ក្រុមយុវជន រៀបចំពិព័រណ៍ និងបុណ្យភូមិ ដើម្បីបង្កើនការយល់ដឹងពីវប្បធម៌ខ្មែរ
ក្រុមយុវជន ដែលមានឈ្មោះថា “រីកសាយ” និង “ភ្លើងគប់” នឹងរៀបចំព្រឹត្តិការណ៍ពីរ ដាច់ដោយឡែកពីគ្នា ដើម្បីបង្កើនការយល់ដឹងពីវប្បធម៌ខ្មែរ។ ក្រុមយុវជនរីកសាយ នឹងរៀបចំពិព័រណ៍វប្បធម៌ ឈ្មោះថា “ស្នាដៃ និងអនាគត លើកទី៣” នៅថ្ងៃទី២៨ និងថ្ងៃទី២៩ មីនា នៅសាលមហោស្រពចតុមុខ។ ចំណែកក្រុមយុវជនភ្លើងគប់ នឹងរៀបចំបុណ្យភូមិ លើកទី២ ចាប់ពីថ្ងៃទី៣ ទី៤ និងថ្ងៃទី៥មេសា នៅវត្តព្រែកថ្លឹង ជាយរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ព្រឹត្តិការណ៍វប្បធម៌ទាំងពីរ នៅចុងសប្តាហ៍នេះ និងនៅចុងសប្តាហ៍ក្រោយ ត្រូវបានប្រកាសក្នុងសន្និសីទកាសែត នាព្រឹកថ្ងៃទី២៣មីនា នៅមជ្ឈមណ្ឌលធនធានសោតទស្សន៍ បូផាណា ក្នុងរាជធានីភ្នំពេញ។ ដំបូង ជាពិព័រណ៍ ស្តីពី “ស្នាដៃ និងអនាគត លើកទីបី” រៀបចំដោយក្រុមយុវជន រីកសាយ រយៈពេលពីរថ្ងៃ ចាប់ពីថ្ងៃទី២៨ ដល់ថ្ងៃទី២៩ ខែមីនា ឆ្នាំ២០១៥ នៅឯសាលមហោស្រពចតុមុខ។
ពិព័រណ៍ ស្នាដៃ និងអនាគត លើកទីបី ត្រូវបានបង្កើតឡើងដើម្បីបង្កើនការយល់ដឹងរបស់ប្រជាពលរដ្ឋខ្មែរ ជាពិសេសក្រុមយុវជន យុវនារី ក្នុងការចូលរួមថែរក្សា និងលើកតម្កើងសិល្បៈវប្បធម៌ខ្មែរ។ លោក ឡោ វុឌ្ឍី ប្រធានក្រុមរីកសាយ លើកឡើងថា សព្វថ្ងៃ ការ យល់ដឹងពីសិល្បៈខ្មែរ មានកម្រិតទាបក្នុងចំណោមយុវជន។
ពិព័រណ៍ ស្នាដៃ និងអនាគត លើកទី៣ នៅសាលសន្និសីទចតុមុខ ក្នុងរាជធានីភ្នំពេញ នៅថ្ងៃសៅរ៍ និងថ្ងៃអាទិត្យ ចុងសប្តាហ៍នេះ ក្រៅពីការដាក់តាំងស្នាដៃនិស្សិត ក៏មានការលេងល្បែងប្រជាប្រិយ និងរាំរែក កម្មវិធីពិភាក្សាតទល់រវាងយុវជន លើប្រធានបទវប្បធម៌ ព្រមទាំងការសម្តែងសិល្បៈប្រពៃណីខ្មែរចម្រុះ រួមមាន របាំអប្សរា របាំក្រម៉ា ព្រមទាំងការសម្តែងល្ខោនខោល ជាដើម។
ពិព័រណ៍រយៈពេល ២ ថ្ងៃ នៅចុងសប្តាហ៍នេះ ក៏នឹងជាវេទិកាមួយសម្រាប់យុវជន យុវនារីខ្មែរ ដែលមានទេពកោសល្យ និងមានគំនិតច្នៃប្រឌិតខាងផ្នែកសិល្បៈ មានឱកាសអាចចូលរួមក្នុងការបញ្ចេញនូវស្នាដៃរបស់ខ្លួន ផងដែរ។ ថវិកាមួយផ្នែក ដែលបានមកពីអំពីពិព័រណ៍សិល្បៈនេះ នឹងត្រូវបរិច្ចាគទៅកាន់កុមារទីទ័លក្រ។
ដោយឡែកបុណ្យភូមិ ក៏នឹងត្រូវក្រុមយុវជន ភ្លើងគប់ រៀបចំ ជាលើកទី២ រយៈពេល ៣ ថ្ងៃ ចាប់ពីថ្ងៃទី៣ ដល់ថ្ងៃទី៥ ខែមេសា នៅវត្តព្រែកថ្លឹង ជាយរាជធានីភ្នំពេញ។ ក្នុងព្រឹត្តិការណ៍ដើម្បីសាទរបុណ្យចូលឆ្នាំថ្មី ប្រពៃណីជាតិ និងលើកកម្ពស់វប្បធម៌សិល្បៈ ដែលមានឈ្មោះថា បុណ្យភូមិ គឺដូចនឹងឆ្នាំមុន ក្រុមយុវជននឹងរៀបចំលេងល្បែងប្រជាប្រិយ របាំត្រុត លក់ចំណីអាហារខ្មែរ សម្តែងល្ខោនស្បែកធំ ល្ខោនស្បែកតូច យីកេ និងល្ខោនបាសាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ