កិច្ចប្រជុំព្រំដែនកម្ពុជា និងវៀតណាមនៅថ្ងៃនេះ គ្មានលទ្ធផល
គណៈកម្មការព្រំដែនកម្ពុជានិងវៀតណាមនៅថ្ងៃអង្គារទី០៧ កក្កដាបានជួបប្រជុំគ្នានៅទីស្តីការគណៈរដ្ឋមន្ត្រី។ កិច្ចប្រជុំដែលមានគ្នាប្រមាណ២៥នាក់នោះ ធ្វើឡើងបន្ទាប់ពីកម្ពុជានិងវៀតណាមមានភាពតានតឹងនៅតាមព្រំដែនមិនធ្លាប់មាន។ កិច្ចប្រជុំនេះ នៅមិនទាន់មានលទ្ធផលនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
កិច្ចប្រជុំគណៈកម្មការព្រំដែនកម្ពុជានិងវៀតណាមនៅព្រឹកថ្ងៃអង្គារនេះមិនទាន់សម្រេចអ្វីនៅឡើយទេ។ នេះជាការបញ្ជាក់ពីលោក វ៉ាគឹម ហុង ប្រធានគណៈកម្មការព្រំដែនកម្ពុជា។ លោកវ៉ា គឹមហុង ដែលជាសហប្រធាននៃកិច្ចប្រជុំនេះ មិនបានផ្តល់ព័ត៌មានអ្វីបន្ថែមពីកិច្ចប្រជុំជាង៣ម៉ោងនេះនៅឡើយទេ។ កិច្ចប្រជុំរវាងកម្ពុជាវៀតណាមនៅភ្នំពេញនេះ ជាកិច្ចប្រជុំដើម្បីដោះស្រាយបាតុភាពនៅព្រំដែន និងការបែងចែកខណ្ឌសីមាព្រំដែនគោកប្រទេសទាំងពីរក្រោយស្ថានភាពតានតឹងមិនធ្លាប់មាន។កិច្ចប្រជុំបិទទ្វារយៈពេល៣ម៉ោងនៅទីក្រុងភ្នំពេញនេះ គឺមានសមាសភាព២៥រូប។
វៀតណាមដឹកនាំដោយ លោក Ho Xuanson អនុរដ្ឋមន្ត្រីការបរទេសវៀតណាម ទទួលបន្ទុកកិច្ចការព្រំដែនជាមួយកម្ពុជា។ ដោយឡែកភាគីកម្ពុជា គឺដឹកនាំដោយវ៉ា គឹមហុង ប្រធានកិច្ចការព្រំដែនកម្ពុជា។ កិច្ចប្រជុំដែលធ្វើឡើងរយៈពេលបីថ្ងៃនៅភ្នំពេញចាប់ពីថ្ងៃទី៧ដល់ថ្ងៃទី៩កក្កដា មានរបៀបវារៈពីរសំខាន់គឺ ការដោះស្រាយបាតុភាពហិង្សានៅព្រំដែនខេត្តស្វាយរៀង និងការបែងចែកខណ្ឌសីមាព្រំដែនគោកដែលនៅសេសសល់ប្រមាណជា២០%បន្ថែមទៀត។ នេះបើតាមការបញ្ជាក់ពីអនុប្រធានកិច្ចការព្រំដែនកម្ពុជា លោកស្រី កុយ ពិសីដែលបានប្រាប់វិទ្យុបារាំងមុនកិច្ចប្រជុំ។
សូមរំលឹកថា កម្ពុជានិងវៀតណាមបានកើនភាពតានតឹងនៅតាមព្រំដែនមិនធ្លាប់មានក្នុងរយៈពេលចុងក្រោយនេះ បន្ទាប់ពីពលរដ្ឋប្រទេសទាំងពីរបានប៉ះទង្គិចហិង្សានៅតាមព្រំដែន និងកំណត់ទូតតវ៉ាប្រឆាំងនឹងសកម្មភាពវៀតណាមនៅតាមព្រំដែនជាបន្តបន្ទាប់។ ប្រធានគណៈកម្មការព្រំដែនកម្ពុជា លោកវ៉ា គឹមហុង ធ្លាប់បានសារភាពថា ការចរចាជាមួយប្រទេសវៀតណាម គឺមានភាពតឹងតែង។ តឹងតែក៏ព្រោះតែវៀតណាមប្រកាន់ជំហររឹងមិនសូវសម្របសម្រួលជាមួយភាគីកម្ពុជានោះទេ។
សូមរំលឹកបន្ថែមថាដែរថា កម្ពុជា និងវៀតណាម បានសម្រេចបង្កើតក្រុមការងារចម្រុះដើម្បីស៊ើបអង្កេតដោះស្រាយបញ្ហាបាតុភាពហិង្សានៅព្រំដែនកាលពីថ្ងៃទី២៨ មិថុនា ដែលបានបណ្តាលឱ្យប្រជាជនប្រទេសទាំងពីរជិត២០នាក់បានរងរបួស។ អ្នកនាំពាក្យក្រសួងការបរទសកម្ពុជា លោក ជុំ សន្ទរី នៅមិនទាន់អាចបញ្ជាក់ពីសមាសភាពនៃក្រុមការងារចម្រុះរវាងប្រទេសទាំងពីរនោះទេ។ ភាគីវៀតណាម បានរិះគន់យ៉ាងខ្លាំងលើសកម្មភាពហិង្សានេះ។ ទោះបីជាកិច្ចប្រជុំរវាងកម្ពុជា-វៀតណាមនៅថ្ងៃទី១នេះ មិនមានលទ្ធផលមែន ប៉ុន្តែកិច្ចប្រជុំដែលធ្វើឡើងបីថ្ងៃនៅកម្ពុជានេះ នឹងអាចកាត់បន្ថយភាពតានតឹងរឿងព្រំដែនរវាងប្រទេសក្បែខាងទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ