បក្សសង្គ្រោះជាតិ ចោទបក្សកាន់អំណាចថា គ្មានឆន្ទៈដោះលែងមន្ត្រីរបស់ខ្លួន និងមន្ត្រីសង្គមស៊ីវិល ដូចសន្យាឆ្នាំមុន
ឆ្លងចូលឆ្នាំ២០១៧ទៅហើយ តែតំណាងរាស្ត្រ និងសកម្មជន របស់បក្សសង្គ្រោះជាតិទាំង ១៥នាក់ និងមន្ត្រីសង្គមស៊ីវិល ផ្សេងទៀត មិនទាន់ត្រូវបានដោះលែង ដូចសន្យាឆ្នាំមុននោះទេ ទើបបក្សសង្គ្រោះជាតិ នៅថ្ងៃពុធនេះ វាយតម្លៃថា បក្សកាន់អំណាចគ្មានឆន្ទៈដោះស្រាយបញ្ហានយោបាយនៅកម្ពុជា។ តែបក្សប្រជាជនកម្ពុជា តបថា នោះមិនមែនជាការសន្យាទេ ព្រោះថ្នាក់ដឹកនាំបក្សកាន់អំណាច ប្រាប់ហើយថា «អាច» នឹងមានការដោះលែង ប៉ុណ្ណោះ !
ចុះផ្សាយនៅថ្ងៃ៖
ស្តាប់ - ០២:៤៧
ក្រោយជំនួបបិទទ្វារ នៅរដ្ឋសភា រវាងលោកនាយករដ្ឋមន្ត្រី ហ៊ុន សែន និង លោក កឹម សុខា ប្រធានស្តីទីគណបក្សសង្គ្រោះជាតិ ដើម្បីឈានទៅរកដំណោះស្រាយនយោបាយនៅកម្ពុជា កាលពីថ្ងៃទី៧ ខែធ្នូ ឆ្នាំ២០១៦ លោកឧបនាយករដ្ឋមន្ត្រី ស ខេង បានបញ្ជាក់ប្រាប់ក្រុមអ្នកកាសែត ថា លោកមេឃុំ ស៊ាង ចែត អាចនឹងត្រូវដោះលែងនៅថ្ងៃនោះ ចំណែកមន្ត្រីសង្គមស៊ីវិលមួយចំនួន ព្រមទាំងមន្ត្រីគ.ជ.ប ដែលកំពុងជាប់ឃុំអាចនឹងមានការដោះលែងនៅដំណាច់ខែធ្នូ ឆ្នាំ២០១។ ពិតដូចថ្លែងមែន លោក ស៊ាង ចែត មេឃុំស្រក មកពីគណបក្សសម រង្ស៊ី នៃស្រុកកំពង់សៀម ខេត្តកំពង់ចាម ដែលតុលាការ ផ្តន្ទាទោស ដាក់ពន្ធនាគាររយៈពេល ៥ឆ្នាំ ពីបទសូកប៉ាន់សាក្សី ត្រូវបាន ព្រះមហាក្សត្រ ចេញព្រះរាជក្រឹត្យលើកលែងទោសតាមសំណើលោកនាយករដ្ឋមន្ត្រី ហ៊ុន សែន កាលពី ថ្ងៃទី០៧ ខែធ្នូ ឆ្នាំ២០១៦ និងដោះលែងចេញពីពន្ធនាគារ នៅថ្ងៃបន្ទាប់។ ប៉ុន្តែឆ្លងចូលមកដល់ឆ្នាំ២០១៧ ទៅហើយ តំណាងរាស្ត្របក្សសង្គ្រោះជាតិ សកម្មជនបក្ស និងមន្ត្រីសង្គមស៊ីវិលផ្សេងទៀត មិនទាន់ត្រូវបានដោះលែងនោះទេ។
តំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង ចោទថា ការខកខានមិនបានដោះលែងមន្ត្រីបក្សរបស់ខ្លួន និងមន្ត្រីសង្គមស៊ីវិល ដូចសន្យាចុងឆ្នាំ២០១៦ គឺដោយសារតែ បក្សកាន់អំណាច គ្មានឆន្ទៈក្នុងការដោះស្រាយបញ្ហា នយោបាយនៅកម្ពុជា។
លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា ថ្លែងប្រាប់វិទ្យុបារាំងអន្តរជាតិ នៅថ្ងៃពុធនេះថា ថ្នាក់ដឹកនាំបក្សប្រជាជនកម្ពុជា គ្រាន់តែថ្លែងថា អាចនឹងមានការដោះលែង ដែលមិនមែនជា ពាក្យសន្យានោះទេ ! លោកបង្ហើបថា មកទល់នឹងពេលនេះ បក្សប្រជាជនកម្ពុជា មិនទាន់មានផែនការជួបពិភាក្សាពីការដោះលែងសកម្មជនបក្សសង្គ្រោះជាតិ និងមន្ត្រីសង្គមស៊ីវិលជាមួយបក្សប្រឆាំងនៅឡើយទេ។ អ្នកនាំពាក្យរូបនេះ បន្ថែមថា ខណៈ សំណុំរឿងមន្ត្រីបក្សប្រឆាំង និងសង្គមស៊ីវិល កំពុងស្ថិតក្នុងនីតិវិធីរបស់តុលាការ ដែលនៅរាយប៉ាយ តាំងពីតុលាការដំបូង ដល់តុលាការកំពូល បក្សប្រជាជនកម្ពុជា មិនទាន់អន្តរាគមន៍ក្នុងដំណាក់កាលនេះ ដើម្បីគេចពីការចោទប្រកាន់ដែលថា បក្សកាន់អំណាចជ្រៀតជ្រែកឯករាជភាពរបស់តុលាការ។
លោក សំ ចាន់គា អ្នកនាំពាក្យ អង្គការសិទ្ធិមនុស្សអាដហុក យល់ថា ការមិនទាន់ដោះលែងមន្ត្រីសិទ្ធិមនុស្សអាដហុក ទាំងបួនរូប និងមន្ត្រី គជប ម្នាក់ អាចមកពី បក្សកាន់អំណាចកំពុងរវល់កិច្ចការចុងឆ្នាំរបស់បក្ស។ លោកបន្ថែមថា មេធាវីអាដហុក បានដាក់សារណា ស្នើសុំទម្លាក់ចោលការចោទប្រកាន់ មន្ត្រីអាដហុក និងមន្ត្រី គជប ទៅ ចៅក្រមស៊ើបសួរ ហើយ នឹងកំពុងរង់ចាំការសម្រួលឲ្យមានការដោះលែង សកម្មជនអាដហុក ព្រោះ បក្សកាន់អំណាច មានសិទ្ធិជម្រុញឲ្យ មន្ត្រីតុលាការ ដែលជា មន្ត្រីជាន់ខ្ពស់ក្នុងបក្សរបស់ខ្លួន ឲ្យបញ្ចប់សំណុំរឿងនេះ និងមានការដោះលែង។ អង្គការសិទ្ធិមនុស្សអាដហុក ថ្លែងថា ការបន្តឃុំខ្លួន មន្ត្រីសិទ្ធិមនុស្សអាដហុក អត់ចំណេញដល់បក្សកាន់អំណាចឡើយ តែមានតែខាតប្រជាប្រិយភាពវិញប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ