កម្ពុជា៖ ថៃត្រូវមានកាតព្វកិច្ចផ្តល់សុវត្ថិភាពដល់នាយករដ្ឋមន្ត្រីខ្មែរ
រដ្ឋមន្ត្រីក្រសួងការពារជាតិថៃលោក ប្រាវីត វុងស៊ូវុន បានថ្លែងប្រាប់អ្នកកាសែតថា លោកកំពុងពិភាក្សាអំពីការបន្ថែមកំលាំងសន្តិសុខដើម្បីធានាសុវត្ថិភាពក្នុងពេលប្រជុំកំពូលគណៈកម្មការទន្លេមេគង្គនៅថ្ងៃទី៤-៥ខែមេសាក្រោយនេះ។ អ្នកនាំពាក្យក្រសួងការបរទេសកម្ពុជាលោក កុយ គួង ថ្លែងថា ថៃត្រូវមានកាតព្វកិច្ចផ្តល់សុវត្ថិភាពដល់លោកនាយករដ្ឋមន្ត្រីហ៊ុន សែន។
ចុះផ្សាយនៅថ្ងៃ៖ កែប្រែថ្ងៃទី៖
អ្នកនាំពាក្យក្រសួងការបរទេសកម្ពុជាបានថ្លែងអោយដឹងនៅថ្ងៃទី២៦មិនានេះថា អាជ្ញាធរថៃត្រូវមានកាតព្វកិច្ចការពារសុវត្ថិភាពដល់លោកនាយករដ្ឋមន្ត្រីហ៊ុន សែន នៅពេលដែលលោកនាយករដ្ឋមន្ត្រីទៅចូលរួមកិច្ចប្រជុំកំពូលគណៈកម្មការទន្លេមេគង្គនៅប្រទេសថៃនៅចុងសប្តាហ៍ក្រោយនេះ។ សេចក្តីថ្លែងរបស់អ្នកនាំពាក្យក្រសួងការបរទេសខ្មែរលោក កុយ គួង យ៉ាងនេះ ធ្វើឡើងក្រោយពេលដែលលោករដ្ឋមន្ត្រីការពារជាតិថៃ ប្រាវីត វុងស៊ូវុន កំពុងពិចារណាអំពីវិធានការពង្រឹងសន្តិសុខនៅហួហ៊ីន ជាទីកន្លែងដែលរដ្ឋាភិបាលថៃគ្រោងរៀបចំកិច្ចប្រជុំកំពូលគណៈកម្មការទន្លេមេគង្គនៅថ្ងៃទី៤ ដល់ទី៥ខែមេសា។ ទន្ទឹមគ្នានេះ រដ្ឋមន្ត្រីការពារជាតិថៃ ថែមទាំងបានអំពាវនាវមិនអោយក្រុមបាតុករអាវក្រហមមកឆាឆៅដល់ទីកន្លែងប្រជុំគណៈកម្មការទន្លេមេគង្គទៀតផង។
លោក កុយ គួង បានអត្ថាធិប្បាយថា លើសពីកាតព្វកិច្ចរបស់ថៃ នៅពេលដែលរដ្ឋមន្ត្រីការពារជាតិថៃប្រកាសរឹតបន្តឹងសន្តិសុខយ៉ាងដូច្នេះ វាក៏ជាការបង្ហាញឆន្ទៈ និងបំណងល្អរបស់អាជ្ញាធរថៃថែមទៀតដែរ។
សម្រាប់អ្នកនាំពាក្យក្រសួងការពារជាតិកម្ពុជាលោកឧត្តមសេនីយឯក ឈុំ សុជាតិវិញ បើទោះជាថៃមានឆន្ទៈល្អយ៉ាងនេះមែនក្តី ប៉ុន្តែដោយសារពេលវេលានៃកិច្ចប្រជុំកំពូលនោះ នៅវែងឆ្ងាយទៀត កម្ពុជានៅរង់ចាំមើលស្ថានភាពជាក់ស្តែងបន្តទៀត។ អ្នកនាំពាក្យក្រសួងការពារជាតិកម្ពុជាបានមានប្រសាសន៍យ៉ាងដូច្នេះ ដោយយោងទៅបទពិសោធន៍ដែលធ្លាប់កើតមានម្តងរួចហើយ ក្នុងពេលដែលប្រទេសថៃរៀបចំកិច្ចប្រជុំកំពូលអាស៊ានកាលពីឆ្នាំមុន។ រដ្ឋាភិបាលថៃបានរៀបចំកិច្ចប្រជុំកំពូលអាស៊ានមិនបានសម្រេចកាលពីខែមេសាឆ្នាំ២០០៩ ដោយសារតែបាតុករអាវក្រហមចូលអុកឡុកកន្លែងប្រជុំ។
ទោះយ៉ាងណាក្តី ក្នុងដំណើរការនៃកិច្ចប្រជុំកំពូលគណៈកម្មការទន្លេមេគង្គនៅចុងសប្តាហ៍ក្រោយនេះ លោកនាយករដ្ឋមន្ត្រីថៃអាប់ភីស៊ីត វេចាជីវ៉ា និងនាយករដ្ឋមន្ត្រីកម្ពុជាលោក ហ៊ុន សែន នឹងជួបគ្នាឡើងវិញ ក្រោយពីកម្រិតទំនាក់ទំនងការទូតនៃប្រទេសទាំងពីរបានធ្លាក់ចុះតាំងពីខែវិច្ឆិកា ហើយបន្ទាប់មកសង្គ្រាមពាក្យសម្តីរវាងប្រមុខរដ្ឋាភិបាលទាំងពីរក៏កាន់តែពុះពោរនោះ។
អាចជាការជួបមុខគ្នាក្នុងក្របខណ្ឌកិច្ចប្រជុំពហុភាគីតែប៉ុណ្ណោះ ប៉ុន្តែថាតើអាចមានជំនួបទ្វេភាគីកម្ពុជាថៃដែរ ឬក៏អត់នោះ លោក កុយ គួងអ្នកនាំពាក្យក្រសួងការបរទេសកម្ពុជា ថ្លែងថា នៅមិនទាន់មានព័ត៌មាននោះនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ