កម្ពុជាដាក់ឈ្មោះភ្ញៀវទេសចរបរទេសម្នាក់ទៅក្នុងបញ្ជីខ្មៅ មិនឲ្យចូលទឹកដីកម្ពុជាជារៀងរហូត
អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បានសម្រេចបិទទិដ្ឋាការនិងដាក់ឈ្មោះបុរសជនជាតិអ៊ីរ៉ង់ម្នាក់ ចូលទៅក្នុងបញ្ជីខ្មៅ ដោយហាមឃាត់មិនឲ្យចូលមកទឹកដីកម្ពុជាជារៀងរហូត។ ចំណាត់ការនេះ បានធ្វើឡើងបន្ទាប់ពីភ្ញៀវទេសចរជនជាតិអ៊ីរ៉ង់រូបនេះ បានមកលេងកម្ពុជា ហើយបានបង្ហោះវីដេអូធ្វើឲ្យប៉ះពាល់ដល់កិត្តិយស និងគោលដៅទេសចរណ៍របស់កម្ពុជា។
ចុះផ្សាយនៅថ្ងៃ៖
ស្តាប់ - ០២:១៥
បុរសជនជាតិអ៊ីរ៉ង់រូបនេះ ត្រូវបានគេស្គាល់ឈ្មោះតាមរយៈទំព័រ YouTube ថា «JamesFT» ត្រូវបានអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ឯកភាពតាមសំណើររបស់រដ្ឋមន្ត្រីក្រសួងទេសចរណ៍ ដើម្បីបិទទិដ្ឋាការ និងហាមមិនឲ្យចូលទឹកដីកម្ពុជាជារៀងរហូត។ ចំណាត់ការនេះ បានកើតឡើងក្រោយពីផ្ទុះវីដេអូរិះគន់របស់បុរសជនជាតិអ៊ីរ៉ង់រូបនេះតាមរយៈទំព័រ YouTube និង Facebook ដោយបានរិះគន់ប្រទេសកម្ពុជា និងបានបំភ័យភ្ញៀវទេសចរបរទេសផ្សេងទៀត កុំឲ្យមកទស្សនាកម្ពុជា។
នាយឧត្តមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បានប្រាប់ប្រព័ន្ធផ្សព្វផ្សាយក្នុងស្រុក នៅព្រឹកថ្ងៃទី ១៩ ធ្នូ នេះថា ជនបរទេសរូបនេះ ត្រូវបានដាក់ឈ្មោះនៅក្នុងបញ្ជីខ្មៅនិងហាមឃាត់ចូលមកប្រទេសកម្ពុជា ដោយសារតែរូបគេបានថតវីដេអូនៅកន្លែងមួយចំនួន មកបង្ហោះក្នុងន័យបំភ័យភ្ញៀវទេសចរមិនឲ្យមកលេងកម្ពុជា ដែលធ្វើឲ្យប៉ះពាល់កិតិ្តយស និងគោលដៅទេសចរណ៍កម្ពុជា។ លោកនាយឧត្តមសេនីយ៍បានបន្ថែមថា លោកបានស្រាវជ្រាវ និងស្គាល់អត្តសញ្ញាណរបស់ជនបរទេសរូបនេះហើយ។ បើតាមលោកនាយឧត្តមសេនីយ៍ បុរសជនជាតិអ៊ីរ៉ង់រូបនេះ បានចូលមកប្រទេសកម្ពុជាតែប៉ុន្មានថ្ងៃប៉ុណ្ណោះ ពោលគឺតាំងពីខែកក្កដាមកម៉្លេះ ហើយក៏បានត្រឡប់ទៅវិញតែម្តង។
សូមបញ្ជាក់ថា ក្រៅពីចំណាត់ការខាងលើនេះ ក្រសួងទេសចរណ៍នៃប្រទេសកម្ពុជា ក៏បានបើកកិច្ចប្រជុំមួយជាមួយអគ្គនាយកដ្ឋានអន្តោប្រវេសន៍នៃក្រសួងមហាផ្ទៃនិងក្រុមមេធាវី កាលពីពេលថ្មីៗនេះ ដើម្បីរិះរកវិធីចាត់វិធានការបន្ថែម លើជនបរទេសម្នាក់នេះ។ ប៉ុន្តែនៅចំពោះមុខអាជ្ញាធរកម្ពុជានឹងដាក់ពាក្យបណ្តឹងមួយ ទៅកាន់ក្រុមហ៊ុន Google និងក្រុមហ៊ុន Facebook ដើម្បីស្នើសុំឲ្យក្រុមហ៊ុនទាំងពីរនេះ លុបចោលវិដេអូរបស់ជនបរទេសជាតិអ៊ីរ៉ង់រូបនេះ។
គួររំលឹកជូនថា កាលពីពេលថ្មីៗនេះ បុរសជាភ្ញៀវទេសចរបរទេសម្នាក់ ដែលអះអាងថា ជាជនជាតិអ៊ីរ៉ង់ រស់នៅប្រទេសក្នុងហូឡង់ បានមកទស្សនាកម្ពុជា និងបានថតវីដេអូនៅទីកន្លែងមួយចំនួនរបស់កម្ពុជា បង្ហោះ ក្នុងន័យបំភ័យភ្ញៀវទេសចរមិនឲ្យមកលេងកម្ពុជា ដោយរូបគេក៏បាននិយាយក្នុងវីដេអូនោះ ពាក់ព័ន្ធនឹងកិតិ្តយស និងគោលដៅទេសចរណ៍របស់កម្ពុជា។ បន្ទាប់ពីមានការបង្ហោះវីដេអូនោះមក ប្រតិកម្មចម្រុះបានធ្លាក់មក ទាំងវិស័យឯកជនផ្នែកទេសចរណ៍ មន្ត្រីរដ្ឋាភិបាលកម្ពុជា និងប្រជាពលរដ្ឋកម្ពុជាផងដែរ ដោយបានថ្កោលទោស និងស្នើឲ្យសមត្ថកិច្ចចាត់វិធានការចំពោះជនបរទេសរូបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ