លោក ជា សុផារ៉ា ស្នើសុំនាយករដ្ឋមន្រ្តីឱ្យក្រសួង៤ផ្សេងទៀតជួយចូលរួមទប់ស្កាត់ការដ្ឋានសំណង់ខុសច្បាប់
លោកជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និង សំណង់ កាលពីថ្ងៃព្រហស្បតិ៍ម្សិលមិញនេះ បានដាក់សំណើមួយទៅលោកនាយករដ្ឋមន្រ្តីហ៊ុន សែន ដោយស្នើសុំគោលការណ៍សម្រេចលើវិធានការចាំបាច់សំដៅទប់ស្កាត់ការដ្ឋានសំណង់ខុសច្បាប់ ដើម្បីធានាអាយុជីវិតមនុស្ស ទ្រព្យសម្បត្តិ សុវត្ថិភាព និងគុណភាពសំណង់ទូទាំងប្រទេសកម្ពុជា។ បើតាមលោកជា សុផារ៉ានេះ ដើម្បីឲ្យការងារនេះសម្រេចទៅបាន លោកចង់ឱ្យក្រសួងពាក់ព័ន្ធចំនួន៤ផ្សេងទៀតចូលរួមជាមួយក្រសួងដែនដីផងដែរ។
ចុះផ្សាយនៅថ្ងៃ៖
វិធានការចាំបាច់របស់លោកជា សុផារ៉ា ដើម្បីទប់ស្កាត់សំណង់ខុសច្បាប់នៅទូទាំងប្រទេសកម្ពុជា គឺមាន៥ចំណុច។ ទី១ គឺលោកស្នើឱ្យក្រសួងរ៉ែ និង ថាមពល ចាត់វិធានការមិនឱ្យមានការផ្គត់ផ្គង់ថាមពលអគ្គិសនីដល់ការដ្ឋានសំណង់ដែលគ្មានលិខិតអនុញ្ញាត ឬ សាងសង់ខុសលក្ខណៈបច្ចេកទេស។ ចំណុចទី២ ក្រសួងឧស្សាហកម្ម និង សិប្បកម្ម ចាត់វិធានការមិនឱ្យមានការផ្គត់ផ្គង់ទឹកស្អាតដល់ការដ្ឋានសំណង់ ហើយទី៣ ក្រសួងសារធាណការ និង ដឹកជញ្ជូន មិនត្រូវអនុញ្ញាតឱ្យតភ្ជាប់លូចូលបណ្តាញលូសាធារណៈ។ ចំណែក ចំណុចទី៤ គឺលោកជា សុផារ៉ា ស្នើឱ្យក្រសួង ស្ថាប័ន និង អង្គភាពមានសមត្ថកិច្ច មិនត្រូវផ្តល់លិខិតអនុញ្ញាតឱ្យប្រកបអាជីវកម្ម និង ចំណុទី៥ លោកចង់ឱ្យមានការចូលរួមពីក្រសួងព័ត៌មាន និង អង្គភាពមានសមត្ថកិច្ច ដោយមិនត្រូវអនុញ្ញាតឱ្យផ្សព្វផ្សាយពាណិជ្ជកម្ម។
បើតាមលោកជា សុផារ៉ា ការដាក់ចេញនូវវិធានការទាំង៥នេះ គឺចាំបាច់ខ្លាំងណាស់ដើម្បីការពារអាយុជីវិត និងទ្រព្យសម្បត្តិរបស់ប្រជាពលរដ្ឋ ធានាសុវត្ថិភាព និង គុណភាពសំណង់នៅទូទាំងប្រទេសកម្ពុជា និងធានាការអភិវឌ្ឍប្រទេសជាតិប្រកបដោយចីរភាព។ ប៉ុន្តែ ការស្នើសុំគោលការណ៍របស់រដ្ឋមន្រ្តីក្រសួងដែនដីនេះនៅមិនទាន់មានការសម្រេចយ៉ាងណានៅឡើយទេ ពីសំណាក់លោកនាយករដ្ឋមន្រ្តីហ៊ុន សែន។
សូមកត់សម្គាល់ថា ការចេញនូវវិធានការថ្មីរបស់ក្រសួងដែនដីនៅពេលនេះ ធ្វើឡើងបន្ទាប់ពីមានហេតុការណ៍បាក់រលំសំណង់អគារខុសច្បាប់កម្ពស់៧ជាន់នៅក្នុងខេត្តព្រះសីហនុ បណ្តាលឱ្យមានមនុស្ស២៨នាក់ស្លាប់ និង ២៦នាក់ផ្សេងទៀតរងរបួស។ ក្រោយមានហេតុការណ៍នេះ ក្រសួងដែនដីបានរៀបចំឱ្យមានគណៈកម្មការចំនួន៨ ចុះត្រួតពិនិត្យគុណភាពនិងលក្ខណៈបច្ចេកទេសនៃសំណង់ទាំងអស់ដែលកំពុងសាងសង់នៅលើទឹកដីនៃខេត្តព្រះសីហនុ។ ជាលទ្ធផល ក្រសួងដែនដីបានរកឃើញការដ្ឋានសំណង់ចំនួន៥នៅក្នុងខេត្តនេះ កំពុងសាងសង់ដោយមិនមានច្បាប់អនុញ្ញាត។
ក្រៅតែពីនៅក្នុងខេត្តព្រះសីហនុ នៅរាជធានីភ្នំពេញឯណេះវិញ អាជ្ញាធរក៏បានចាប់ផ្តើមរឹតបន្តឹងលើការត្រួតពិនិត្យការសាងសង់សំណង់អគារដោយខុសច្បាប់នេះផងដែរ។ អភិបាលក្រុងភ្នំពេញថែមទាំងបានព្រមានចាត់វិធានការតាមផ្លូវច្បាប់លើអភិបាលខណ្ឌណា ដែលអនុញ្ញាតឱ្យមានការសាងសង់ដោយមិនមានច្បាប់អនុញ្ញាតនៅក្នុងដែនសមត្ថកិច្ចរបស់ខ្លួនថែមទៀតផង។ ជាក់ស្តែង អាជ្ញាធរបានរកឃើញនូវសំណង់អគារមួយកន្លែងដែលកំពុងសាងសង់ដោយគ្មានច្បាប់អនុញ្ញាតនៅក្នុងសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។ អាជ្ញាធរក៏បានផ្អាកដំណើរការសាងសង់សំណង់អាគារនោះសិន ដើម្បីត្រួតពិនិត្យឱ្យបានត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ