ប្រមុខបក្សកាន់អំណាចចេញមុខអំពាវនាវកុំឲ្យមានការរើសអើងពលរដ្ឋមិនទៅបោះឆ្នោត
លោក ហ៊ុន សែន ប្រធានគណបក្សប្រជាជនកម្ពុជា នៅថ្ងៃព្រហស្បតិ៍ទី២សីហានេះ បានចេញមុខជាលើកទី២ ក្រោយការបោះឆ្នោត ក្នុងការជួបកម្មករ កម្មការិនី នៅខណ្ឌមានជ័យ។ នៅចំពោះមុខកម្មកររាប់ពាន់នាក់ ប្រមុខបក្សកាន់អំណាច លោក ហ៊ុន សែន ចេញមុខអំពាវនាវជាលើកដំបូងក្រោយការបោះឆ្នោត កុំឲ្យមានការរើសអើងពលរដ្ឋមិនទៅបោះឆ្នោត នៅតាមមូលដ្ឋានក៏ដូចជានៅតាមបណ្ដារោងចក្រ ជាដើម។ ទន្ទឹមនឹងនេះអ្នកវិភាគរំពឹងថា អាជ្ញាធរនឹងអនុវត្តតាមលោក ហ៊ុន សែន ឲ្យមានប្រសិទ្ធភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
«សុំកុំឲ្យមានការរើសអើងនៅតាមមូលដ្ឋានរវាងអ្នកបានបោះឆ្នោត និងអ្នកពុំបានបោះឆ្នោត»នេះគឺជាការថ្លែងរបស់លោក ហ៊ុន សែន ប្រធានគណបក្សប្រជាជនកម្ពុជា នៅថ្ងៃព្រហស្បតិ៍នេះ។ ថ្លែងនៅក្នុងឋានៈជាអនាគតនាយករដ្ឋមន្ត្រី ដែលគ្រោងនឹងចូលកាន់តំណែងជាផ្លូវការនៅថ្ងៃទី២០ខែកញ្ញាខាងមុខ លោក ហ៊ុន សែន បានគូសបញ្ជាក់ថា ការអំពាវនាវរបស់លោកធ្វើឡើង ដើម្បីបញ្ចៀសរូបភាពរើសអើង ស្អប់ខ្ពើម គុំគួន នៅតាមភូមិឃុំ និងតាមបណ្ដារោងចក្រជាដើម។
ជាការកត់សម្គាល់ការលើកឡើងរបស់លោក ហ៊ុន សែន ប្រធានគណបក្សប្រជាជនកម្ពុជា ធ្វើឡើងក្រោយមួយថ្ងៃបន្ទាប់ពីលោក ស ខេង អនុប្រធានបក្ស និងជារដ្ឋមន្ត្រីក្រសួងមហាផ្ទៃ បានចេញមុខអំពាវនាវស្រដៀងគ្នានេះដែរ។ តាមរយៈសំណេរលើបណ្ដាញសង្គម លោក ស ខេង អំពាវនាវ ដល់ប្រជាពលរដ្ឋ អាជ្ញាធរគ្រប់លំដាប់ថ្នាក់ និងគ្រប់គណបក្សនយោបាយ មេត្តាកុំធ្វើការ ចោទប្រកាន់ ឬលាបពណ៌ គ្នាទៅវិញទៅមក រវាងអ្នកបានទៅបោះឆ្នោត និងអ្នកមិនបានទៅបោះឆ្នោត។ ហើយត្រូវចាត់ទុកថា ជោគជ័យនេះ គឺជាជោគជ័យរបស់ជាតិខ្មែរទាំងមូល។
លោក មាស នី អ្នកសិក្សាការអភិវឌ្ឍសង្គម ស្វាគមន៍ចំពោះការអំពាវនាវនេះ ព្រោះលោកមើលឃើញថា រូបភាពនៃការរើសអើងចំពោះអ្នកបោះឆ្នោត និងមិនទៅបោះឆ្នោតកំពុងតែកើតមានទាំងនៅមូលដ្ឋាន និងតាមបណ្ដាញសង្គម។ ទន្ទឹមនឹងការអំពាវនាវនេះ លោក មាស នី រំពឹងថា អាជ្ញាធរនឹងយកចិត្តទុកដាក់អនុវត្តតាមអនុសាសន៍ថ្នាក់លើឲ្យមានប្រសិទ្ធភាព បើពុំដូចោ្នះទេការអំពាវនាវ និងការអនុវត្តនឹងប៉ះពាល់ដល់ប្រជាប្រិយភាពបក្សកាន់អំណាចដដែល។
តាមរយៈអំណះអំណាងនេះ ទាំងលោក ហ៊ុន សែន និង លោក ស ខេង មានសុទិដ្ឋិនិយមដូចគ្នាថា ការចូលរួមបោះឆ្នោតរបស់ប្រជាពលរដ្ឋច្រើនជាង៨២ភាគរយ នៃអ្នកមានឈ្មោះបោះឆ្នោត នាពេលកន្លងទៅនេះ បានបង្ហាញឲ្យឃើញពីការយល់ដឹងច្បាស់របស់ប្រជាពលរដ្ឋ និងបានប្រើប្រាស់សិទ្ធិសេរីភាពរបស់ខ្លួន បោះឆ្នោតជ្រើសតាំងតំណាងរាស្រ្តមកពីគណបក្សនយោបាយនានា ដែលខ្លួនពេញចិត្តដោយសេរី គ្មានការកៀបសង្កត់ ឬបង្ខិតបង្ខំអ្វីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ