ដៃគូក្រុមហ៊ុនកាពីតូល អាងប្រព័ន្ធតុលាការ ខណៈសង្គមស៊ីវិល ៥០ប្រកាសពហិការ
រឿងរ៉ាវវិវាទរវាងក្រុមហ៊ុនកាពីតូល និងសហជីពការងារដែលការពារអតីតអ្នកបើកបរឡានក្រុងឲ្យក្រុមហ៊ុននេះ នៅមិនទាន់ត្រជាក់នៅឡើយទេ។ នៅថ្ងៃទី ២៣កុម្ភៈ ក្រុមសង្គមស៊ីវិលចំនួន ៥០ បានចេញសេចក្តីថ្លែងការណ៍រួម និងអំពាវនាវឲ្យសាធារណជន ពហិការមិនប្រើប្រាស់សេវាកម្មរបស់ក្រុមហ៊ុនកាពីតូលដឹកអ្នកដំណើរ និងសមាគមអ្នករត់រ៉ឺម៉ក់កង់បី ដែលបានជួយក្រុមហ៊ុន បង្កកូដកម្មហិង្សា កាលពីថ្ងៃទី ៦កុម្ភៈកន្លងទៅ។ ពហិការនេះ ដោយសង្គមស៊ីវិល អះអាងថាក្រុមហ៊ុន និងសមាគមនេះ មិនគោរពច្បាប់ការងារ ហើយថែមទាំងបង្កហិង្សាឃោរឃៅ ធ្វើឲ្យមានមនុស្សរបួសជាច្រើននាក់។ ប៉ុន្តែសម្រាប់សមាគមន៍រួមគ្នាអភិវឌ្ឍន៍កម្ពុជា របស់ក្រុមអ្នករត់រ៉ឺម៉ក់កង់បី ដែលជាដៃគូរបស់ក្រុមហ៊ុនកាពីតូល បានហៅសេចក្តីថ្លែងការណ៍រួមរបស់សង្គមស៊ីវិល ថាធ្វើឡើងដោយខុសច្បាប់ ហើយប្តេជ្ញាថាបើសង្គមស៊ីវិលទាំងនោះ មិនកែប្រែសកម្មភាពនេះទេ ពួកគេនឹងផ្ទុះកំហឹងតបតតាមផ្លូវច្បាប់ ព្រមទាំងស្នើឲ្យម្ចាស់ជំនួយ ពិចារណាពីប្រាក់ជំនួយសម្រាប់ជួយ ដល់អង្គការសង្គមស៊ីវិលទាំងនោះទៀតផង។
ចុះផ្សាយនៅថ្ងៃ៖
ស្តាប់ - ០២:៣៤
ក្រោយមានកូដកម្មហិង្សា កាលពីថ្ងៃទី ៦កុម្ភៈ នៅមុខក្រុមហ៊ុនកាពីតូល ក្នុងរាជធានីភ្នំពេញ សង្គមស៊ីវិលចំនួន៥០ បានចេញសេចក្តីថ្លែងការណ៍រួមមួយ ប្រកាសគាំទ្រពហិការចំពោះក្រុមហ៊ុនដឹកអ្នកដំណើរកាពីតូល និងសមាគមអ្នករត់រ៉ឺម៉កកង់បី ព្រមទាំងអំពាវនាវឲ្យសាធារណជនចូលរួមពហិការជាមួយខ្លួនដែរ។ ពហិការ ប្រើប្រាស់សេវាកម្មរបស់ក្រុមហ៊ុននេះ ត្រូវបានក្រុមសង្គមស៊ីវិល អះអាងថា ដោយសារតែក្រុមហ៊ុន មិនបានគោរពតាមច្បាប់ការងារ ដោយបណ្តេញនិយោជិត៤៥នាក់របស់ខ្លួនចេញ ដោយគ្រាន់តែពួកគេចង់បង្កើតសហជីព។
លើសពីនេះ ក្រុមហ៊ុននេះ ថែមទាំងសហការជាមួយនឹងក្រុមអ្នករត់រ៉ឺម៉កកង់បី បង្កហិង្សាដោយចេតនា ក្នុងពេលអតីតអ្នកបើកបរឡានក្រុង ដែលត្រូវក្រុមហ៊ុនបញ្ឈប់ កំពុងធ្វើកូដកម្ម។ សកម្មភាពហិង្សា ដែលកាលណោះ បានបណ្តាលឲ្យមានមនុស្សជិត២០នាក់រងរបួស ព្រមទាំងមានសមាជិកសហជីពការងារកម្ពុជា ២នាក់ ត្រូវបានចាប់ខ្លួន។ តាមសង្គមស៊ីវិល លុះណាតែក្រុមហ៊ុនកាពីតូល ព្រមទម្លាក់បទចោទប្រឆាំងនឹងអ្នកតវ៉ា និងទទួលយកអតីតអ្នកបើកបរឡានក្រុងទាំងនោះចូលធ្វើការវិញ ព្រមទាំងចាប់ខ្លួនជនដៃដល់ដែលប្រព្រឹត្តិហិង្សាមកផ្តន្ទទោស ទើបពួកគេព្រមបញ្ឈប់ពហិការនេះ។
ប៉ុន្តែសម្រាប់សមាគមន៍រួមគ្នាដើម្បីអភិវឌ្ឍន៍កម្ពុជារបស់ក្រុមអ្នករត់រ៉ឺម៉កកង់បី ហៅកាត់ថា CCDA បានប្រតិកម្ម ដោយហៅសេចក្តីថ្លែងការណ៍រួមនេះ ថាជាទង្វើមិនស្របច្បាប់ ដោយយករឿងបុគ្គល ទៅដាក់សម្ពាធ លើក្រុមហ៊ុន និងសមាគមទាំងមូល។ លោកឯ សុភាស់ ប្រធានសមាគម CCDA បានសម្តែងការសោកស្តាយ ហើយស្នើឲ្យសង្គមស៊ីវិលទាំងនោះ កែប្រែសកម្មភាពនេះជាបន្ទាន់ បើពុំដូច្នោះទេ គេនឹងផ្ទុះកំហឹងតបតវិញ តាមរយៈការដាក់លិខិតប្តឹង ទៅតាមនីតិវិធីតុលាការ ដើម្បីចាប់ឃុំឃាំងអ្នកបង្កការញុះញង់។ ជាមួយគ្នានេះ លោកឯ សុភាស់ ក៏បញ្ជាក់ថា សមាគមលោក ក៏នឹងដាក់លិខិតស្នើសុំអន្តាគមន៍ពីក្រសួងមហាផ្ទៃ ក្រសួងការងារ និងក្រសួងការបរទេស ដើម្បីចាត់វិធានការណ៍លើសង្គមស៊ីវិលទាំងនោះផងដែរ។
ចំណែក លោកអាត់ ធន់ ប្រធានសហជីពការងារកម្ពុជា គ្មានសង្ឃឹមពីចំណាត់ការតាមនីតិវិធីតុលាការនោះទេ ដោយលោក ហ៊ាននិយាយថា ក្រុមហ៊ុនកាពីតូល មានអ្នកកាងក្នុងប្រព័ន្ធតុលាការ នៅពីក្រោយខ្នង។ យ៉ាងណាក៏ដោយ លោកអាត់ ធន់ រួមជាមួយនឹងសមាគម និងសង្គមស៊ីវិលផ្សេងទៀត នៅតែ ប្រឹងប្រែងដោះស្រាយបញ្ហាដល់អតីតអ្នកបើកឡានក្រុងក្រុមហ៊ុនកាពីតូលទាំង ៤៥នាក់ ដោយបន្តជជែកពីដំណោះស្រាយ ជាមួយអង្កការអន្តរជាតិខាងការងារ និងការធ្វើពហិការ ព្រមទាំង ផ្ញើលិខិតសុំអន្តរាគមន៍ពីក្រសួងការងារ ។
បើតាមលោកហេង សួរ អ្នកនាំពាក្យក្រសួងការងារ សំណុំរឿងនេះ ត្រូវបានក្រសួងដោះស្រាយរួចរាល់ហើយ ប៉ុន្តែបើភាគីទាំងពីរ នៅមិនទាន់ឯកភាព នោះមានតែការបន្តទៅតាមនីតិវិធីតុលាការប៉ុណ្ណោះ។ សូមបញ្ជាក់ថា កន្លងមក ក្រុមប្រឹក្សាអាជ្ញាកណ្តាលរបស់ក្រសួងការងារ បានចេញសេចក្តីសម្រេច តំរូវឲ្យក្រុមហ៊ុនកាពីតូល ផ្តល់សំណងដល់និយោជិតដែលខ្លួនបានបញ្ឈប់ ហើយក៏ឲ្យក្រុមនិយោជិតនោះទទួលយកការបញ្ឈប់របស់ក្រុមហ៊ុនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ