ធិមនុស្ស ហើយងាកមកគោរពសិទ្ធិនយោបាយ និងសិទ្ធិមនុស្សទាំងអស់គ្នា និងធានាឡើងវិញនូវឯករាជ្យភាពរបស់តុលាការ។ ប៉ុន្តែ លោក ផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្ត្រីបានចាត់ទុកការអំពាវនាវរបស់អង្គការអន្តរជាតិមួយនេះថា កំពុងដើរតួជាប៉ូលីសអន្តរជាតិ និងកំពុងបំពានលើអធិបតេយ្យភាពរបស់ប្រទេសមួយ។ លោកផៃ ស៊ីផាន ក៏បានច្រានចោលចំពោះការចោទប្រកាន់ថា រដ្ឋាភិបាលកំពុងបើកយុទ្ធនាការបំភិតបំភ័យ ឬធ្វើទុក្ខបុកម្នេញទៅលើសកម្មជនសិទ្ធិមនុស្សនិងអ្នកនយោបាយប្រឆាំង ដែលលោកហៅថា ជាគណបក្សសំលេងភាគតិចនៅរដ្ឋសភានោះ។
គួរជំរាបជូនថា នៅមុនការកាត់ទោសដោយតុលាការក្រុងភ្នំពេញលើលោក កឹម សុខា កាលពីថ្ងៃទី៩កញ្ញា អង្គការឃ្លាំមើលសិទ្ធិមនុស្ស (Human Rights Watch) ដែលមានមូលដ្ឋាននៅសហរដ្ឋអាមេរិក ក៏បានចេញសេចក្តីថ្លែងការណ៍មួយដោយទទួចឲ្យរដ្ឋាភិបាលទំលាក់ចោលការចោទប្រកាន់លើលោក កឹម សុខា នេះដែរ នឹងបានចាត់ទុកថា ការកាត់ទោសលោក កឹម សុខា នេះ គឺជាផ្នែកមួយនៃអំពើហិង្សាមុនយុទ្ធនាការឃោសនាបោះឆ្នោតនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ