មេបក្សប្រឆាំងព្រមានសកម្មជនរបស់ខ្លួន មិនឲ្យធ្វើបាតុកម្មប្រឆាំងនាយករដ្ឋមន្ដ្រីកម្ពុជា នៅអាមេរិក
លោក សម រង្ស៊ី ប្រធានគណបក្សសង្គ្រោះជាតិ បានព្រមានទៅដល់សកម្មជនរបស់ខ្លួននៅអាមេរិក មិនឲ្យធ្វើបាតុកម្មប្រឆាំងនឹងលោកនាយករដ្ឋមន្ដ្រី ហ៊ុន សែន ដែលនឹងត្រូវធ្វើដំណើរទស្សនកិច្ចនៅអាមេរិក នៅខែពាក់កណ្ដាលខែកុម្ភៈខាងមុខនេះឡើយ។ ថ្លែងនៅក្នុងពិធីជួបជុំជាមួយអ្នកគាំទ្ររបស់ខ្លួន នៅទីក្រុងវ៉ាស៊ីនតោន សហរដ្ឋអាមេរិក កាលពីយប់ថ្ងៃព្រហស្បតិ៍កន្លងទៅ ប្រមុខគណបក្សប្រឆាំង បានចាត់ទុកការធ្វើបាតុកម្មនោះថា នឹងធ្វើឲ្យខាតប្រយោជន៍របស់គណបក្សសង្គ្រោះជាតិទៅវិញទេ។
ចុះផ្សាយនៅថ្ងៃ៖
ស្តាប់ - ០២:៣៤
ក្រៅពីអំពាវនាវដល់សកម្មជនរបស់ខ្លួន មិនឲ្យធ្វើបាតុកម្មប្រឆាំងវត្តមានលោកនាយករដ្ឋមន្ដ្រីហ៊ុន សែន នៅអាមេរិក លោក សម រង្ស៊ី ក៏បានព្រមានធ្ងន់ៗផងដែរថា អ្នកដែលមានះធ្វើបាតុកម្ម ត្រូវចាត់ទុកខ្លួនឯងថា មិនមែនជាសកម្មជនរបស់គណបក្សសង្គ្រោះជាតិនោះឡើយ។ និងថា គណបក្សសង្គ្រោះជាតិ មិនគាំទ្រ មិនទទួលស្គាល់ទង្វើអ្នកដែលធ្វើបាតុកម្មនោះឡើយ។
ការលើកឡើងរបស់លោក សម រង្ស៊ី ដូច្នេះ ធ្វើឡើងបន្ទាប់ពីមានពលរដ្ឋខ្មែរមួយក្រុមនៅសហរដ្ឋអាមេរិក ប្រកាសពីគម្រោងធ្វើបាតុកម្មតវ៉ា ប្រឆាំងនឹងវត្តមានរបស់លោកនាយករដ្ឋមន្ដ្រី ហ៊ុន សែន នៅអាមេរិក នៅពាក់កណ្ដាលខែកុម្ភៈខាងមុខនេះ។
ជុំវិញគម្រោងធ្វើបាតុកម្មនៅសហរដ្ឋអាមេរិកនេះ ប្រមុខរដ្ឋាភិបាលកម្ពុជា កាលពីចុងខែមករាកន្លងទៅថ្មីៗនេះ បានគូសបញ្ជាក់ថា ការធ្វើបាតុកម្មប្រឆាំងលោក បើមានប្រយោជន៍ក៏ធ្វើតាមចិត្តទៅចុះ ព្រោះវាជាមុខជំនាញរបស់ពួកគេទៅហើយ។ លោក ហ៊ុន សែន ក៏បានផ្ដាំទៅបុគ្គលដែលគ្រោងរៀបចំបាតុកម្មនោះឲ្យប្រាប់ទៅមេដឹកនាំរបស់ខ្លួន ទាំងក្នុងនិងក្រៅប្រទេសថា ត្រូវទទួលស្គាល់សិទ្ធិបាតុកម្មរបស់អ្នកគាំទ្រលោក ប្រឆាំងមេដឹកនាំរបស់ពួកគេនៅក្នុងប្រទេសកម្ពុជាវិញផងដែរ។
សូមរំលឹកជូនថា កាលពីថ្ងៃទី២៦ខែកញ្ញាឆ្នាំ២០១៥កន្លងទៅ ប្រមុខរដ្ឋាភិបាលកម្ពុជា ធ្លាប់ត្រូវបានពលរដ្ឋខ្មែរអាមេរិកាំងធ្វើបាតុកម្មប្រឆាំង នៅពេលដែលលោកធ្វើដំណើរបំពេញទស្សនកិច្ចនៅសហរដ្ឋអាមេរិក។ លោកហ៊ុន សែន បានចោទប្រកាន់គណបក្សសង្គ្រោះជាតិ ថាជាអ្នកនៅពីក្រោយបាតុកម្មប្រឆាំងរូបលោកនៅខែកញ្ញានោះ ព្រោះថារបាយការណ៍ហិរញ្ញវត្ថុរបស់បក្សប្រឆាំងនៅរដ្ឋមួយ បានទម្លាយឲ្យដឹងពីការចំណាយធ្វើបាតុកម្មនេះ។
យ៉ាងណាក៏ដោយ គណបក្សប្រឆាំងបានប្រកែកពីការពាក់ព័ន្ធនានា និងបានគូសបញ្ជាក់ពីជំហរបស់ខ្លួនថា មិនគាំទ្រដល់ការធ្វើបាតុកម្មណាមួយប្រឆាំងនឹងលោកនាយករដ្ឋមន្ដ្រីហ៊ុន សែន នៅអាមេរិក នៅពាក់កណ្ដាលខែកុម្ភៈនេះជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ