តុលាការចាប់បង្ខំឲ្យ លោក គឹម សុខ សងជំងឺចិត្តគណបក្សកាន់អំណាច២០ម៉ឺនដុល្លារ
តុលាការក្រុងភ្នំពេញបានបង្គាប់ឲ្យធនាគារជាតិផ្តល់ឯកសារ ស្តីពី គណនី និងទំហំទឹកប្រាក់ដែលមានក្នុងគណនីរបស់លោក គឹម សុខ ជាអ្នកវិភាគបញ្ហាសង្គមហើយដែលត្រូវបានកាត់ទោសក្រោមបណ្តឹងរបស់គណបក្សកាន់អំណាច។ បើតាមតុលាការគឺលោក គឹម សុខ ត្រូវចាប់បង្ខំឲ្យសងជំងឺចិត្តចំនួន៨០០លានរៀលឬស្មើនឹង២០ម៉ឺនដុល្លារទៅឲ្យគណបក្សប្រជាជនកម្ពុជា បន្ទាប់ពីលោក គឹម សុខ លើកឡើងថា ករណីសម្លាប់លោក កែម ឡី មានជាប់ទាក់ទងនឹងគណបក្សអំណាច។ ប៉ុន្តែ លោក គឹម សុខ បានអះអាងថា ចំណាត់ការប្រឆាំងរូបលោកនៅពេលនេះ បង្ហាញថា លោកមិន«បានលក់ខ្លួន»ដូចការចោទប្រកាន់របស់មនុស្សមួយចំនួនដែលគាំទ្រគណបក្សប្រឆាំងឡើយ។
ចុះផ្សាយនៅថ្ងៃ៖
ស្តាប់ - ០២:០០
«គឹម សុខ ជានរណា?» មនុស្សមួយចំនួន ដែលតាំងខ្លួនជាអ្នកដឹងរឿងផុតមេឃ បាននិងកំពុងបង្កើតក្រុមបណ្ដាក់គ្នាឆ្លងទ្វីប ញុះញង់តាមបណ្ដាញសង្គមរាល់ថ្ងៃ មួលបង្កាច់ថា គឹម សុខ លក់ខ្លួនហើយ រីឯពួកគណបក្សប្រជាជនខំប្រឹងខ្វេះខ្វាចប្រើគ្រប់វិធីគាបសង្កត់ គឹម សុខ ឲ្យសងជម្ងឺចិត្ត៨០០លានរៀលស្មើនឹងប្រមាណ២០ម៉ឺនដុល្លារ។ នេះគឺជាអ្វីដែល អ្នកវិភាគធ្លាប់ជាប់ពន្ធនាគាររូបនេះប្រតិកម្មចំពោះដីការបស់តុលាការក្រុងភ្នំពេញចុះថ្ងៃទី១៦ខែធ្នូ ឆ្នាំ២០១៩ ដែលបានបង្គាប់ឲ្យធនាគារជាតិផ្តល់ឯកសារ ស្តីពី គណនី និងទំហំទឹកប្រាក់ដែលលោក គឹម សុខ មានសម្រាប់រឹបអូសយកទៅសងជំងឺចិត្តឲ្យគណបក្សប្រជាជនកម្ពុជា។
យ៉ាងណាក៏ដោយ លោក គឹម សុខ ដែលទទួលបានសិទ្ធិជ្រកកោណនៅប្រទេសហ្វាំងឡង់ហើយនោះមិនបានបង្ហាញក្តីបារម្ភពីការរឹបអូសលុយរបស់លោកដែលមាននៅក្នុងធនាគារឡើយ។ តែផ្ទុយមកវិញលោកអះអាងថា អ្វីដែលគណបក្សប្រជាជនកម្ពុជាកំពុងបន្តចំណាត់ការប្រឆាំងរូបលោកគឺបង្ហាញថា លោកមិន«បានលក់ខ្លួន»ដូចការចោទប្រកាន់របស់មនុស្សមួយចំនួនដែលគាំទ្រគណបក្សប្រឆាំងឡើយ។
សូមរំឭកជូនថា លោក គឹម សុខ ត្រូវបានតុលាការដោះលែងឲ្យមានសេរីភាពកាលពីថ្ងៃទី១៧ ខែសីហា ឆ្នាំ២០១៨ បន្ទាប់ជាប់ពន្ធនាគារអស់រយៈពេល ១៨ខែ ទៅតាមការកំណត់នៅក្នុងសាលក្រមរបស់តុលាការ។ ការចាប់ខ្លួននិងកាត់ទោសអ្នកវិភាគបញ្ហាសង្គមរូបនេះ គឺបន្ទាប់ពីលោក គឹម សុខ បាននិយាយថា គណបក្សប្រជាជនកំពុងកាន់អំណាចជាអ្នកនៅពីក្រោយនៃឃាតកម្មបាញ់សម្លាប់បណ្ឌិត កែម ឡី។ តែមេធាវីគណបក្សប្រជាជនកម្ពុជា លោកគី តិច បានប្តឹងលោក គឹម សុខ ដោយទាមទារសំណងជំងឺចិត្តចំនួន៥០ម៉ឺនដុល្លារ តែតុលាការកាត់ឲ្យចំនួន៨០០លានរៀលឬស្មើនឹង២០ម៉ឺនដុល្លារដោយចាប់បង្ខំឲ្យអនុវត្តក្រោយពីលោក គឹម សុខ អនុវត្តទោសជាប់ពន្ធនាគាររួចរាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ