CNRPរៀបចំវេទិកានយោបាយបីដងក្នុងមួយសប្ដាហ៍ជំនួសឲ្យការធ្វើសន្និសីទកាសែត
គណបក្សសង្គ្រោះជាតិបានប្រកាសនៅថ្ងៃចន្ទនេះថា ខ្លួនមានផែនការថ្មីដោយនឹងរៀបចំវេទិកានយោបាយបីដងក្នុងមួយសប្ដាហ៍ជំនួសឲ្យការធ្វើសន្និសីទកាសែតប្រចាំថ្ងៃរបស់បក្ស។ វេទិកានយោបាយនេះ នឹងជជែកទៅលើបញ្ហាបីចំណុចរួមមានប្រព័ន្ធយុត្តិធម៌ និងសិទ្ធិសេរីភាពរបស់ពលរដ្ឋ នយោបាយវិមជ្ឈកាល និងដំណើរបោះឆ្នោត។
ចុះផ្សាយនៅថ្ងៃ៖
ស្តាប់ - ០១:២៧
ផ្ដើមពីថ្ងៃចន្ទនេះតទៅ ចាប់ពីវេលាម៉ោង៨ដល់ម៉ោង១១ ព្រឹក គណបក្សសង្គ្រោះជាតិរៀបចំវេទិកានយោបាយស្ដីពីប្រព័ន្ធយុត្តិធម៌និងសិទ្ធិសេរីភាពពលរដ្ឋ។ ហើយរៀងរាល់ថ្ងៃពុធនឹងពិភាក្សាលើនយោបាយវិមជ្ឈកាល។ និងថ្ងៃសុក្រគណបក្សនេះនឹងពិភាក្សាទៅលើដំណើរការបោះឆ្នោត។
ថ្លែងនៅក្នុងសន្និសីទកាសែតនៅព្រឹកថ្ងៃចន្ទនេះ លោក អេង ឆៃអ៊ាង បានគូសបញ្ជាក់ថា វេទិកានយោបាយរបស់គណបក្សសង្គ្រោះជាតិនឹងប្រារព្ធរៀងរាល់បីដងក្នុងមួយសប្ដាហ៍នៅទីស្នាក់របស់បក្សស្ថិតនៅសង្កាត់ចាក់អង្រែលើ។ ហើយនឹងការបើកទូលាយឲ្យពលរដ្ឋចូលរួមពិភាក្សាដោយមានវាគ្មិនសម្របសម្រួលគឺតំណាងរាស្ត្រគណបក្សសង្គ្រោះជាតិនិងអ្នកច្បាប់។
សូមបញ្ជាក់ថា វេទិកានយោបាយថ្មីរបស់គណបក្សសង្គ្រោះជាតិធ្វើឡើងជំនួសឲ្យការរៀបចំសន្និសីទកាសែតប្រចាំថ្ងៃរបស់បក្សស្ដីពីស្ថានការណ៍វិវត្តន៍នយោបាយកម្ពុជា។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានប្រាប់កាសែតក្នុងស្រុកថាការសម្រេចផ្អាកនូវសន្និសីទសារព័ត៌មានប្រចាំថ្ងៃដែលធ្វើឡើងពីរដងក្នុងមួយសប្ដាហ៍នេះ ដើម្បីឲ្យអ្នកតំណាងរាស្ត្រយកពេលទៅចុះជួបជាមួយប្រជាពលរដ្ឋតាមមូលដ្ឋាននិងជំរុញឲ្យពលរដ្ឋចុះឈ្មោះបោះឆ្នោត។
ដោយឡែក គណបក្សសង្គ្រោះជាតិនៅក្នុងសប្ដាហ៍នេះបានប្រកាសរៀបចំសិក្ខាសាលាស្ដីពីច្បាប់សញ្ជាតិនិងច្បាប់អន្តោប្រវេសន៍។ ជាសិក្ខាធ្វើឡើងបន្ទាប់ពីមន្ត្រីគណៈកម្មាធិការជាតិរៀបចំការបោះឆ្នោត គ ជ ប លើកឡើងថា ជនណាក៏ដោយក៏មានសិទ្ធិចុះឈ្មោះបោះឆ្នោតបានដែរឲ្យតែមានអត្តសញ្ញាណបណ្ណខ្មែរ ទោះបីមិនចេះភាសាខ្មែរក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ