អាជីវករផ្សារដើមគរ ស្នើឲ្យលោក នាយករដ្ឋមន្តី្រអន្តរាគមន៍ចំពោះគម្រោងសាងសង់ផ្សារថ្មី
តំណាងអាជីវករផ្សារដើមគរប្រមាណជា ២០០នាក់ នាព្រឹកថ្ងៃចន្ទនេះ បានស្វែងរកអន្តរាគមន៍នៅមុខផ្ទះលោកនាយករដ្ឋមន្ត្រីជុំវិញគម្រោងសាងសង់ផ្សារដើមគរថ្មី។ ញ្ញត្តិរបស់ក្រុមអាជីវករ បានស្នើឲ្យ លោកនាយករដ្ឋមន្ត្រីនិងភរិយា អន្តររាគមន៍កុំឲ្យមានការរុះរើនិងសាងសង់ផ្សារដើមគរថ្មីរហូតដល់អាណត្តិផ្សារថ្មីឆ្នាំ ២០២១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៥
រហូតមកទល់ថ្ងៃទី ១៧ សីហានេះ ក្រុមអាជីវករផ្សារដើមគរ នៅតែបន្តប្រឆាំងនូវគម្រោងអភិវឌ្ឍន៍ផ្សារដើមគរ ដោយពួកគេ បានយកញ្ញត្តិដាក់ជូន លោក នាយករដ្ឋមន្រ្តី ហ៊ុន សែន ឲ្យស្វែងរកកិច្ចអន្តរាគមន៍កុំឲ្យមានការរុះរើ និង សាងសង់ផ្សារដើមគរ រហូតដល់អាណត្តិផ្សារថ្មីនៅឆ្នាំ ២០២១។
ក្រុមអាជីវករដែលឈរលើកបដាអស់មួយរយៈពេលខ្លី បានរំសាយទៅវិញ នៅវេលាម៉ោង ៩ ព្រឹក បន្ទាប់ពី លោក ប៉ាល់ ច័ន្ទតារា តំណាងខុទ្ទកាល័យលោកនាយករដ្ឋមន្រ្តី បានចេញមកទទួលញត្តិ និងសន្យានាំយកញត្តិទៅប្រគល់ជូន លោក នាយករដ្ឋមន្រ្តី ដើម្បីស្វែងរកដំណោះស្រាយសមស្រប។
សូមរំឮកថា កន្លងមកសាលារាជធានីភ្នំពេញមានគម្រោង គិតគូរកែរលម្អផ្សារដើមគរ ដើម្បីឲ្យមានលក្ខណៈល្អប្រសើរជាងមុន មានភាពទាក់ទាញ និង មានសណ្តាប់ធ្នាប់ជាទូទៅ។ លោក ប៉ា សុជាតិវង្ស បានបញ្ជាក់ប្រាប់វិទ្យុបារាំងរួចមកហើយថា បើសិនជាអាជីវករផ្សារដើមគរយល់ព្រមឲ្យមានការអភិវឌ្ឍន៍ គឺក្រោយការសាងសង់រួច អាជីវករ អាចចូលលក់ក្នុងតូបថ្មី ដោយគ្មានការតម្រូវឲ្យបង់លុយ ទិញ ឬជួលតូបឡើងវិញទេ។
ប៉ុន្តែយ៉ាងណាក៏ដោយ ក្រុមអាជីវករ នៅតែព្រួយបារម្ភជាខ្លាំងថា សាលាក្រុងអាចនឹងកែប្រែផ្សារដែលជារបស់រដ្ឋនេះ ទៅជាផ្សារឯកជនដែលតម្រូវឲ្យអាជីវករជួលតូបនិងបង់ប្រាក់ជាប្រចាំខែបន្ទាប់ពីសាងសង់ជាថ្មីរួច។ កាលពីចុងខែកក្កដាកន្លងទៅនេះ ក្រុមអាជីវករផ្សារដើមគរ ធ្លាប់បានលើកគ្នាទៅតវ៉ាម្តងរួចមកហើយ នៅមុខសាលារាជធានីភ្នំពេញ បន្ទាប់ពីមានការចុះវាស់វែងតូបក្នុងបំណងធ្វើផ្សារថ្មី ដែលមានកម្ពស់ច្រើនជាន់៕
អត្តបទដោយ៖ សរ ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ