កម្ពុជាស្នើថៃបំភ្លឺករណីបាញ់សម្លាប់ពលរដ្ឋខ្មែរ ២នាក់ក្នុងខែមីនានេះ
ក្រសួងការបរទេសកម្ពុជាបានផ្ញើកំណត់ទូតថ្មីមួយទៀតទៅរដ្ឋាភិបាលថៃ តាមរយៈស្ថានទូតថៃប្រចាំកម្ពុជា ដើម្បីអោយអាជ្ញាធរថៃពន្យល់អំពីមូលហេតុដែលទាហានថៃបាញ់សម្លាប់ពលរដ្ឋខ្មែរ ២នាក់ចុងក្រោយ នៅក្នុងខែមីនានេះ។ អ្នកនាំពាក្យក្រសួងការបរទេសកម្ពុជាលោកកុយ គួងបានបញ្ជាក់ថា កំណត់ទូតត្រូវបានផ្ញើទៅរដ្ឋាភិបាលថៃ កាលពីថ្ងៃទី២២ខែមីនានេះ ហើយភាគីថៃនៅមិនទាន់បានឆ្លើយតបអ្វីឡើយរហូតដល់ពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ក្រសួងការបរទេសកម្ពុជាបានផ្ញើកំណត់ទូតថ្មីមួយទៀតទៅរដ្ឋាភិបាលថៃ កាលពីថ្ងៃទី២២ខែមីនាទាក់ទងព្រឹត្តិការណ៍សម្លាប់ពលរដ្ឋខ្មែរ២នាក់ចុងក្រោយ នៅពាក់កណ្តាលខែមីនានេះ។ អ្នកនាំពាក្យក្រសួងការបរទេសខ្មែរលោកកុយ គួងបានថ្លែងថា កំណត់ទូតរបស់កម្ពុជាបានថ្កោលទោសអំពើបាញ់ប្រហាររបស់ទាហានថៃមកលើពលរដ្ឋ ថាជាអំពើព្រៃផ្សៃ អមនុស្សធម៌ ខុសច្បាប់មនុស្សធម៌អន្តរជាតិ ហើយរដ្ឋាភិបាលកម្ពុជាបានស្នើអោយអាជ្ញាធរថៃបើកការស៊ើបអង្កេត និងនាំជនដៃដល់មកផ្តន្ទាទោស។ ប៉ុន្តែរហូតដល់ពេលនេះ នៅមិនទាន់មានការឆ្លើយតបណាមួយពីភាគីថៃនៅឡើយទេ។
កាលពីថ្ងៃទី១៣ខែមីនា បុរសឈ្មោះឌិន ចេស អ្នកភូមិ នៅខេត្តបន្ទាយមានជ័យត្រូវបានទាហានថៃបាញ់សម្លាប់ នៅចន្លោះបង្គោលព្រំដែនលេខ២៧-២៨។ ទាហានថៃបានចោទប្រកាន់ថា ពលរដ្ឋខ្មែររូបនេះបានចូលទៅកាប់ឈើខុសច្បាប់ក្នុងទឹកដីរបស់គេ។ ប៉ុន្តែយោងតាមការអះអាងរបស់អ្នកស្រុក បុរសម្នាក់នេះ គ្រាន់តែបានជីកឬសឈើធ្វើថ្នាំបុរាណដូចសព្វដងតែប៉ុណ្ណោះ។
២ថ្ងៃក្រោយមក នៅថ្ងៃទី១៥ខែមីនា បុរសម្នាក់ទៀតដែលគេស្គាល់ឈ្មោះថា ម៉ោ សារិទ្ធ អ្នកស្រុកខេត្តបន្ទាយមានជ័យដែរ ត្រូវទាហានថៃបាញ់សម្លាប់នៅម្តុំបង្គោលព្រំដែនលេខ៣៨ជាប់ព្រំដែនខេត្តស្រះកែវរបស់ថៃ។ លោកកុយ គួងបានរៀបរាប់ថា បុរសម្នាក់នេះត្រូវបានអ្នកភូមិអះអាងថា ជាអ្នកជីកឬសឈើដូចគ្នា។ ប៉ុន្តែទាហានថៃបានប្រាប់អោយដឹងថា គេបាញ់បុរសនេះ ដោយសារពេលទាហានហៅអោយឈប់ បុរសម្នាក់នេះមិនបានឈប់។
លោកកុយ គួងបានអត្ថាធិប្បាយថា អំពើបាញ់បោះយ៉ាងដូច្នេះមិនគួរកើតចេញពីអាជ្ញាធរនៃប្រទេសដែលមានអរិយ្យធម៌ខ្ពស់នោះទេ។
កាលពីថ្ងៃទី៣ខែមីនា សមាគមការពារសិទ្ធិមនុស្សអាដហុកបានរៀបចំសន្និសីទកាសែតមួយដើម្បីបង្ហាញសាក្សី និងជនរងគ្រោះនៃការបាញ់ប្រហាររបស់ទាហានថៃកន្លងមក។
យោងតាមរបាយការណ៍របស់សមាគមអាដហុក ក្នុងរយៈពេលជាង២ឆ្នាំកន្លងមកនេះ យ៉ាងហោចណាស់មានអំពើបាញ់សម្លាប់ពលរដ្ឋខ្មែរចំនួន១០ករណី បាត់ខ្លួន ៦ករណី (ក្រោយមកទទួលដំណឹងថាស្លាប់) ករណីបង្ករបួសស្នាម៦ករណី និងករណីធ្វើទារុណកម្ម៥ករណី ពីសំណាក់កងកម្លាំងអាជ្ញាធរថៃ។
បើតាមការបញ្ជាក់របស់លោកកុយ គួង ក្នុងចំនោមកំណត់ទូតទាំងឡាយដែលកម្ពុជាបានផ្ញើទៅរដ្ឋាភិបាលថៃ រដ្ឋាភិបាលថៃបានឆ្លើយតបតែម្តងគត់ ក្នុងករណីដែលអាជ្ញាធរកម្ពុជាចោទទាហានថៃថា បានចងដុតកុមារយន់ រិទ្ធអាយុ១៦ឆ្នាំទាំងរស់ បន្ទាប់ពីបានបាញ់អោយរបួសនោះ។ ពេលនោះក៏ជាការឆ្លើយច្រានចោលការចោទប្រកាន់របស់កម្ពុជាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ