គោលដៅយកមេដាយមាស១០គ្រឿងរបស់កម្ពុជានៅស៊ីហ្គេមលើកទី៣០ ត្រូវបរាជ័យ
ប្រទេសកម្ពុជាទទួលបានមេដាយសរុបចំនួន៤៦ ពីការប្រកួតកីឡាអាស៊ី អាគ្នេយ៍ (Sea Games) លើកទី៣០ នៅប្រទេសហ្វីលីពីនឆ្នាំ២០១៩នេះ និងមានចំណាត់ថ្នាក់ទី៨ ក្នុងចំណោមប្រទេសនៅក្នុងតំបន់ចំនួន១១។ លទ្ធផលរបស់កម្ពុជានៅក្នុងកីឡា ស៊ីហ្គេម ដែលបានបញ្ចប់កាលពីថ្ងៃអង្គារម្សិលមិញ បង្ហាញពីវឌ្ឍនភាព នៃកីឡាកម្ពុជា ក៏ប៉ុន្តែនៅមិនទាន់ជាការពេញចិត្តនោះទេ ដោយកម្ពុជានៅមិនទាន់សម្រេចគោលដៅក្នុងការដណ្តើមមេដាយមាសនៅឡើយ។
ចុះផ្សាយនៅថ្ងៃ៖
ស្តាប់ - ០២:១៤
ក្នុងចំណោមមេដាយចំនួន៤៦ ដែលកីឡាករ កីឡាការិនីកម្ពុជាទទួលបាននៅក្នុងឱកាសនៃការប្រកួតកីឡាស៊ីហ្គេមលើកទី៣០ នៅប្រទេសហ្វីលីពីន ឆ្នាំ២០១៩នេះ មានមេដាយមាសចំនួន៤ ប្រាក់៦ និងសំរិត៣៦។ ដោយឡែកមេដាយមាសចំនួន៤នេះ គឺជាការឈ្នះតាមរយៈវិញ្ញាសារកីឡាគុន Arnis (ក្រុមគុនល្បុក្កតោ) កីឡាប៉េតង់នារី កីឡាតេក្វាន់ដូWTF និងកីឡាជឺជីតស៊ូ ក្រៅពីនេះ កីឡាសក្តានុពលរបស់កម្ពុជាចំនួន៦ប្រភេទទៀត សុទ្ធតែបានឈ្នះមេដាយប្រាក់ និងសំរឹទ្ធ។
ជារួមកម្ពុជាស្ថិតនៅចំណាត់ថ្នាក់លេខ៨ ឈពីលើប្រទេសប៊្រុយណេ ឡាវ និងទីម័រខាងកើត។ ចំណាត់ថ្នាក់របស់កម្ពុជានៅរក្សាដដែលក្នុងចំណោមប្រទេសទាំង១១ ធៀបទៅនឹងស៊ីហ្គេមឆ្នាំ២០១៧ នៅម៉ាឡេស៊ី ដែលកាលណោះកម្ពុជាបានឈ្នះមេដាយចំនួន១៧ប៉ុណ្ណោះ។
តាមរយៈលទ្ធផលនេះ ចំនួនមេដាយដែលកម្ពុជាទទួលបាន មានការប្រែប្រួលច្រើន ក៏ប៉ុន្តែនៅតែមានភាពតឹងតែងក្នុងការដណ្តើមមេដាយមាស ខណៈប្រទេសអាស៊ានពាក់កណ្តាលទៀតតែងទទួលបានមេដាយរាប់រយ។ កីឡាបាល់ទាត់ដែលកម្ពុជាមិនដែលធ្លាប់ឡើងដល់វគ្គពាក់កណ្តាលផ្តាច់ព្រ័ត ត្រូវបានទទួលស្គាល់ថាមានភាពជឿនលឿន បន្ទាប់ពីខកខានអស់រយៈពេល៦០ឆ្នាំ បើទោះណាជាប្រទេសកីឡានេះ កម្ពុជាមិនទទួលបានមេដាយក៏ដោយ។
លោក វ៉ាត់ ចំរើន នាយបេសកកម្មកីឡាស៊ីហ្គេមរបស់កម្ពុជា បានថ្លែងបន្ទាប់ពីបញ្ចប់ស៊ីហ្គេមលើកទី៣០នេះថា ថ្វីដ្បិតតែកម្ពុជាដណ្តើមបានមេដាយច្រើនជាងស៊ីហ្គេមលើកទី២៩ ក៏ពិតមែន ប៉ុន្តែមេដាយមាស៤នេះ គឺមិនទាន់ឆ្លើយតបទៅនឹងមហិច្ឆតារបស់កម្ពុជា ដែលគ្រោងទុកថានឹងដណ្តើមឲ្យបានមេដាយមាស១០គ្រឿងនោះទេ ដោយសាប្រភេទកីឡាសក្តានុពលរបស់កម្ពុជាមួយចំនួនមិនបានទទួលមេដាយមាសឡើយ។
សូមរំលឹកថា ការចូលរួមប្រកួតស៊ីហ្គេមលើកទី៣០ នៅហ្វីលីពីននេះ គឺជាការធ្វើតេស្តលើកទី១ ទៅលើសមត្ថភាព និងលទ្ធភាពរបស់អត្តពលិកកម្ពុជា មុននឹងឈានទៅដល់ឆ្នាំ២០២៣ ដែលកម្ពុជាធ្វើជាម្ចាស់ផ្ទះជាលើកដំបូងរៀបចំកីឡាអាស៊ី អាគ្នេយ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ