តំណាងរាស្ត្រ មេធាវី និងសកម្មជនគណបក្សសង្គ្រោះជាតិ ប្តឹងជំទាស់នឹងការសម្រេចផ្តន្ទាទោស
តំណាងរាស្ត្រគណបក្សសង្គ្រោះជាតិ លោក ចាន់ ចេង លោកមេធាវី ជូង ជូងី និងសកម្មជនគណបក្សសង្គ្រោះជាតិ លោក មាស ប៉េង នឹងដាក់ពាក្យបណ្តឹងឧទ្ធរណ៍ ជំទាស់នឹងការសម្រេចរបស់តុលាការខេត្តកណ្តាល ដែលបានផ្តន្ទាទោស លើពួកគាត់ កាលពីថ្ងៃទី១៣មីនា។ ជាការសម្រេចក្តី ដែលលោកមេធាវី ជូង ជូងី ចាត់ទុកថា ជាការបំបាក់អ្នកដែលហ៊ានតវ៉ា ប្រឆាំងនឹងអំពើអយុត្តិធម៌ និងប្រឆាំងអ្នកមានអំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
កាលពីព្រឹកថ្ងៃទី១៣មីនាម្សិលមិញ ចៅក្រមតុលាការខេត្តកណ្តាល បានប្រកាសសាលក្រម សម្រេចផ្តន្ទាទោសកំបាំងមុខ លោក ចាន់ ចេង អ្នកតំណាងរាស្ត្រមណ្ឌលខេត្តកណ្តាល របស់គណបក្សសង្គ្រោះជាតិ និងលោកមេធាវី ជូង ជូងី ដាក់ពន្ធនាគារ ២ ឆ្នាំ ពីបទផ្តល់មធ្យោបាយឲ្យលួចរត់។ ចំណែកលោក មាស ប៉េង សមាជិកក្រុមប្រឹក្សាស្រុកកៀនស្វាយ មកពីគណបក្សសង្គ្រោះជាតិ ក៏ត្រូវចៅក្រមតុលាការខេត្តកណ្តាល សម្រេចផ្តន្ទាទោស ដាក់ពន្ធនាគារ ១៨ ខែ ពីបទលួចរត់ចេញពីមន្ទីរឃុំឃាំង។
បទចោទប្រកាន់ក្នុងសំណុំរឿងក្តីព្រហ្មទណ្ឌទាំងនោះ បានកើតឡើង កាលពីឆ្នាំ២០១២ ខណៈដែលលោកតំណាងរាស្ត្រ និងមេធាវីគណបក្សប្រឆាំង បាននាំលោកមាស ប៉េង ចេញពីពន្ធនាគារ ខេត្តកណ្តាល។ ការចាប់ខ្លួន និងចោទប្រកាន់សកម្មជនគណបក្សសមរង្ស៊ី កាលណោះ គឺលោកមាសប៉េង បានកើតឡើង ក្នុងរឿងជម្លោះដីធ្លីមួយ។
យ៉ាងណាក៏ដោយ ការសម្រេចក្តីប្រឆាំងមេធាវី សកម្មជន និងជាពិសេសលើតំណាងរាស្ត្រ លោក ចាន់ ចេង ដែលកំពុងមានអភ័យឯកសិទ្ធិសភានៅឡើយ នាំឲ្យមានការងឿងឆ្ងល់។ លោកមេធាវី ជូង ជូងី បានចាត់ទុក ការផ្តន្ទាទោសកំបាំងមុខលើតំណាងរាស្ត្រដូច្នេះ ថាជាការសម្រេចផ្តេសផ្តាស់របស់ចៅក្រម ក្រោមឥទ្ធិពលរបស់អ្នកមានអំណាច។
ចំណែកការសម្រេចផ្តន្ទាទោសកំបាំងលើរូបលោកវិញ ត្រូវបានលោកមេធាវី ជូង ជូងី ដែលជាមេធាវីការពារឲ្យគណបក្សប្រឆាំង ចាត់ទុកថា ជាការបំបាក់លើអ្នកដែលហ៊ានតវ៉ា ប្រឆាំងនឹងអំពើអយុត្តិធម៌ និងប្រឆាំងអ្នកមានអំណាច។
លោកមេធាវី អះអាងថា មិនសុខចិត្ត ហើយនឹងដាក់ពាក្យប្តឹងឧទ្ធរណ៍ប្រឆាំងសាលក្រមរបស់តុលាការខេត្តកណ្តាល។ ពាក្យបណ្តឹង នឹងដាក់ទៅកាន់តុលាការសាលាឧទ្ធរណ៍ នៅពេលទទួលបានសាលក្រម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ