គណបក្សប្រឆាំងរំពឹងដណ្តើមបានអាសនៈមេឃុំចៅសង្កាត់ជាង៥០ភាគរយនៅឆ្នាំ២០១៧
គណបក្សសង្រ្គោះជាតិបានត្រៀមជ្រើសរើសបេក្ខជនជាង៣ម៉ឺននាក់សម្រាប់ការបោះឆ្នោតក្រុមប្រឹក្សាឃុំសង្កាត់នៅថ្ងៃទី៤ មិថុនា ឆ្នាំ២០១៧ខាងមុខនេះ ខណៈដែលគណបក្សកាន់អំណាចក៏ត្រៀមបោះឆ្នោតជ្រើសរើសបេក្ខជនរបស់ខ្លួននៅខែមករាខាងមុខនេះ។ ជាការកត់សំគាល់ ការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧នេះ គឺជាការបោះឆ្នោតដ៏សំខាន់មួយ បន្ទាប់ពីមានរបត់នយោបាយនៅក្នុងការបោះឆ្នោតជាតិកាលពីឆ្នាំ២០១៣ ដែលគណបក្សប្រឆាំងរំពឹងថា នឹងឈានទៅគ្រប់គ្រងឃុំសង្កាត់ជាងពាក់កណ្តាលនៅទូទាំងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
គណបក្សប្រឆាំងដែលធ្វើឲ្យមានការប្រែប្រួលសម្រាប់ការបោះឆ្នោតជាតិកាលពីឆ្នាំ២០១៣ រំពឹងថា នឹងធ្វើឲ្យមានការប្រែប្រួលថែមទៀត តាមរយៈការបោះឆ្នោតឃុំសង្កាត់ឆ្នាំ២០១៧ខាងមុខ ដោយរំពឹងថា នឹងដណ្តើមបានអាសនៈមេឃុំចៅសង្កាត់ជាង៥០ភាគរយនៅទូទាំងប្រទេស។
លោក យឹម សុវណ្ណ អ្នកនាំពាក្យគណបក្សសង្រ្គោះជាតិ បានផ្អែកលើលទ្ធផលនៃការបោះឆ្នោតជាតិកាលពីខែកក្កដាឆ្នាំ២០១៣ថាគណបក្សនេះនឹងឈ្នះបានកៅអីមេឃុំចៅសង្កាត់ភាគច្រើន។ ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា បានបញ្ជាក់ដែរថា គណបក្សកាន់អំណាចរបស់លោកក៏នឹងរក្សាបានចំនួនមេឃុំចៅសង្កាត់ដែលខ្លួនកំពុងគ្រប់គ្រងបច្ចុប្បន្នជាង៧០ទៅ៨០ភាគរយនេះដែរ។ លោក សុខ ឥសាន បានបញ្ជាក់ថា លទ្ធផលនៃការបោះឆ្នោតជាតិ នឹងមិនមានឥទ្ធិពលមកលើការបោះឆ្នោតថ្នាក់មូលដ្ឋាននោះទេ។ ផ្ទុយទៅវិញ លទ្ធផលនៃការបោះឆ្នោតនៅថ្នាក់មូលដ្ឋានទេ ដែលមានឥទ្ធិលទៅលើការបោះឆ្នោតថ្នាក់ជាតិ។
គួរជំរាបជូនថា នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិថ្មីនៅថ្ងៃទី៤មិថុនា ឆ្នាំ២០១៧ខាងមុខ ទាំងគណបក្សប្រឆាំងនឹងគណបក្សកាន់អំណាច បានត្រៀមសម្រិតសម្រាំងបេក្ខជនរបស់ខ្លួនរួចហើយ។ សម្រាប់គណបក្សសង្គ្រោះជាតិ នឹងចាប់ផ្ដើមទទួលពាក្យបេក្ខជនទូទាំងប្រទេស ចាប់ពីថ្ងៃទី១ដល់ថ្ងៃទី១៥ខែធ្នូខាងមុខ ដោយជ្រើសរើសបេក្ខជនទាំងពេញសិទ្ធិនិងបំរុងជាង៣ម៉ឺននាក់។ ចំណែកគណបក្សប្រជាជនកម្ពុជាវិញ គ្រោងនឹងប្រមូលឈ្មោះបេក្ខជនរបស់ខ្លួន នៅខែមករាឆ្នាំ២០១៧ តាមរយៈមហាសន្និបាតថ្នាក់មូលដ្ឋានរយៈពេល១៥ទៅ៣០ថ្ងៃ នៅតាមសាខាបក្សឃុំសង្កាត់ នៅទូទាំងប្រទេសចាប់ពីខែមករាឆ្នាំ២០១៧ខាងមុខនេះតទៅ។
លោក គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោតនៅកម្ពុជាហៅកាត់ថា ខុមហ្រ្វែល ដែលត្រៀមដាក់អ្នកសង្កេតការឲ្យបានជាង១ម៉ឺននាក់នៅថ្ងៃបោះឆ្នោតនោះបានលើកឡើងថា គេមិនទាន់មានការសិក្សាឬការស្ទង់មតិណាមួយបញ្ជាក់ថា តើគណបក្សណាមួយនឹងទទួលបានអាសនៈមេឃុំចៅសង្កាត់ច្រើនពីការបោះឆ្នោតឃុំសង្កាត់នៅថ្ងៃទី៤មិថុនាឆ្នាំ២០១៧នៅឡើយទេ។ ក៏ប៉ុន្តែថា តាមប្រវត្តិនៃការបោះឆ្នោតឃុំសង្កាត់នៅកម្ពុជា តាំងពីឆ្នាំ១៩៩៨មក បើគណបក្សនយោបាយណាមួយទទួលបានការគាំទ្រនៅថ្នាក់ជាតិ នោះការបោះឆ្នោតឃុំសង្កាត់ក៏នឹងទទួលបានការគាំទ្រច្រើនដែរ។
សូមបញ្ជាក់ថា នៅក្នុងការបោះឆ្នោតជាតិកាលពីខែកក្កដាឆ្នាំ២០១៣កន្លងទៅ គណបក្សប្រជាជនកម្ពុជា បានបាត់បង់អាសនៈរដ្ឋសភាដល់ទៅ២២កៅអី ទៅខាងគណបក្សសង្រ្គោះជាតិ ដែលជាគណបក្សប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ