សង្គមស៊ីវិលមួយក្រុម ពិគ្រោះយោបល់ មុនពេលចុះហត្ថលេខាលើក្របខណ្ឌអភិវឌ្ឍន៍ស្ត្រីក្រោយឆ្នាំ២០១៥
ក្រុមសង្គមស៊ីវិល ប្រមាណជា ៥០អង្គការ ដែលធ្វើការលើផ្នែកយេនឌ័រ នៅថ្ងៃអង្គារ ទី ២៨កក្កដានេះ បានជួបជុំគ្នា នៅសណ្ឋាគារសាន់វេ ក្រុងភ្នំពេញ ដើម្បីពិគ្រោះយោបល់ជុំវិញផែនការសកម្មភាពទីក្រុងប៉េកាំង បូក ២០ និងគោលការណ៍អភិវឌ្ឍន៍ក្រោយឆ្នាំ ២០១៥។ សង្គមស៊ីវិល លើកឡើងថា ការពិគ្រោះយោបល់នេះ មានសារៈសំខាន់ក្នុងការលើកកម្ពស់ស្ត្រី និងផ្តល់ឲ្យមានការអភិវឌ្ឍមួយ ដែលមិនប៉ះពាល់ដល់អ្នកជំនាន់ក្រោយ ជាពិសេសគឺស្ត្រី និងកុមារី។
ចុះផ្សាយនៅថ្ងៃ៖
ស្តាប់ - ០១:៤៩
ផែនការសកម្មភាពទីក្រុងប៉េកាំង គឺជាផែនការអភិវឌ្ឍស្ត្រី ដែលមានប្រទេសចំនួន ១៦០បានចូលរួម។ នេះគឺជាការបញ្ជាក់របស់លោកស្រីធីតា ឃឹះ នាយិកាអង្គកាសីលកា នៅក្នុងសិក្ខាសាលា នាថ្ងៃទី ២៨កក្កដានេះ។ លោកស្រីធីតា ឃឹះ បានបញ្ជាក់ថា សិក្ខាសាលានៅថ្ងៃនេះ គឺជាការពិគ្រោះយោបល់ ដើម្បីលើកយកគោលដៅសំខាន់ៗ ក្នុងចំណោមគោលដៅចំនួន ១៧ចំនុច មុនពេលមានការចុះហត្ថលេខាលើក្របខណ្ឌអភិវឌ្ឍន៍ ក្នុងប្រទេស នៅខែកញ្ញា ឆ្នាំ២០១៥នេះ។
តាមលោកស្រីធីតា ឃឹះ បន្ទាប់ពីមានការចុះហត្ថលេខាលើផែនការអភិវឌ្ឍនេះហើយ នោះកម្ពុជាក៏នឹងរៀបចំសម្រេចយកសន្ទុះសម្រាប់ការអភិវឌ្ឍសមភាពយេនឌ័រ នៅអំឡុងខែកុម្ភៈ ឬមីនា ឆ្នាំ ២០១៦ផងដែរ។ ចំពោះកិច្ចពិគ្រោះយោបល់វិញ សង្គមស៊ីវិល ចង់ឲ្យមានការអភិវឌ្ឍដែលមានចីរភាព សម្រាប់ស្ត្រី ដែលរួមមានការចែកចាយដែលប្រកបដោយយុត្តិធម៌ រួមមានយុត្តិធម៌សេដ្ឋកិច្ច យុត្តិធម៌បរិស្ថាន និងគណនេយ្យភាពទៅប្រជាពលរដ្ឋ។
ឆ្លងកាត់តាមការពិគ្រោះយោបល់នោះ អ្វីដែលទិសដៅ ដែលសង្គមស៊ីវិលត្រូវការចំពោះសមភាពយេនឌ័រ គឺត្រូវបញ្ចប់រាល់ទម្រង់នៃការរើសអើង ប្រឆាំងទៅនឹងស្ត្រី និងកុមារី នៅគ្រប់ទីកន្លែង។ ត្រូវលុបបំបាត់គ្រប់ទម្រង់ហិង្សាក្នុងទីសាធារណៈ និងក្នុងគ្រួសារ។ លុបបំបាត់ការអនុវត្តដែលមានគ្រោះថ្នាក់ ដូចជាការបង្ខំឲ្យរៀបការ និងការកាត់ប្រដាប់ភេទកុមារជាដើម។ លើសពីនេះ សង្គមត្រូវតែឲ្យតម្លៃលើសមភាពយេនឌ័រ ហើយបង្កឲ្យមានការចូលរួមពីស្ត្រីឲ្យបានច្រើន ដើម្បីទទួលបាននូវសេវាសង្គមគ្រប់យ៉ាង។
លោកស្រីធីតា ឃឹះ បានឲ្យដឹងថា ទោះបីជាសង្គមកម្ពុជាមើលទៅមានការអភិវឌ្ឍមែន ប៉ុន្តែចំពោះសមភាពយេនឌ័ររវាងស្ត្រី និងបុរស ពីថ្នាក់លើ ដល់ថ្នាក់ក្រោម គឺមានត្រឹម ១៥ភាគរយប៉ុណ្ណោះ។ ស្ត្រីក្នុងប្រទេសកម្ពុជា នៅតែប្រឈមមុខជាមួយនឹងវប្បធម៌បុរាណ ដែលតែងចាត់ទុកថាស្ត្រី ត្រូវតែទន់ខ្សោយជាងបុរស ឬស្ត្រីត្រូវតែធ្វើការងារផ្ទះទាំងអស់ជាដើម។ នេះជាផ្នត់គំនិត ដែលលោកស្រីនាយិកាអង្គការសីលការូបនេះ បញ្ជាក់ថា ជារឿងដែលនៅតែកំពុងពិបាកដោះស្រាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ