CNRP មិនទាន់កំណត់ពេលធ្វើបាតុកម្ម តែសមត្ថកិច្ចជាង១ពាន់នាក់ត្រូវបានដាក់ពង្រាយនៅថ្ងៃនេះ
សមត្ថកិច្ចក្រុងភ្នំពេញ ដែលត្រូវបានគេអះអាងថា មានគ្នាជាង១ពាន់នាក់ ត្រូវបានគេប្រទះឃើញមានការដាក់ពង្រាយនៅតាមច្រកចេញចូលទីក្រុងភ្នំពេញ និងតំបន់សំខាន់ៗជាច្រើនទៀតនៅព្រឹកថ្ងៃទី ១៤មិថុនានេះ។ ការដាក់ពង្រាយកងកម្លាំងដ៏សន្ធឹកបែបនេះ ត្រូវបានគេអះអាងថា គឺដើម្បីត្រៀមទប់ទល់នឹងបាតុកម្មរបស់គណបក្សសង្រ្គោះជាតិ។ ប៉ុន្តែមន្រ្តីជាន់ខ្ពស់គណបក្សប្រឆាំងបានចេញមកអះអាងថា គណបក្សនេះ នៅមិនទាន់កំណត់ពេលធ្វើបាតុកម្មនៅឡើយទេ ហើយការជួបជុំគ្នានៅថ្ងៃនេះ គឺដើម្បីគាំទ្រជំហររបស់លោក កឹម សុខា ប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
គឺចាប់តាំងពីយប់ថ្ងៃចន្ទ ឈានចូលព្រឹកថ្ងៃ អង្គារ ទី ១៤មិថុនានេះ គេបានប្រទះឃើញសមត្ថកិច្ចក្រុងភ្នំពេញ ដែលប្រដាប់ដោយខែល និងដំបង និងកាំភ្លើងគ្រាប់បែកផ្សែងផង ត្រូវបានដាក់ពង្រាយ នៅតាមច្រកចេញចូលសំខាន់ៗមកកាន់រាជធានីភ្នំពេញ ជាពិសេស គឺនៅក្បែរទីស្នាក់ការកណ្តាលគណបក្សសង្រ្គោះជាតិ ស្ថិតនៅសង្កាត់ចាក់អង្រែលើ រាជធានីភ្នំពេញ។
សេចក្តីរាយការណ៍នានាបានឲ្យដឹងថា សមត្ថកិច្ចជាង ១ពាន់នាក់នេះ ត្រូវបានគេដាក់ពង្រាយ គឺដើម្បីត្រៀមទប់ទល់នឹងក្រុមអ្នកគាំទ្រគណបក្សសង្រ្គោះជាតិ ដែលបានធ្វើដំណើរមកកាន់ទីក្រុងភ្នំពេញនៅថ្ងៃនេះ ដោយបារម្ភថា ពួកគេអាចនឹងជួបជុំគ្នា ដើម្បីធ្វើបាតុកម្ម ប្រឆាំងនឹងការចាប់ខ្លួនលោក កឹម សុខា។ ប៉ុន្តែមន្រ្តីជាន់ខ្ពស់គណបក្សប្រឆាំង លោក អេង ឆៃអ៊ាង និងលោក ប៉ុល ហំម បានចេញមកប្រកាសនៅព្រឹកថ្ងៃទី ១៤នេះថា គណបក្សនៅមិនទាន់កំណត់ពេលធ្វើបាតុកម្មនៅឡើយទេ ហើយបើគណបក្សនេះធ្វើបាតុកម្មមែន នោះគណបក្សនឹងមិនលាក់លៀមនោះទេ ពោលគឺ នឹងជូនដំណឹងទៅដល់អាជ្ញាធរឲ្យបានដឹងភ្លាម។
គួរជម្រាបជូនថា នៅព្រឹកថ្ងៃអង្គារនេះ ក្រុមអ្នកគាំទ្រគណបក្សសង្រ្គោះជាតិ រាប់រយនាក់ ដែលត្រូវបានគេអះអាងថា មកពី ២៥រាជធានី-ខេត្ត បានឡើងមកកាន់ទីស្នាក់ការកណ្តាលគណបក្សសង្រ្គោះជាតិ ដើម្បីដាក់ញត្តិ និងគាំទ្រលោក កឹម សុខា។ លោក អេង ឆៃអ៊ាង មន្រ្តីជាន់ខ្ពស់គណបក្សសង្រ្គោះជាតិ បានថ្លែងថា ការជួបជុំរបស់ក្រុមអ្នកគាំទ្រនៅថ្ងៃនេះ មិនមែនជាការធ្វើបាតុកម្មទេ តែគឺដើម្បីឃ្លាំមើលចំណាត់ការរបស់តុលាការក្រុងភ្នំពេញ លើករណីរបស់លោក កឹម សុខា តែប៉ុណ្ណោះ។
សូមបញ្ជាក់ថា លោក កឹម សុខា ប្រធានស្តីទីគណបក្សសង្រ្គោះជាតិ ត្រូវបានតុលាការក្រុងភ្នំពេញកោះហៅឲ្យចូលខ្លួនទៅបំភ្លឺនៅថ្ងៃទី ១៤មិថុនានេះ ពីមូលហេតុនៃការមិនចូលខ្លួនទៅបំភ្លឺតាមដីកាកោះហៅចំនួន ២លើករួចមកហើយ នៅក្នុងសំណុំរឿងសញ្ចាកម្មរបស់កញ្ញា ខុម ចាន់តារ៉ាទី ហៅស្រីមុំ។ ហើយនេះ ក៏ជាលើកទី៣ដែរ ដែលលោក កឹម សុខា មិនបានទៅបំភ្លឺ ដោយអះអាងថា លោកនៅមានអភ័យឯកសិទ្ធសភានៅឡើយ។
ក្រុមអ្នកគាំទ្រគណបក្សសង្រ្គោះជាតិ ត្រូវបានសំណូមពរឲ្យបន្តជួបជុំគ្នារហូតដល់ល្ងាចថ្ងៃនេះ ដើម្បីបន្តតាមដានការវិវត្តន៍នៃស្ថានការណ៍នយោបាយនៅកម្ពុជា។
យ៉ាងណាក៏ដោយ លោកនាយករដ្ឋមន្រ្តី ហ៊ុន សែន កាលពីថ្ងៃចន្ទម្សិលមិញ បានព្រមានហើយថា នឹងមិនអត់ឱនឲ្យឡើយ ចំពោះបាតុកម្មរបស់គណបក្សសង្រ្គោះជាតិ។ ចំណែក លោក អេង ឆៃអ៊ាង នៅតែមានសង្ឃឹមថា វិបត្តិនយោបាយនៅកម្ពុជា នឹងអាចបញ្ចប់ទៅបាន តាមរយៈការជជែកគ្នា ហើយថាគណបក្សទាំងពីរនឹងមិនប្រើកម្លាំងសមត្ថកិច្ច និងកម្លាំងប្រជាជន ដើម្បីប្រឈមមុខដាក់គ្នានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ