មេបក្សប្រឆាំងថា មេដឹកនាំប្រទេសដែលពូកែ ទោះអត់ពីខ្លួនក៏គ្មានសង្គ្រាមកើតឡើងដែរ
លោកកឹម សុខា ប្រធានគណបក្សសង្គ្រោះជាតិតាមរយៈទំព័រហ្វេសប៊ុករបស់ខ្លួនកាលពីយប់មិញ បានអះអាងថា មេដឹកនាំប្រទេសដែលពូកែ គឺថាបើទោះអត់ពីខ្លួនទៅក៏ប្រទេសនៅតែដើរទៅមុខរីកចម្រើន និងមិនរលាយឫកើតមានសង្គ្រាមនោះដែរ។ ជាការកត់សម្គាល់ ការអះអាងរបស់មេបក្សប្រឆាំងនេះ បានកើតឡើងក្រោយពីមេបក្សកាន់អំណាចតែងតែលើកឡើងពីបញ្ហាសន្តិភាពនិងឆ្លៀតបង្ហើរវោហារសាស្ត្រពីលទ្ធភាពនៃការកើតមានសង្គ្រាម នៅពេលដែលគណបក្សប្រជាជនកម្ពុជាមិនបានដឹកនាំប្រទេសនោះ។
ចុះផ្សាយនៅថ្ងៃ៖
ស្តាប់ - ០២:១៥
គឺនៅក្នុងបទសម្ភាសន៍មួយជាមួយភ្នាក់ងាររបស់ខ្លួនជុំវិញការកកើតគណបក្សសង្គ្រោះជាតិរយៈពេល៥ឆ្នាំមកនេះ និងអំពីយុទ្ធសាស្ត្របន្តទៅមុខទៀតរបស់គណបក្ស លោកកឹម សុខា ដែលជាប្រធានគណបក្សសង្គ្រោះជាតិបានឆ្លៀតអះអាងដូច្នេះថា៖“ហើយខ្ញុំសុំយកឱកាសនេះជំរាបជូនថា អ្នកដឹកនាំគណបក្សដែលពូកែគឺជាគណបក្សមួយដែលអត់ពីខ្លួនទៅ គឺគណបក្សនៅតែរស់រវើក ហើយនៅរីកតទៅទៀតបាន មិនមែនអន្តរាយទេ មិនមែនរលាយ។ ដូចគ្នាដែរ អ្នកដឹកនាំប្រទេសដែលពូកែគឺអ្នកដឹកនាំប្រទេសដែលអត់ពីខ្លួនទៅ ប្រទេសនៅតែរីកទៅមុខ មិនមែនអត់ពីខ្លួនទៅ ប្រទេសរលាយ ប្រទេសសង្គ្រាមទេ ហ្នឹងអ្នកដឹកនាំអត់ពូកែទេ។ ភ្ជាប់ជាមួយការអះអាងបែបនេះ លោកប្រមុខគណបក្សប្រឆាំងក៏បានបង្ហាញពីការចង់ឲ្យគណបក្សសង្គ្រោះជាតិពូកែ។ ពូកែក្នុងន័យថា បើទោះអត់ពីនរណាម្នាក់ក៏ដោយ ក៏គណបក្សនេះនៅតែដើរទៅមុខ ដើរទៅរកជ័យជំនៈបានដែរ។ ជាមួយគ្នានេះ លោកកឹម សុខា ក៏បានបញ្ជាក់ជាថ្មីថា គណបក្សសង្គ្រោះជាតិមានគោលដៅតែមួយគត់គឺឈានទៅរកការបោះឆ្នោត គឺអត់ធ្វើបដិវត្តន៍ អត់ធ្វើសង្គ្រាមឫប្រើអំពើហិង្សានោះឡើយ។
ការលើកឡើងរបស់លោកប្រធានគណបក្សសង្គ្រោះជាតិនេះ គឺស្របពេលដែលប្រមុខរដ្ឋាភិបាលកម្ពុជាកំពុងតែជំរុញឲ្យរក្សាសន្តិភាពឲ្យបានដាច់ខាតនៅក្នុងប្រទេស និងបន្ទាប់ពីលោកនាយករដ្ឋមន្ត្រីហ៊ុន សែន បានព្រមានពីលទ្ធភាពនៃការកើតមានសង្គ្រាមនៅក្រោយការបោះឆ្នោតឆ្នាំ២០១។ នៅព្រឹកថ្ងៃទី១៩ កក្កដា គឺរំលងបានមួយយប់ពីការអះអាងរបស់លោកកឹម សុខា នៅលើទំព័រហ្វេសប៊ុករបស់លោកហ៊ុន សែន ក៏មានការលើកឡើងពីបញ្ហាសន្តិភាពជាថ្មីដែរដោយសរសេរថា មានសន្តិភាពយូរអង្វែង មានការរីកចម្រើនយូរអង្វែង។ ជាមួយនឹងការរំលេចនូវភាពខ្លាំងរបស់កម្ពុជាក្រោមស្នាដៃរបស់បុរសខ្លាំង នៅលើទំព័រហ្វេសប៊ុកនោះក៏មានការសរសេរបង្ហាញពីសន្ទុះនៃគាំទ្រមកលើគណបក្សប្រជាជនកម្ពុជាមានការកើនឡើង ដែលជាចំណុច បង្ហាញថា គណបក្សនេះនឹងទទួលបានជ័យជំនះនៅក្នុងការបោះឆ្នោតឆ្នាំ ២០១៨ ជាបន្តទៀត។
ក្តីរំពឹងនៃការឈ្នះការបោះឆ្នោតនៅក្នុងឆ្នាំ២០១៨នេះ ក៏មានដែរសម្រាប់គណបក្សសង្គ្រោះជាតិ។ តែទោះបីជាយ៉ាងណាក៏ដោយចុះ លោកកឹម សុខា បានគូសបញ្ជាក់ពីជំហរបស់គណបក្សប្រឆាំងសម្រាប់ការបោះឆ្នោតនោះថា គណបក្សសង្ក្រោះជាតិ គឺយកគោលនយោបាយមកប្រកួត តែអត់យកកម្លាំងបាយមកប្រកួតនោះទេ ព្រោះថា គណបក្សនេះមិនបានយកខ្មែរណាមកធ្វើជាសត្រូវនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ