ជិតចូលឆ្នាំ អ្នកភ្នំពេញសម្រុកចេញ ហើយខ្មែរនៅក្រៅស្រុកមកកាន់តែច្រើន
នៅចុងសប្តាហ៍នេះ គេសង្កេតឃើញថា អ្នកស្នាក់នៅក្រុងភ្នំពេញបាននាំគ្នាសម្រុកចាកចេញជាបណ្តើរៗហើយ ទៅកាន់ស្រុកកំណើតតាមបណ្តាខេត្តនានា ដើម្បីជួបជុំគ្រួសារនិងរៀបចំប្រារព្ធពិធីបុណ្យចូលឆ្នាំថ្មី។ តាមស្ថានីយរថយន្តដឹកអ្នកដំណើរ មានមនុស្សកកកុញជាច្រើន ជាមួយនឹងអីវ៉ាន់សំពីងសំពោង។ រថយន្តធុនតូចធំជាច្រើនរយគ្រឿងផ្ទុកមនុស្សនិងរបស់របរពេញៗ និងបានដឹកជញ្ជូនច្រើនជើងជាងមុន។ ទន្ទឹមនឹងនេះ បងប្អូនខ្មែរនិងពលករខ្មែរដែលស្នាក់នៅនិងធ្វើការនៅឯបរទេស ជាច្រើនម៉ឺននាក់ ក៏បានត្រឡប់មកលេងស្រុកកំណើតផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
នៅរាជធានីភ្នំពេញ គេសង្កេតឃើញថា មានអ្នកចាកចេញជាបណ្តើរៗតាំងតែពីថ្ងៃព្រហស្បត៍ឬថ្ងៃសុក្រមកម្ល៉េះ ហើយនៅថ្ងៃសៅរ៍និងថ្ងៃអាទិត្យនេះទៀត រឹតតែមានមនុស្សចេញពីក្រុងរឹតតែច្រើនឡើង។ ខុសពីសព្វមួយដង រថយន្តឈ្នួលដឹកអ្នកដំណើរបានធ្វើសកម្មភាពច្រើនជាងមុន។ លោក ឡុង ឌីម៉ង់ ក៏បានសង្កេតឃើញយ៉ាងដូច្នេះដែរ ហើយអ្នកនាំពាក្យសាលាក្រុងរូបនេះ បានប្រាប់វិទ្យុបារាំងអន្តរជាតិថា សាលារាជធានីភ្នំពេញ បានចាត់មន្ត្រីរៀបចំសណ្តាប់ធ្នាប់គ្រប់ខណ្ឌទាំងអស់ ឲ្យជួយបញ្ជៀសការកកស្ទះចរាចរណ៍ទៀតផង។
នៅឯព្រលានយន្តហោះអន្តរជាតិភ្នំពេញ ដើមខែនេះ មានអណិកជនខ្មែររស់នៅបរទេសជាច្រើនរយនាក់ បានវិលត្រឡប់ចូលមកកម្ពុជាវិញ។ គឺជាមធ្យមប្រមាណជាង១០០នាក់ក្នុងមួយថ្ងៃៗ ដែលមកពីសហរដ្ឋអាមេរិក បារាំង អូស្ត្រាលី និងកាណាកា ជាដើម។ មន្ត្រីរបស់ព្រលានយន្តហោះអន្តរជាតិភ្នំពេញ បានកត់សម្គាល់ដែរថា មានប្រជាជនខ្មែរជិះយន្តហោះមកកម្ពុជាជាច្រើននាក់ តាំងតែពីថ្ងៃទី៥ និង៦មេសាមកម្ល៉េះ ហើយនិងសម្រុកមកកាន់តែថែមទៀតចាប់តាំងពីថ្ងៃទី៧មេសា។ ក្នុងនោះគេឃើញថា មានអណិកខ្មែរដែលរស់នៅសហរដ្ឋអាមេរិក មានចំនួនច្រើនជាងគេ។
ចំណែកនៅព្រំដែនកម្ពុជា-ថៃវិញ ពលករខ្មែររាប់ម៉ឺននាក់ក្នុងមួយថ្ងៃៗ បានត្រឡប់ចូលមាតុភូមិវិញ តាមច្រកប៉ោយប៉ែត។ លោក ហេង សួរ អ្នកនាំពាក្យក្រសួងការងារ បានប្រាប់វិទ្យុបារាំងថា ពលករខ្មែរដែលធ្វើការនៅរោងចក្រសហគ្រាសក្នុងប្រទេសថៃ បានឈប់សម្រាកនិងចូលមកលេងស្រុកខ្មែរ រាប់ម៉ឺននាក់ពីមួយថ្ងៃទៅមួយថ្ងៃ។ លោកបានបញ្ជាក់ថា ពលករខ្មែរនៅកូរ៉េខាងត្បួងនិងម៉ាឡេស៊ី ជាដើម មិនសូវត្រឡប់មកប៉ុន្មានទេ។ លោក ហេង សួរ ឲ្យដឹងថា តំណាងក្រសួងការងារបានសហការជាមួយសហគមន៍ខ្មែរ ដើម្បីរៀបចំពិធីបុណ្យចូលឆ្នាំថ្មីប្រពៃណីជាតិ ចំនួន៦កន្លែងផ្សេងគ្នា នៅប្រទេសកូរ៉េខាងត្បួង។
ទោះយ៉ាងណាក្តី គេក៏សង្កេតឃើញដែរថា ក្នុងឱកាសបុណ្យចូលឆ្នាំខ្មែរនេះ មានពលរដ្ឋខ្មែរមួយចំនួន ដែលមានជីវភាពធូរធារ បានត្រៀមរៀបចំចេញដំណើរទៅលេងនៅបរទេស តាមរយៈក្រុមហ៊ុនទេសចរណ៍ ឬជាលក្ខណៈគ្រួសារ ឬក៏ឯកជនផ្ទាល់ខ្លួនផងដែរ៕
ដោយ ហេង ឧត្តម
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ