បក្សប្រឆាំងស្វាគមន៍ការបង្ហាញមុខរបស់ជនដៃដល់ ប៉ុន្តែអំពាវនាវឲ្យចាប់ខ្លួនអ្នកពាក់ព័ន្ធផ្សេងទៀត
គណបក្សសង្រ្គោះជាតិបានស្វាគមន៍ចំពោះការចេញមុខសារភាពរបស់ជនដៃដល់ទាំងបីនាក់ ដែលបានបង្កររបួសស្នាមលើអ្នកតំណាងរាស្រ្ត២រូប គឺលោកញ៉យ ចំរើន និងលោកគង់ សភា។ ប៉ុន្តែអ្នកនាំពាក្យគណបក្សប្រឆាំងមួយនេះ បានអំពាវនាវឲ្យអាជ្ញាធរ តាមចាប់ខ្លួនអ្នកពាក់ព័ន្ធផ្សេងទៀត ខណៈដែលជនដៃដល់ទាំងបីនាក់ កំពុងតែស្ថិតនៅក្នុងតុលាការដើម្បីធ្វើការសាកសួរ នៅព្រឹកថ្ងៃទី៤ វិច្ឆិកានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
លោកយ៉ែម បុញ្ញារិទ្ធ អ្នកនាំពាក្យគណបក្សសង្គ្រោះជាតិ បានបញ្ជាក់ប្រាប់វិទ្យុបារាំង ថាគណបក្សស្វាគមន៍ចំពោះការរកឃើញជនដៃដល់ ហើយបញ្ជូនទៅកាន់តុលាការដើម្បីធ្វើការកាត់ទោសទៅតាមផ្លូវច្បាប់។ ប៉ុន្តែលោកបានបន្តថា បើតាមរូបភាពដែលបានបង្ហាញនៅក្នុងកាមេរ៉ាសុវត្ថិភាព ឃើញថា មានមនុស្សជាច្រើនបានចូលរួមក្នុងអំពើហិង្សាវាយតំណាងរាស្រ្តទាំងពីររូប ដែលមានលោកញ៉យ ចំរើន និងលោកគង់ សភា។ ដូច្នេះហើយទើបលោក អំពាវនាវឲ្យអាជ្ញាធរតាមចាប់ខ្លួនអ្នកពាក់ព័ន្ធផ្សេងទៀតយកមកផ្តទ្ទាទោសតាមច្បាប់។
លោកនាយករដ្ឋមន្ត្រីហ៊ុន សែន កាលពីថ្ងៃទី២៨ តុលា ក៏បានប្រកាសឲ្យអាជ្ញាធររបស់រដ្ឋាភិបាលតាមចាប់ខ្លួនបុគ្គលទាំងឡាយណា ដែលបានបង្ករបួសស្នាមដល់តំណាងរាស្ត្រគណបក្សសង្គ្រោះជាតិ បើទោះបីជាជននោះគឺជា មន្ត្រីគណបក្សប្រជាជនកម្ពុជា ឬអ្នកគាំទ្ររដ្ឋាភិបាលក៏ដោយ ក៏ត្រូវយកមកផ្តន្ទាទោសតាមច្បាប់។ ហើយលោកក៏បានអំពាវនាវផងដែរថា បើសិនជាអ្នកដែលបានប្រពឹ្រត្តិអំពើនេះ ចេញមុខមកសារភាព គឺល្អបំផុតដើម្បីទទួលខុសត្រូវចំពោះមុខច្បាប់។
យោងតាមសេចក្តីជូនដំណឹងរបស់ក្រសួងមហាផ្ទៃ ជនដៃដល់ ដែលបានបង្ករបួសស្នាមលើអ្នកតំណាងរាស្រ្ត ២រូប បានចេញមកបង្ហាញខ្លួនចំពោះមុខ គណៈកម្មការស្រាវជ្រាវស៊ើបអង្កេត ករណីបង្ករបួសស្នាមលើអ្នកតំណាងរាស្រ្តរបស់ក្រសួងមហាផ្ទៃ នៅល្ងាចថ្ងៃទី៣ វិច្ឆិកា។ ជនសង្ស័យទាំងបីរូបនោះ មានឈ្មោះ ចាយ សារិទ្ធ ភេទប្រុស អាយុ៣៣ឆ្នាំ មានទីលំនៅសង្កាត់តាខ្មៅ ក្រុងតាខ្មៅ ខេត្តកណ្តាល។ ទីពីរមានឈ្មោះ ម៉ៅ ហឿន ភេទប្រុស អាយុ៣៤ឆ្នាំ ស្នាក់នៅឃុំព្រែកខ្សាយ «ខ» ស្រុកពាមរក៍ ខេត្តព្រៃវែង និងទីបី ឈ្មោះស៊ុត វណ្ណនី ភេទប្រុស អាយុ៤៥ឆ្នាំ ស្ថិតនៅក្នុងភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល។
សូមបញ្ជាក់ថា រហូតមកទល់នឹងពេលនេះ តំណាងរាស្រ្តគណបក្សសង្គ្រោះជាតិទាំងពីររូបដែលបានរងរបួសធ្ងន់ធ្ងរ ដោយសារតែជនដៃដល់វាយកាលពីថ្ងៃទី ២៦តុលានោះ នៅតែបន្តសម្រាកព្យាបាលជំងឺ ក្នុងទីក្រុងបាងកក ប្រទេសថៃ។ តំណាងរាស្ត្រទាំងពីរ ដែលមានលោកញ៉យ ចំរើន និងលោកគង់ សភា បានរងការវាយដំយ៉ាងខ្លាំង នៅខាងមុខរដ្ឋសភាជាតិ បន្ទាប់បាតុកម្មតវ៉ាទាមទារឲ្យលោក កឹម សុខា អនុប្រធានទីមួយរបស់រដ្ឋសភាចុះចេញពីតំណែង ត្រូវបានរំសាយ។ បាតុកម្មតវ៉ានោះមានអ្នកចូលរួមជិត២ពាន់នាក់ ដែលសុទ្ធតែជាអ្នកគាំទ្រគណបក្សប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ