កម្ពុជាស្នើអាមេរិក បញ្ជូលលក្ខខណ្ឌ២ចំណុច ក្នុងកិច្ចព្រមព្រៀងស្ដីពីការបញ្ជូនពលរដ្ឋខ្មែរត្រឡប់មកវិញ
មន្ត្រីជំនាញរបស់កម្ពុជា និងអាមេរិកកំពុងតែចរចាជាមួយគ្នា ក្នុងការធ្វើវិសោធកម្មលើកិច្ចព្រមព្រៀង ស្ដីពីការវិលត្រឡប់មកប្រទេសកំណើតវិញរបស់ពលរដ្ឋអាមេរិកកាំងដើមកំណើតខ្មែរ។ តាមរយៈការចរចានេះ កម្ពុជាស្នើអាមេរិកបញ្ជូលលក្ខខណ្ឌ២ចំណុចក្នុងកិច្ចព្រមព្រៀងនេះ ដែលបានចុះហត្ថលេខារួមគ្នាកាលពីឆ្នាំ២០០២។ លក្ខខណ្ឌ២ចំណុចនោះគឺ ការវិលត្រឡប់មកវិញរបស់ពលរដ្ឋខ្មែរធ្វើទៅបានអាស្រ័យលើការស្ម័គ្រចិត្តមិនមែនចាប់បង្ខំ និងការផ្ដល់សិទ្ធិឲ្យពួកគេធ្វើដំណើរទៅសួរសុខទុក្ខគ្រួសារនៅអាមេរិកវិញបាន។
ចុះផ្សាយនៅថ្ងៃ៖
ស្តាប់ - ០២:១១
លោក ផៃ ស៊ីផាន អ្នកនាំពាក្យទីស្ដីគណៈរដ្ឋមន្ត្រីបានគូសបញ្ជាក់ប្រាប់វិទ្យុបារាំងថា កិច្ចព្រមព្រៀងចាស់ដែលបានចុះហត្ថលេខារួមគ្នារវាងអាមេរិក និងកម្ពុជាមិនបានបញ្ជូលលក្ខខណ្ឌ២ចំណុចនេះឡើយ។ លក្ខខណ្ឌ២ចំណុចនោះគឺ ការវិលត្រឡប់មកវិញរបស់ពលរដ្ឋខ្មែរធ្វើទៅបានអាស្រ័យការស្ម័គ្រចិត្តមិនមែនចាប់បង្ខំ និងការផ្ដល់សិទ្ធិឲ្យពួកគេធ្វើដំណើរទៅសួរសុខទុក្ខគ្រួសារនៅអាមេរិកវិញបាន។
លោក ផៃ ស៊ីផាន យល់ថា ការបណ្ដេញមនុស្សដែលជាប់ពន្ធនាគាររួចហើយ ឲ្យត្រឡប់មកប្រទេសកំណើតវិញ ប្រៀបបាននឹងរបបប៉ុលពតដែលកម្ពុជាធ្លាប់ជួបប្រទះ គឺនាំឲ្យមានការបែកបាក់ពីក្រុមគ្រួសារ។ ដូច្នេះបើតាមលោក ផៃ ស៊ីផាន រដ្ឋាភិបាលមានសិទ្ធិការពារពលរដ្ឋខ្លួនឲ្យស្របតាមរដ្ឋធម្មនុញ្ញ។ រដ្ឋធម្មនុញ្ញតម្រូវឲ្យរដ្ឋាភិបាលការពារពលរដ្ឋខ្លួនឯងដែលរស់នៅក្រៅប្រទេស។ ដោយយោងទៅលើរដ្ឋធម្មនុញ្ញនេះ ទើបរដ្ឋាភិបាល ស្នើធ្វើវិសោធកម្មលើកិច្ចព្រមព្រៀង ស្ដីពីការវិលត្រឡប់មកប្រទេសកំណើតវិញរបស់ពលរដ្ឋអាមេរិកកាំងដើមកំណើតខ្មែរ។ ចុងក្រោយប្រសិនបើកិច្ចចរចាបរាជ័យរដ្ឋាភិបាលនៅតែបង្ហាញជំហរសហការជាមួយអាមេរិកទទួលយកពលរដ្ឋខ្មែរត្រឡប់មកវិញ។
សូមបញ្ជាក់ថា កិច្ចចចាររវាងអាមេរិក និងកម្ពុជាកំពុងតែធ្វើនៅពេលនេះ បន្ទាប់ពីប្រមុខរដ្ឋាភិបាលលោក ហ៊ុន សែន បានស្នើសុំសហរដ្ឋអាមេរិក ធ្វើវិសោធនកម្មលើកិច្ចព្រមព្រៀងដែលបានចុះហត្ថលេខារួមគ្នាកាលឆ្នាំ២០០២។ បើតាម លោក ហ៊ុន សែន ពលរដ្ឋខ្មែររស់នៅអាមេរិក ដែលមានទោសកំហុស ហើយបានទទួលទោស ទៅតាមច្បាប់អាមេរិករួចរាល់ គួរតែទទួលពួកគេឲ្យស្នាក់បន្តទៀត ដើម្បីជួបជុំក្រុមគ្រួសារ ខណៈដែលរួមរស់ជាមួយគ្នា អស់រយៈពេលជាច្រើនឆ្នាំ កន្លងមក។
បើតាមគម្រោង ពលរដ្ឋខ្មែរ៣៦នាក់ ត្រូវបានរដ្ឋាភិបាលអាមេរិក នឹងបញ្ជូនមកប្រទេសកំណើតវិញ ក្នុងពេលឆាប់ៗ ខណៈមានពលរដ្ឋខ្មែរ៥នាក់ បានមកដល់កម្ពុជា កាលពីថ្ងៃទី២៩មីនា។ តាមរបាយការណ៍ របស់អគ្គនាយកដ្ឋាន អន្តោប្រវេសន៍ ប្រចាំឆ្នាំ២០១៦ មានពលរដ្ឋខ្មែរ ធ្វើមាតុភូមិនិវត្តន៍ពីអាមេរិក ចំនួន២៥លើក មានចំនួន៤១នាក់ ។ គិតត្រឹមឆ្នាំ២០១៧ ពលរដ្ឋខ្មែរនៅអាមេរិក ដែលបានធ្វើមាតុភូមិនិវត្តន៍ មានចំនួន ២២៦លើក ក្នុងនោះមានពលរដ្ឋ ៥៤៤នាក់ ស្រី១៤នាក់ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ