ក្រសួងយុត្តិធម៌នឹងបញ្ជួនលិខិតរបស់ក្រុមតំណាងរាស្រ្តគណបក្សប្រឆាំង ជុំវិញរឿងរ៉ាវស្រ្តីរកស៊ីផ្លូវភេទលង់ទឹកស្លាប់ ទៅកាន់តុលាការ
ក្រសួងយុត្តិធម៌នឹងបញ្ជួនលិខិតរបស់ក្រុមតំណាងរាស្រ្តគណបក្សប្រឆាំង ជុំវិញរឿងរ៉ាវស្រ្តីរកស៊ីផ្លូវភេទលង់ទឹកស្លាប់ ទៅកាន់តុលាការ ដើម្បីធ្វើការស៊ើបអង្កេត។ ការបញ្ជូនលិខិតនេះបន្ទាប់ពីក្រុមតំណាងរាស្រ្តគណបក្សប្រឆាំង កាលពីថ្ងៃទី ១៩ មករា ឆ្នាំ២០១៦ បានដាក់លិខិតទៅកាន់ប្រធានរដ្ឋសភា ដើម្បីស្នើសុំឲ្យរដ្ឋមន្រ្តីយុត្តិធម៌ស៊ើបអង្កេត និងមានកិច្ចអន្តរាគមន៍លើក្រុមសន្តិសុខខណ្ឌដូនពេញ ដើម្បីបញ្ចប់វប្បធម៌និទណ្ឌភាពនៅកម្ពុជា។ ក៏ប៉ុន្តែអ្នកនាំពាក្យក្រសួងយុត្តិធម៌បានបញ្ជាក់ថា បើទោះបីជាមាន ឬគ្មានលិខិតពីក្រុមតំណាងរាស្រ្តបក្សប្រឆាំងនេះក៏ដោយ ក៏អាជ្ញាធរមានសម្ថតកិច្ចបាននឹងកំពុងធ្វើការស៊ើបអង្កេតរួចទៅហើយ។
ចុះផ្សាយនៅថ្ងៃ៖
ស្តាប់ - ០២:២១
ក្រសួងយុត្តិធម៌ បានទទួលលិខិតរបស់ក្រុមតំណាងរាស្រ្តគណបក្សសង្រ្គោះជាតិ ពីប្រធានរដ្ឋសភា លោកហេង សំរិន ហើយនៅល្ងាចថ្ងៃទី ២៥ មករា ឆ្នាំ២០១៦។ លិខិតដែលក្រុមតំណាងរាស្រ្តបក្សសង្រ្គោះជាតិ បានចុះហត្ថលេខាកាលពីថ្ងៃទី ១៩ មករា ជូនទៅក្រសួងកិច្ចការនារី ក្រសួងយុត្តិធម៌ និងក្រសួងមហាផ្ទៃ ដើម្បីសុំអន្តរាគមន៍រកយុត្តិធម៌ឲ្យស្រ្តីរកស៊ីផ្លូវភេទម្នាក់ឈ្មោះ ប៉ែន សុគន្ធា ដែលបានលង់ទឹកស្លាប់ កាលពីថ្ងៃទី ១ មករាកន្លងទៅ។ ក្រសួងយុត្តិធម៌បានប្រាប់វិទ្យុបារំាងថា នឹងបញ្ជូនសំណើរបស់តំណាងរាស្ត្រគណបក្សសង្គ្រោះជាតិនេះ ទៅកាន់តុលាការ ក្នុងពេលឆាប់ៗនេះ។
នៅក្នុងលិខិតនោះ ក្រុមតំណាងរាស្រ្តបក្សសង្រ្គោះជាតិឱ្យដឹងថា កាលពីថ្ងៃទី ០១ ខែមករា ឆ្នាំ២០១៧ ក្រុមសន្តិសុខខណ្ឌដូនពេញបានចុះបង្ក្រាប និងចាប់ប្រមូលក្រុមស្ត្រីរកស៊ីផ្លូវភេទនៅផ្តុំទន្លេសាប ស្ថិតនៅក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។ ខណៈចុះចាប់ដើម្បីបង្ក្រាបក្រុមស្ត្រីរកស៊ីផ្លូវភេទនោះ ក្រុមសន្តិសុខខណ្ឌដូនពេញបានដេញចាប់ឃាត់ខ្លួនស្រ្តីមួយចំនួន រួចក៏ព្យាយាមលោតពីទូកមួយទៅទូកមួយទៀត ដើម្បីគេចចេញពីការតាមចាប់ខ្លួន ខណៈដែលលោតនោះបានរអិលជើងដួលបោកក្បាលធ្លាក់ចូលទឹកទន្លេនៅត្រង់ចំនុចសួនខាងក្រោយក្រុមប្រឹក្សាអភិវឌ្ឍន៍កម្ពុជា។ ហើយតាមសាក្សីនៅកន្លែងបានអះអាងថា សន្តិសុខបានដេញតាមស្ត្រីរូបនោះ រហូតធ្លាក់ចូលក្នុងទឹកទន្លេ ហើយរារាំងមិនឳ្យប្រជាពលរដ្ឋនៅកន្លែងកើតហេតុជួយសង្គ្រោះនារីម្នាក់នោះទេ បើទោះបីជានាងបានស្រែកហៅឱ្យជួយសង្គ្រោះក៏ដោយ។
អ្នកតំណាងរាស្រ្តបក្សសង្រ្គោះជាតិ បានចោទប្រកាន់ ក្រុមសន្តិសុខដែលចុះបង្រ្កាបស្រីរកស៊ីផ្លូវភេទ ថាមានចេតនាទុកឲ្យ នារីម្នាក់ឈ្មោះ ប៉ែន សុគន្ធា លង់ទឹកស្លាប់ពិតប្រាកដ ដោយសារពួកគេមិនបានផ្តល់មធ្យោបាយណាមួយ ដើម្បីជួយសង្រ្គោះជងរងគ្រោះឡើយ ហើយថែមទាំងបានរារាំងការជួយសង្រ្គោះទៀតផង។ ក្នុងលិខិតនោះ ក្រុមតំណាងរាស្រ្តបក្សសង្រ្គោះជាតិ បានស្នើឲ្យ រដ្ឋមន្រ្តីយុត្តិធម៌ អន្តរាគមន៍ឲ្យមានការចោទប្រកាន់ទៅលើក្រុមសន្តិសុខខណ្ឌដូនពេញ ដើម្បីបញ្ចប់វប្បធម៌និទណ្ឌភាពនៅកម្ពុជា និងជាពិសេសអំពើហិង្សា ដែលប្រព្រឹត្តដោយក្រុមសន្តិសុខចំពោះប្រជាពលរដ្ឋទូទៅ។
ក៏ប៉ុន្តែលោក ជិន ម៉ាលីន អ្នកនាំពាក្យក្រសួងយុត្តិធម៌បានបញ្ជាក់ថា ការស្នើសុំរបស់ក្រុមតំណាងរាស្រ្តបក្សប្រឆាំង គឺជាសិទ្ធិសេរីភាពរបស់ពួកគាត់ និងមួយវិញទៀត បើទោះបីជាមាន ឬគ្មានលិខិតពីក្រុមតំណាងរាស្រ្តក៏ដោយ ក៏អាជ្ញាធរមានសម្ថតកិច្ចបាននឹងកំពុងធ្វើការស៊ើបអង្កេតលើករណីនេះរួចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ