ពលរដ្ឋខ្មែរ អាចចាយប្រាក់រៀលនៅទឹកដីថៃ តាមប្រព័ន្ធ QR Code
កម្ពុជា-ថៃ គ្រោង នឹងដំណើរការដាក់ឲ្យចរាចររូបិយវត្ថុ ប្រាក់រៀល និងប្រាក់បាត ឆ្លងព្រំដែនរវាងកម្ពុជា-ថៃ តាមរយៈប្រព័ន្ធអេឡិចត្រូនិក QR Code។ ធនាគារជាតិ អះអាងថា ប្រជាជនកម្ពុជាដែលមានគណនីជាប្រាក់រៀលទទួលបានផលចំណេញជាច្រើន តាមរយៈការចំណាយនានា នៅទឹកដីថៃដោយងាយស្រួល សុវត្ថិភាព និងចំណាយតិចបំផុត បើធៀបទៅនឹងការប្តូរនិងការកាន់សាច់ប្រាក់បាតទៅចាយលើទឹកដីថៃ។
ចុះផ្សាយនៅថ្ងៃ៖
ស្តាប់ - ០១:៥៧
គម្រោងរួមគ្នារបស់ភាគី កម្ពុជា-ថៃ ដាក់ឱ្យប្រើប្រាស់នូវប្រព័ន្ធ QR Codeនេះ ជាជំហានដំបូងសម្រាប់ទូទាត់ជាទូទៅ ។ ក្នុងនោះរួមមាន ការទូទាត់របស់ភ្ញៀវទេសចររបស់ប្រទេសទាំងពីរ និងបន្ទាប់មកនឹងបង្កើនវិសាលភាពដល់ការផ្ទេរប្រាក់របស់កម្មករ និងការទូទាត់ក្នុងពាណិជ្ជកម្មនិងវិនិយោគ។ គម្រោងនេះ ត្រូវបានលើកឡើងនៅក្នុងកិច្ចប្រជុំរវាង លោកស្រី ជា សិរី អគ្គនាយកបច្ចេកទេសនៃធនាគារជាតិនៃកម្ពុជា និងឧបការីទេសាភិបាលនៃធនាគារកណ្តាលថៃ កាលពីខែកក្កដា នៅប្រទេសថៃ។
បើតាមធនាគារជាតិនៃកម្ពុជា ការប្រើប្រាស់ QR Code នឹងអនុញ្ញាតឱ្យប្រជាជនកម្ពុជា ដែលមានគណនីជាប្រាក់រៀល ទទួលបានផលចំណេញជាច្រើន ដូចជា អាចធ្វើការទូទាត់ចេញពីគណនីជាប្រាក់រៀលរបស់ខ្លួនសម្រាប់ចំណាយទិញទំនិញ ឬទូទាត់ចំណាយនានាដូចជា សេវាព្យាបាលជាដើម នៅលើទឹកដីថៃ ដោយងាយស្រួល សុវត្ថិភាព និងចំណាយតិចបំផុត បើធៀបទៅនឹងការប្តូរនិងការកាន់សាច់ប្រាក់បាតទៅចាយលើទឹកដីថៃ។
មិនត្រឹមតែប៉ុណ្ណោះ ពលរដ្ឋខ្មែរ នឹងមិនចាំបាច់ខ្វល់ខ្វាយពីការប្តូរប្រាក់ ដែលពេលខ្លះអាចទទួលរងនូវការខាតបង់ពីការប្តូរប្រាក់ ពេលធ្វើដំណើរទៅកាន់ប្រទេសថៃ ហើយអាចធ្វើការចំណាយដោយមិនចាំបាច់ព្រួយបារម្ភពីការបាត់បង់និងខ្វះខាតប្រាក់បាតថៃ នៅពេលដែលមានគណនីជាប្រាក់រៀលនៅកម្ពុជា។
ធនាគារជាតិនៃកម្ពុជា ជឿជាក់ថា គម្រោងតភ្ជាប់ប្រព័ន្ធទូទាត់តាមរយៈ QR Code នឹងក្លាយជាកម្លាំងចលករមួយទៀត ចំពោះការលើកទឹកចិត្តឱ្យប្រជាជនកម្ពុជា មានគណនីជាប្រាក់រៀល ដោយទទួលបាននូវអត្ថប្រយោជន៍ជាច្រើនទាំងក្នុងស្រុក និងនៅក្រៅស្រុក ស្របតាមគោលនយោបាយជំរុញការប្រើប្រាស់ប្រាក់រៀលរបស់ធនាគារជាតិនៃកម្ពុជា និងរាជរដ្ឋាភិបាលកម្ពុជា។
មិនត្រឹមតែប៉ុណ្ណោះ ការប្រើប្រាស់ QR Code ជាមួយនឹងគណនីជាប្រាក់រៀល នឹងជួយបង្កើនការប្រើប្រាស់ប្រព័ន្ធទូទាត់ផ្លូវការ ដែលធ្វើឱ្យការចំណាយលើប្រតិបត្តិការមានតម្លៃទាប ងាយស្រួលនិងមានសុវត្ថិភាព ជាពិសេសចំពោះប្រតិបត្តិការតូចៗរបស់ប្រជាជនក្រីក្រនិងថ្នាក់កណ្តាល។ នេះបើតាមធនាគារជាតិនៃកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ