កម្ពុជាស្នើចិនឲ្យបង្កើនការនាំចូលផលិតផលខ្មែរដោយមិនយកពន្ធនិងមិនកំណត់កូតា
លោក នាយករដ្ឋមន្រ្តី ហ៊ុន សែន នៅថ្ងៃទី ១០ កញ្ញា បានស្នើទៅកាន់រដ្ឋាភិបាលចិន ឲ្យពិចារណា នាំចូលផលិតផលពីប្រទេសកម្ពុជា ឲ្យកាន់តែច្រើនបន្ថែមទៀត ដោយមិនមានកូតាកំណត់ចំនួន និង មិនគិតពន្ធ។ សូមបញ្ជាក់ថា ចិនគឺជាទីផ្សារពាណិជ្ជនាំចូលផលិតផលកសិកម្មដ៏ធំជាងគេរបស់ប្រទេសកម្ពុជា និងមានទំហំទឹកប្រាក់ពាណិជ្ជកម្ម ប្រមាណ ៤.៣ ប៊ីលាន ដុល្លារ នៅក្នុងឆ្នាំ ២០១៦ នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ដើម្បីពង្រីកទីផ្សារនាំចូលទៅកាន់ប្រទេសមហាចិន លោកនាយករដ្ឋមន្រ្តី ហ៊ុន សែន នៅក្នុងជំនួបជាមួយ ឧបនាយករដ្ឋមន្រ្តីចិន លោក ចាង កាវលី នៅខេត្តក្វាងស៊ី ប្រទេសចិន បានស្នើសុំចិនឲ្យបន្ថែមការនាំចូលផលិតផល ដោយលើកលែងរបាំងពន្ធនាំចូល និង មិនកំណត់កូតា។ នេះបើតាមទំព័រហ្វេសប៊ុកផ្លូវការរបស់ លោក នាយករដ្ឋមន្រ្តី ហ៊ុន សែន។ លោក ហ៊ុន សែន ក៏បានស្នើឲ្យរដ្ឋមន្រ្តីពាណិជ្ជកម្មនៃប្រទេសទាំងពីរកម្ពុជា-ចិន ធ្វើការពិភាក្សាជាមួយគ្នា ឲ្យបានកាន់តែច្រើនថែមទៀតលើបញ្ហានេះ។
ក្រៅពីនេះ កាលពីពេលសប្តាហ៍មុន នៅអំឡុងកិច្ច កិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធផ្សេងៗ នៅសាធារណៈរដ្ឋប្រជាធិបតេយ្យប្រជាមានិតឡាវ ភាគីចិន ក៏បានយល់ព្រមបង្កើនការនាំចូលអង្ករពីកម្ពុជាបន្ថែមទៀត ពី ១០ ម៉ឺនតោន ដល់ ២០ម៉ឺន តោននៅក្នុងមួយឆ្នាំ ចាប់ពីឆ្នាំ ២០១៧ តទៅ ។ ការយល់ព្រមនាំចូលអង្ករពីកម្ពុជាបន្ថែមនេះ ចំពេលដែលទីផ្សារនាំចេញអង្កររបស់កម្ពុជា កំពុងដាំក្បាលចុះ។
បើតាមរបាយការណ៍របស់លេខាធិការដ្ឋាន ច្រកចេញចូលតែមួយ សម្រាប់បំពេញបែបបទនាំចេញអង្ករ នៅក្នុងរយៈពេល ៨ខែ ឆ្នាំ២០១៦នេះ កម្ពុជាបានចេញអង្ករបាន៣២ម៉ឺនតោន ធ្លាក់ចុះ៦ភាគរយ បើធៀបនឹងរយៈពេលដូចគ្នាឆ្នាំ២០១៥។
ប្រមុខរដ្ឋាភិបាលកម្ពុជាចិន បានដាក់ទិសដៅពាណិជ្ជកម្មសរុបរវាងប្រទេសកម្ពុជានិងចិន ដែលមានទំហំទឹកប្រាក់ ជាង ៥ ប៊ីលានដុល្លារ នៅឆ្នាំ២០១៧ខាងមុខនេះ ។ ដើម្បីសម្រេចទិសដៅនេះ នៅក្នុងផែនការសេដ្ឋកិច្ច ពាណិជ្ជកម្ម និងវិនិយោគរយៈពេល ៥ឆ្នាំ រវាងកម្ពុជាចិន (២០១៣-២០១៧) ក្រោមផែនការសហប្រតិបត្តិការដៃគូជាយុទ្ធសាស្ត្រគ្រប់ជ្រុងជ្រោយកម្ពុជា-ចិន កម្ពុជាបានព្យាករណ៍ពីទំហំពាណិជ្ជកម្មទ្វេភាគីមានចំនួនទឹកប្រាក់ ៤.២១០ លានដុល្លារ (កំណើន១០%) នៅឆ្នាំ២០១៥ និងចំនួន ៤,៣១៤ លានដុល្លារនៅឆ្នាំ២០១៦ (កំណើន៨%) និងចំនួន ៥,០១៤ លានដុល្លារនៅឆ្នាំ២០១៧ (កំណើន៦%)។
គួរជម្រាបជូនផងដែរថា ពីឆ្នាំ២០១៤ ដល់ឆ្នាំ២០១៦ ចិនបានបណ្តាក់ទុន ចំនួន ៧.៥៨០ លានដុល្លារនៅកម្ពុជា ដែលមានក្រុមហ៊ុន១០២ និងមានគម្រោងចំនួន ៣៣៥ ។ លើសពីនេះ ប្រទេសចិនក៏បានសន្យានឹងផ្តល់ជំនួយឥតសំណងចំនួន៦០០លានដុល្លារ សម្រាប់គាំទ្រវិស័យជាច្រើននៅកម្ពុជាក្នុងរយៈពេល៣ឆ្នាំ ចាប់ពីឆ្នាំ ២០១៦ ដល់ ឆ្នាំ ២០១៨ ។
ក្រៅតែពីទំនាក់ទំនងពាណិជ្ជកម្ម និង ការវិនិយោគ រដ្ឋាភិបាលចិន ក៏បានយល់ព្រមផងដែរ ក្នុងការជួយស្ថាបនា និងជួសជុលកំណាត់ផ្លូវលេខ៥១ ស្តារប្រព័ន្ធធារាសាស្ត្រនៅទន្លេវ៉ៃកូ ក្នុងខេត្តស្វាយរៀង ក៍ដូចជាការជួយជួសជុលប្រាសាទអង្គរវត្ត ហើយអាចឈានទៅ ជួសជុលប្រាសាទព្រះវិហារផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ