គណបក្សប្រឆាំងស្នើសុំចរចាបញ្ហានយោបាយជាមួយគណបក្សកាន់អំណាច
លោកឡេង ប៉េងឡុង អ្នកនាំពាក្យរដ្ឋសភា បានថ្លែងបញ្ជាក់ប្រាប់វិទ្យុបារាំងអន្តរជាតិថា តំណាងគណបក្សសង្រ្គោះជាតិ នៅព្រឹកមិញនេះ បានស្នើផ្ទាល់មាត់មកកាន់លោក ដើម្បីសុំជួបចរចាជាមួយគណបក្សប្រជាជនកម្ពុជា។ គិតត្រឹមព្រឹកនេះ លោកឡេង ប៉េងឡុង មិនទាន់បានទាក់ទងទៅខាងគណបក្សប្រជាជនកម្ពុជានៅឡើយទេ តែលោកបញ្ជាក់ថា នឹងទាក់ទងនៅថ្ងៃពុធនេះតែម្តង។
ចុះផ្សាយនៅថ្ងៃ៖
ស្តាប់ - ០១:៥៨
លោកយឹម សុវណ្ណ អ្នកនាំពាក្យគណបក្សសង្រ្គោះជាតិ បានបញ្ជាក់ខ្លីប្រាប់វិទ្យុបារាំងអន្តរជាតិនៅថ្ងៃនេះថា របៀបវារៈដែលគណបក្សប្រឆាំងចង់លើកទៅជជែកជាមួយគណបក្សប្រជាជនកម្ពុជានោះ គឺការស្វែងរកដំណោះស្រាយនយោបាយ។ យ៉ាងណាក៏ដោយ អ្នកនាំពាក្យរូបនេះ មិនព្រមអត្ថាធិប្បាយលម្អិតនោះទេជុំវិញរបៀបវារៈដ៏ក្តៅគគុកនេះ។
គណបក្សប្រជាជនកម្ពុជានៅមិនទាន់ទទួលបានដំណឹងនេះជាផ្លូវការនៅឡើយទេពីអ្នកនាំពាក្យរដ្ឋសភាជាតិលោកឡេង ប៉េងឡុង។ ក៏ប៉ុន្តែលោកសុខ ឥសាន ដែលជាអ្នកនាំពាក្យគណបក្សកាន់អំណាច បានអះអាងជាមុនហើយថា បើគណបក្សសង្រ្គោះជាតិលើកយកបញ្ហានយោបាយមកនិយាយជាមួយគណបក្សប្រជាជនកម្ពុជានោះ គឺការជួបគ្នារវាងគណបក្សទាំងពីរនឹងមិនអាចកើតឡើងទេ។ នេះក៏ព្រោះថា គណបក្សកាន់អំណាចមិនបានទទួលស្គាល់ឡើយ ថាបច្ចុប្បន្នកម្ពុជាកំពុងមានវិបត្តិនយោបាយនោះ។ បន្ថែមលើនេះ លោកសុខ ឥសាន ក៏បានសង្កត់ធ្ងន់ផងដែរថា ការស្នើសុំដោះលែងអ្នកទោស ឫរំលោភលើសាលក្រមតុលាការ ក៏មិនអាចនិយាយចរចាគ្នាបានដែររវាងគណបក្សជាប់ឆ្នោតទាំងពីរ ព្រោះថា វាស្ថិតនៅក្រៅក្របខណ្ឌនៃវប្បធម៌សន្ទានា។
ជាការកត់សម្គាល់ ការសម្រេចចង់ប្រើប្រាស់វប្បធម៌សន្ទនាឡើងវិញជាមួយគណបក្សប្រជាជនកម្ពុជាពីសំណាក់គណបក្សសង្រ្គោះជាតិនៅពេលនេះ គឺធ្វើឡើងចំពេលដែលគណបក្សទាំងពីរកំពុងតែមើលមុខមិនចំ បន្ទាប់ពីមានការចាប់ខ្លួនតំណាងរាស្រ្តកំពុងមានអភ័យឯកសិទ្ធិរបស់គណបក្សប្រឆាំងជាបន្តបន្ទាប់។ ហើយអ្វីដែលធ្ងន់ធ្ងរជាងនេះទៀតនោះ គឺការគ្រោងនឹងចាប់ខ្លួនលោកកឹម សុខា ដែលជាប្រធានស្តីទីគណបក្សសង្រ្គោះជាតិទៅតាមអ្វីដែលជាការចោទប្រកាន់របស់តុលាការខ្មែរ។ ការណ៍នេះ ធ្វើលោកកឹម សុខា ត្រូវសំងំលាក់ខ្លួននៅក្នុងទីស្នាក់ការកណ្តាលគណបក្សអស់រយៈពេល១៤ថ្ងៃហើយគិតត្រឹមពេលនេះ ដោយមាការចាំឃ្លាំមើលពីអ្នកគាំទ្រជាច្រើននាក់នៅមុខទីស្នាក់ការគណបក្សផង។
គិតត្រឹមថ្ងៃនេះ អាជ្ញាធររដ្ឋាភិបាលមិនបានចាប់ខ្លួនលោកកឹម សុខា នៅឡើយទេ បន្ទាប់ពីគណបក្សសង្រ្គោះជាតិបានព្រមានទុកជាមុនហើយថា គណបក្សនឹងធ្វើបាតុកម្មទ្រង់ទ្រាយធំតែម្តង បើអាជ្ញាធរហ៊ានចាប់ខ្លួនលោកកឹម សុខា នោះ។ ថ្វីបើបាតុកម្មជាជម្រើសចុងក្រោយ ប៉ុន្តែគណបក្សប្រឆាំងកាលពីថ្ងៃចន្ទ ដើមសប្តាហ៍នេះបានសម្រេច ថានឹងបន្តប្រើប្រាស់យន្តការដែលគណបក្សមាន ដើម្បីធ្វើការតស៊ូមតិដោយអហិង្សារហូតដល់មានដំណោះស្រាយដែលអាចនាំឲ្យស្ថានការនយោបាយវិលទៅរកភាពប្រក្រតីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ