តុលាការឲ្យមេធាវីសហជីពដែលប្ដឹងលោក ជា មុនី ចូលបំភ្លឺនៅថ្ងៃ៩មករា
សាលាដំបូងរាជធានីភ្នំពេញ បានកោះហៅមេធាវីក្រុមសហជីពដែលប្ដឹង លោកជា មុនី អតីតប្រធានសហជីពសេរីកម្មករពីបទញុះញង់ ចូលបំភ្លឺនៅថ្ងៃទី៩ខែមករា ។ ជាការកត់សម្គាល់ ចំណាត់ការរបស់តុលាការ នាពេលនេះត្រូវបានគេរិះគន់ថា ធ្វើឡើងលឿនជាងការដោះស្រាយរឿងរ៉ាវសង្គមផ្សេងទៀត។
ចុះផ្សាយនៅថ្ងៃ៖
ស្តាប់ - ០១:៣២
ពាក្យបណ្ដឹងដាក់ទៅកាន់តុលាការមិនដល់មួយសប្ដាហ៍ផង ស្រាប់តែនៅថ្ងៃទី២២ ខែធ្នូ ឆ្នាំនេះ ព្រះរាជអាជ្ញារង នៃតំណាងអយ្យការអមសាលាដំបូង រាជធានីភ្នំពេញ បានចេញលិខិតកោះអញ្ជើញ លោក កេតុ សុវណ្ណឌី និង លោក ដារ៉ា សុបញ្ញា មេធាវីរបស់ក្រុមសហជីពធំៗឱ្យចូលបំភ្លឺនៅព្រឹកថ្ងៃទី០៩ ខែមករា ឆ្នាំ២០១៨ ដើម្បីសាកសួរអំពីដំណើររឿងប្តឹង លោក ជា មុនី អតីតប្រធានសហជីពសេរីកម្មករពីបទញុះញង់។
គួររម្លឹកថា បើតាមខ្លឹមសារនៃពាក្យបណ្តឹងរបស់ ក្រុមមេដឹកនាំសហភាពនិងសហព័ន្ធសហជីពទាំង១២០ស្ថាប័នដែលបានដាក់ទៅតុលាការ កាលពីថ្ងៃទី ១៨ ធ្នូដោយបានចាត់ទុកបទសម្ភាសន៍របស់លោក ជា មុនី សមាជិកក្រុមប្រឹក្សាឃ្លាំមើលកម្ពុជា មានខ្លឹមសារអំពាវនាវឲ្យសហគមន៍អឺរ៉ុបដាក់ទណ្ឌកម្មមកលើរដ្ឋាភិបាលស្របច្បាប់កម្ពុជាឲ្យកាន់តែលឿនកាន់តែល្អ។ក្នុងនោះពួកគេបានប្ដឹងទាមទារប្រាក់១លានដុល្លារ។
គិតមកដល់ថ្ងៃទី២២ខែធ្នូនេះ លោក ជា មុនី នៅតែមិនអាចទាក់ទងបានតាមទូរសព្ទ។ តែសម្រាប់លោក រ៉ុង ឈុន ដែលជាមនុស្សជិតស្និទ្ធជាមួយលោក ជា មុនី មើលឃើញថា ចំណាត់ការរបស់តុលាការធ្វើឡើងលឿនមែនទែន ដែលភាពលឿនរហ័សនេះ ត្រូវបានលោក រ៉ុង ឈុន ចាត់ទុកថា នាំឲ្យមានការរិះគន់ពីមតិជាតិ អន្តរជាតិ ដែលអាជ្ញាធរប្រើប្រាស់ប្រព័ន្ធតុលាការរឹតបណ្តឹងសេរីភាពបញ្ចេញមតិ។ បើតាមលោក រ៉ុង ឈុន នៅតែបន្តអះអាងថា អ្វីដែលលោក ជា មុនី បានលើកឡើងតាមរយៈបទសម្ភាសន៍នោះ គឺគ្រាន់តែជាការបញ្ចេញមតិប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ