អ្នកគំរាមសម្លាប់តាមហ្វេសប៊ុកលើថ្នាក់ដឹកនាំរដ្ឋាភិបាល និងបក្សប្រឆាំង មានវាសនាខុសគ្នា
កាលពីថ្ងៃសុក្រសប្តាហ៍មុន តុលាការក្រុងភ្នំពេញបានកាត់ទោសឲ្យយុវជនម្នាក់ជាប់ពន្ធនាគារ ២ឆ្នាំពីបទគំរាមសម្លាប់លោកនាយករដ្ឋមន្រ្តីហ៊ុន សែន តាមហ្វេសប៊ុក។ ជាការកត់សម្គាល់ អ្នកគំរាមសម្លាប់លើមន្ត្រីរដ្ឋាភិបាលផ្សេងទៀត ក៏មិនសូវជារួចខ្លួនពីគុកច្រវ៉ាក់ដែរ។ តែដោយឡែក សម្រាប់ថ្នាក់ដឹកនាំបក្សប្រឆាំងវិញ អ្នកគំរាមសម្លាប់ដែលបានធ្វើឡើងតាមហ្វេសប៊ុកដូចគ្នាមែន តែវាសនាពួកគេមិនដូចគ្នាទាល់តែសោះ និយាយឲ្យខ្លី គឺមិនត្រូវបានសមត្ថកិច្ចឃាត់ខ្លួនបញ្ជូនទៅកាន់តុលាការឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
លោកវ៉ែន សុភាព អាយុ ២៧ឆ្នាំ ដែលជាពលករខ្មែរធ្វើការនៅប្រទេសថៃ ត្រូវរស់នៅក្នុងពន្ធនាគារ ២ឆ្នាំដោយសារតែប្រើប្រាស់ហ្វេសប៊ុកតាមអារម្មណ៍របស់ខ្លួនគំរាមសម្លាប់លោកហ៊ុន សែន ប្រមុខរដ្ឋាភិបាលកម្ពុជា និងជាប្រធានគណបក្សប្រជាជនកម្ពុជាកាលពីអំឡុងឆ្នាំ ២០១៦កន្លងទៅ។ ការកាត់ទោសរបស់តុលាការនេះ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីយុវជនគង់ រ៉ៃយ៉ា ទើបតែចេញពីពន្ធនាគារ ក្រោយពីបានជាប់ទោសអស់រយៈពេល ១៨ខែទៅតាមទម្ងន់ទោសដែលអំពាវនាវឲ្យមានបដិវត្តពណ៌នៅកម្ពុជា។
កាលពីឆ្នាំ ២០១៥កន្លងទៅ រឿងរ៉ាវគំរាមសម្លាប់នេះ ក៏កើតមានលើលោកស ខេង ដែលជាអនុប្រធានគណបក្សប្រជាជនកម្ពុជា និងជារដ្ឋមន្រ្តីក្រសួងមហាផ្ទៃផងដែរ។ យុវជនម្នាក់ឈ្មោះតៅ សាវឿន បានគំរាមបោកគ្រាប់បែកសម្លាប់លោកស ខេង តាមហ្វេសប៊ុក។ យុវជនរូបនេះ ដូចជាមានសំណាងជាងគេដោយជាប់ពន្ធនាគារតែ ១ខែប៉ុណ្ណោះ ខណៈទម្ងន់ទោសជាប់ពន្ធនាគារកំណត់រហូតដល់ទៅ ១៥ខែ។ នេះ អាចដោយសារតែគាត់បានសរសេរលិខិតសូមទោសទៅកាន់លោកស ខេង។
នៅក្នុងឆ្នាំដូចគ្នានេះ លោកសុខ ទូច ប្រធានក្រុមស្រាវជ្រាវកិច្ចការព្រំដែននៃរាជ្យបណ្ឌិត្យសភាកម្ពុជា ក៏ត្រូវបានយុវជនឈ្មោះផង់ សីហា ដែលជាពលករខ្មែរធ្វើការនៅក្នុងប្រទេសថៃគំរាមសម្លាប់តាមហ្វេសប៊ុក។ ជាលទ្ធផល យុវជនរូបនេះត្រូវជាប់ពន្ធនាគាររយៈពេល ៦ខែ។ ជាការកត់សម្គាល់ បន្ទាប់ពីត្រូវបានឃាត់ខ្លួន យុវជនទាំងនេះសុទ្ធតែបានសារភាពទោសកំហុសដោយលើកឡើងថា ពួកគេធ្វើឡើងដោយខ្វះការពិចារណា និងមិនបានយល់ដឹងអំពីច្បាប់។
ដោយឡែក ក្រៅពីតែថ្នាក់ដឹកនាំ និងមន្រ្តីរដ្ឋាភិបាល ការគំរាមកំហែងសម្លាប់តាមហ្វេសប៊ុកនេះ ក៏បានកើតមានលើថ្នាក់ដឹកនាំគណបក្សប្រឆាំងផងដែរ។ លោកកឹម សុខា ដែលជាប្រធានស្តីទីគណបក្សសង្គ្រោះជាតិបច្ចុប្បន្ន ត្រូវបានកញ្ញាធី សុវណ្ណថា ដែលធ្លាប់ជាអ្នកគាំទ្រងប់ងល់ហើយបែរមកប្រឆាំងដាច់ខាតវិញនោះ បានគំរាមសម្លាប់តាមរយៈរូបភាពកាំភ្លើងនិងសារនៅលើបណ្តាញសង្គមហ្វេសប៊ុក។ គេក៏នៅចាំថា កាលពីពីរបីឆ្នាំមុន បុរសម្នាក់ឈ្មោះផែង វណ្ណៈ ដែលជាមន្ត្រីនៅក្រសួងមហាផ្ទៃ ក៏បានគំរាមកំហែងសម្លាប់លោកកឹម សុខា ក្រោមរូបភាពស្រដៀងគ្នានឹងកញ្ញាធី សុវណ្ណថាដែរ។
តែទោះបីជាយ៉ាងណាក៏ដោយ ទង្វើរបស់ពួកគេនេះមិនត្រូវបានសមត្ថកិច្ចខ្មែរមានវិធានការគួរឲ្យកត់សម្គាល់ណាមួយនោះទេ គឺមិនដូចករណីដែលកើតឡើងលើថ្នាក់ដឹកនាំ និងមន្រ្តីរដ្ឋាភិបាលទាល់តែសោះ។ ចំណែកឯខាងតុលាការវិញ ក៏មិនបានអើពើអ្វីដែរចំពោះទង្វើអស់ទាំងនេះរហូតមកដល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ