ពិព័រណ៍សៀវភៅថ្នាក់ជាតិលើកទី៨ រំពឹងថាមានអ្នកចូលរួមទស្សនាជាង១០ម៉ឺននាក់
ពិព័រណ៍សៀវភៅប្រចាំឆ្នាំរបស់កម្ពុជាដែលគ្រប់គ្នាទន្ទឹងរង់ចាំ បានវិលត្រឡប់មកវិញហើយ។ ចាប់ពីថ្ងៃសុក្រទី១៣ រហូតដល់ថ្ងៃអាទិត្យទី១៥ខែធ្នូ អ្នកបោះពុម្ពផ្សាយសៀវភៅនិងអ្នកនិពន្ធរាប់រយនាក់ នឹងនាំយកសៀវភៅរាប់ពាន់ចំណងជើងទៅតាំងបង្ហាញនិងដាក់លក់ នៅឯបណ្ណាល័យជាតិ ក្នុងទីក្រុងភ្នំពេញ។ អ្នករៀបចំពិព័រណ៍សៀវភៅរំពឹងទុកជាមុនថា ពិព័រណ៍សៀវភៅលើកទី៨ ឆ្នាំ២០១៩នេះ នឹងអាចទាក់ទាញអ្នកទស្សនាបានចំនួនជាង១០ម៉ឺននាក់។
ចុះផ្សាយនៅថ្ងៃ៖
ស្តាប់ - ០២:២០
ពិព័រណ៍សៀវភៅលើកទី៨នាឆ្នាំនេះ ប្រព្រឹត្តធ្វើក្រោមប្រធានបទ «ផ្ដើមក្ដីស្រមៃ ដៃកាន់សៀវភៅ» ដោយមានការចូលរួមពីគ្រឹះស្ថានបោះពុម្ពផ្សាយជាង៨០០ និងមានស្តង់សៀវភៅចំនួន១៤៣ស្តង់។ ដោយសារស្តង់ចូលរួមមានចំនួនច្រើន ពិព័រណ៍សៀវភៅនៅឆ្នាំនេះ បានពង្រីកទីតាំងដាក់តាំងសៀវភៅបន្ថែម នៅ ខាងក្រៅបណ្ណាល័យជាតិផ្នែកខាងមុខ បន្ថែមពីលើបរិវេណប្រារព្ធពិធីនៅក្នុងរបងបណ្ណាល័យជាតិ។
គួរជម្រាបថា ពីមួយឆ្នាំទៅមួយឆ្នាំ ពិព័រណ៍សៀវភៅនៅកម្ពុជាកាន់តែរីកធំធាត់ឡើងជាលំដាប់ ទាំងចំនួនស្តង់សៀវភៅ និងទាំងចំនួនអ្នកចូលរួមទស្សនា។ គេនៅចាំបានថា នៅពេលពិព័រណ៍សៀវភៅរៀបចំធ្វើដំបូងនៅឆ្នាំ២០១១ មានស្តង់សៀវភៅចូលរួមតាំងបង្ហាញមិនដល់១០ស្តង់ផង ហើយអ្នកចូលរួមមានត្រឹមតែប្រមាណ១ពាន់នាក់ប៉ុណ្ណោះ។ នៅឆ្នាំ២០១៧ ពិព័រណ៍សៀវភៅទាក់ទាញអ្នកទស្សនាបានចំនួនប្រមាណ៥ម៉ឺននាក់ ហើយចំនួននេះបានកើនឡើងជាងទ្វេដងនៅឆ្នាំ២០១៨ ដែលមានចំនួនអ្នកចូលរួមដល់ទៅ១៣ម៉ឺននាក់។
លោក ហុក សុទ្ធិ ប្រធានសមាគមបណ្ណារក្សនិងឯកសារវិទូកម្ពុជា និងជានាយកអង្គការស៊ីប៉ា រំពឹងទុកជាមុនថា ពិព័រណ៍សៀវភៅនៅឆ្នាំ២០១៩នេះ នឹងទទួលបានការគាំទ្រច្រើនដូចឆ្នាំមុនដែរ។ សម្រាប់លោក ហុក សុទ្ធិ បើទោះបីជាចំនួនអ្នកទស្សនាអាចមានតិចជាង ឬស្មើនឹងឆ្នាំមុនក៏ដោយ ក៏ចំនួននេះនៅតែចាត់ចូលថាមានកម្រិតចូលរួមខ្ពស់បំផុត បើធៀបនឹងពិព័រណ៍ដទៃដែលមានរយៈពេល៣ថ្ងៃដែរ។
គួរកត់សម្គាល់ថា ក្រៅពីតាំងលក់សៀវភៅបញ្ចុះតម្លៃពិសេស ពិព័រណ៍សៀវភៅនៅឆ្នាំ២០១៩នេះ មានរៀបចំទីតាំងបណ្ណាល័យធម្មជាតិសម្រាប់ឲ្យអ្នកចូលរួមអង្គុយអាន កម្មវិធីផ្លាស់ប្ដូរសៀវភៅ ការប្រគុំតន្ដ្រី សម្ដែងរឿងខ្លី និងចម្រៀង ក៏ដូចជាមានកម្មវិធីកម្សាន្តសម្រាប់កុមារជាច្រើនទៀត។ ក៏មានផងដែរ ការចែកជូនសៀវភៅអានដោយឥតគិតថ្លៃចំនួន៤ម៉ឺនក្បាល រួមមានសៀវភៅកម្រងច្បាប់ទំនៀមទម្លាប់ប្រពៃណីរបស់លោក ក្រម ង៉ុយ និងច្បាប់ស្រីហិតោបទេស របស់ បណ្ឌិត ប៉ាង ខាត់ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ