ប័ណ្ណសមធម៌ ឬហៅសាមញ្ញថា ប័ណ្ណក្រីក្រ គឺជាក្រដាសមួយសន្លឹកសម្រាប់បញ្ជាក់អត្តសញ្ញាណក្រុមគ្រួសារក្រីក្រ។ ប័ណ្ណនេះ អាចអនុញ្ញាតឲ្យពលរដ្ឋព្យាបាលជំងឺដោយឥតគិតថ្លៃ ឬអាចឲ្យមន្ទីរពេទ្យបន្ធូរបន្ថយតម្លៃសេវា។ ក៏ប៉ុន្តែនៅតាមនិគមជនបទ មានប្រជាពលរដ្ឋក្រីក្រមួយចំនួន អស់ជំនឿលើប័ណ្ណក្រីក្រនេះហើយ។ ពួកគេអះអាងថា នៅពេលដែលយកប័ណ្ណក្រីក្រទៅបង្ហាញគ្រូពេទ្យ គឺបុគ្គលិកសុខាភិបាល មិនសូវស្ទុះស្ទា យកចិត្តទុកដាក់មើលថែពួកគេឡើយ ហើយពលរដ្ឋទាំងនោះ គិតថា ប័ណ្ណនេះ គ្មានប្រសិទ្ធភាពទៀតទេ។
