លោកជាម យៀប ការពារអាជ្ញាធរអប្សរានិងស្តីបន្ទោសលោក សុន ឆ័យ
លោកជាម យៀប ប្រធានគណៈកម្មការទី២រដ្ឋសភាទទួលបន្ទុកហិរញ្ញវត្ថុបានការពារអាជ្ញាធរអប្សរាហើយបានស្តីបន្ទោសសហការីរបស់ខ្លួនគឺលោក សុន ឆ័យ មកពីបក្សប្រឆាំងថានិយាយបំភ្លើសការពិតទាក់ទងនឹងចំណូលចំណាយក្នុងរមណីយដ្ឋានអង្គរ។ ទំនាស់រវាងប្រធាននិងអនុប្រធានគណៈកម្មការទី២រដ្ឋសភាបានកើតឡើងបន្ទាប់ពីលោក សុន ឆ័យ បរិហារអំពីការបាត់បង់ចំណូលយ៉ាងច្រើនដែលបានមកពីការលក់សំបុត្រចូលរមណីយដ្ឋានអង្គរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ថ្លែងក្នុងសន្និសីទកាសែតនៅព្រឹកថ្ងៃពុធទី៣១ធ្នូនេះនៅឯមន្ទីររដ្ឋសភា លោក ជាម យៀប បានការពារអាជ្ញាធរជាតិអប្សរាថាបានធ្វើការងារយ៉ាងល្អទាក់ទងនឹងចំណូលចំណាយនិងការគ្រប់គ្រងរមណីយដ្ឋានអង្គរ។ ប្រធានគណៈកម្មការទី២នៃរដ្ឋសភាទទួលបន្ទុកហិរញ្ញវត្ថុនិងធនាគារបានស្តីបន្ទោសអនុប្រធានរបស់ខ្លួនគឺលោក សុន ឆ័យ មកពីបក្សប្រឆាំងថាបាននិយាយបំភ្លើសការពិត។
សេចក្តីថ្លែងការណ៍បែបនេះបានកើតឡើងបន្ទាប់ពីលោក សុន ឆ័យ បានចោទអាជ្ញាធរអប្សរាថាបានធ្វើឲ្យបាត់បង់ចំណូលយ៉ាងច្រើនដែលបានមកពីការលក់ប័ណ្ណចូលទស្សនារមណីយដ្ឋានអង្គរ។ បើតាមលោក សុន ឆ័យ ចំណូលដែលបានមកពីរការលក់សំបុត្រចូលមណីយដ្ឋានអង្គរគឺមិនតិចជាង ១៥០ លានដុល្លារទេក្នុងមួយឆ្នាំ។ ប៉ុន្តែ អាជ្ញាធរអប្សរាបានអះអាងថា ចំណូលនេះមានត្រឹមតែជាង ៤៧ លានដុល្លារប៉ុណ្ណោះសម្រាប់រយៈពេល១០ខែដើមឆ្នាំ ២០១៤។
សូមបញ្ជាក់ថា កាលពីថ្ងៃទី ២២ធ្នូ គណៈកម្មការទី២របស់រដ្ឋសភា បានចុះស្វែងយល់អំពីប្រតិបត្តិការចំណូលចំណាយរបស់ អាជ្ញាធរអប្សរា។ ក្រោយការស្វែងយល់នោះក៏ លោក សុន ឆ័យ ដែលធ្លាប់បានលើកឡើងអំពីការបាត់បង់ចំណូលសន្ធឹកសន្ធាប់ដែលបានមកពីរមណីយដ្ឋានអង្គរនោះក៏បានលើកបញ្ហានេះជាថ្មីម្តងទៀត។
ប៉ុន្តែ អាជ្ញាធរអប្សរាបានពន្យល់ជាលាយលក្ខណ៍អក្សរកាលពីថ្ងៃទី២៤ធ្នូថា ទេសចរបរទេសទាំងអស់ដែលមកកម្ពុជាមិនមែនសុទ្ធតែចូលទស្សនាតំបន់អង្គរនោះឡើយ។ ជាក់ស្តែងមានតែទេសចរចំនួនជាង១លាន៦សែននាក់ប៉ុណ្ណោះដែលបានទិញសំបុត្រចូលរមណីយដ្ឋានអង្គរក្នុងរយៈពេល១០ខែដំបូងនៃឆ្នាំ ២០១៤។
លោក សុន ឆ័យ មិនអាចទាក់ទងសុំការឆ្លើយតបបានទេនៅថ្ងៃនេះ ប៉ុន្តែ លោកធ្លាប់បានបញ្ជាក់ប្រាប់បណ្តាញផ្សាយព័ត៌មានថា តួលេខដែលអាជ្ញាធរអប្សរាបានបង្ហាញគ្មានមូលដ្ឋានច្បាស់លាស់ហើយលោកនឹងស្វែងរកភស្តុតាងបន្ថែមទៀតដើម្បីបង្ហាញថាពិតជាមានការបាត់ចំណូលយ៉ាងច្រើនពីការលក់សំបុត្រចូលទស្សនារមណីយដ្ឋានអង្គរមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ