ឆ្នាំ២០២០៖ កម្ពុជាទម្លាក់ការព្យាករណ៍កំណើនសេដ្ឋកិច្ចរបស់ខ្លួនមកត្រឹមរង្វង់៦%
កំណើនសេដ្ឋកិច្ចកម្ពុជានៅឆ្នាំ២០២០នឹងមានត្រឹមតែ ៦.១%ប៉ុណ្ណោះ។ នេះបើផ្អែកតាមការព្យាករណ៍របស់ក្រសួងសេដ្ឋកិច្ចនិងហិរញ្ញវត្ថុកម្ពុជានៅថ្ងៃទី ៣០ មករានេះ។ មុននេះ រដ្ឋាភិបាលកម្ពុជារំពឹងទុកថា កំណើនសេដ្ឋកិច្ចរបស់កម្ពុជានៅឆ្នាំ ២០២០ គឺស្ថិតនៅក្នុងរង្វង់ ៦.៥%។
ចុះផ្សាយនៅថ្ងៃ៖
ស្តាប់ - ០៣:៣៣
ស្របពេលដែលហានិភ័យដែលបង្កឡើងដោយកត្តាខាងក្នុងនិងខាងក្រៅ កំពុងមានការកើនឡើងនារយៈពេលពីរខែចុងក្រោយនៃឆ្នាំ២០១៩ និងមួយខែដើមឆ្នាំ២០២០នេះ អ្នកជំនាញសេដ្ឋកិច្ចនៃក្រសួងសេដ្ឋកិច្ចនិងហិរញ្ញវត្ថុកម្ពុជា បានទម្លាក់ការព្យាករណ៍កំណើនសេដ្ឋកិច្ចរបស់ខ្លួននៅឆ្នាំ ២០២០ ពី ៦.៥% មកនៅត្រឹមរង្វង់៦% ឬត្រឹម ៦.១% ប៉ុណ្ណោះ។ ការទម្លាក់ការព្យាករណ៍នេះ គឺបណ្តាលមកពីកត្តាហានិភ័យធំៗចំនួន៤ រួមមាន ការធ្លាក់ចុះនៃកំណើនសេដ្ឋកិច្ចពិភពលោក ភាពមិនប្រាកដប្រជានៅតំបន់មជ្ឈឹមបូព៌ា ជម្លោះពាណិជ្ជកម្មរវាងចិន-សហរដ្ឋអាមេរិក ការប្រែប្រួលអាកាសធាតុ និងការផ្ទុះឡើងនៃជំងឺឆ្លងដែលបង្កឡើងដោយកូរ៉ូណាវីរុសនៅក្នុងប្រទេសចិនជាដើម។ បន្ថែមលើនេះ ការប្រឈមមុខនឹងការបាត់បង់ប្រព័ន្ធអនុគ្រោះពន្ធ EBA ពីសហភាពអឺរ៉ុប ការកើនឡើងនូវគោលនយោបាយគាំពារនិយម និងភាពយឺតយ៉ាវនៃការធ្វើពិពិធកម្មសេដ្ឋកិច្ច និងភាពប្រកួតប្រជែងនៅក្នុងស្រុកនៅមានកម្រិត ក៏នឹងទាញទម្លាក់កំណើនសេដ្ឋកិច្ចកម្ពុជានៅឆ្នាំ ២០២០ នេះដែរ។ មន្ត្រីជំនាញសេដ្ឋកិច្ចកម្ពុជា បានកត់សំគាល់ថា ការធ្លាក់ចុះនេះ គឺមិនមែនមានតែកម្ពុជានោះទេ ប្រទេសនៅតំបន់អាស៊ានខ្លះ ក៏បានទម្លាក់ការព្យាករណ៍របស់ខ្លួនដែរ។
គួរជំរាបជូនថា នៅក្នុងរយៈពេល២ទសវត្សរ៍ចុងក្រោយនេះ កម្ពុជាសម្រេចបានកំណើនសេដ្ឋកិច្ចក្នុងរង្វង់៧.៥% ឬ ៧.១%នៅក្នុងមួយឆ្នាំ។ ហើយកាលពីឆ្នាំ២០១៩កន្លងទៅ កំណើនសេដ្ឋកិច្ចរបស់កម្ពុជា គឺស្ថិតនៅក្នុងរង្វង់៧%។ ប៉ុន្តែដោយផ្អែកលើស្ថានភាព និងការប្រែប្រួល រួមទាំងការប្រឈមនឹងការបាត់បង់ ឬបាត់បង់ខ្លះនៃប្រព័ន្ធអនុគ្រោះពន្ធ EBA ពីសហភាពអឺរ៉ុបនៅពេលដ៏ខ្លីខាងមុខនេះ កម្ពុជាបានបន្តទម្លាក់ការព្យាករណ៍របស់ខ្លួនពី ៦.៥% នៅឆ្នាំ ២០១៩ មកនៅត្រឹមរង្វង់ ៦% ឬ ៦.១% ប៉ុណ្ណោះ។
យ៉ាងណាក្តី រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានថ្លែងនៅក្នុង វេទិកាសាធារណៈ ស្តីពី ការគ្រប់គ្រងម៉ាក្រូសេដ្ឋកិច្ច និងច្បាប់ស្តីពី ថវិការជាតិឆ្នាំ២០២០ នៅថ្ងៃទី ៣០ មករានេះថា ប្រសិនបើរដ្ឋាភិបាល និងវិស័យឯកជនរួមគ្នាដោះស្រាយនិងប្រឈមមុខនឹងហានិភ័យខាងលើនេះបាន នោះកំណើនសេដ្ឋកិច្ចរបស់កម្ពុជា នឹងនៅរក្សាបានកំណើន ៦.៥% ដូចការព្យាករណ៍នាពេលកន្លងមក។ នោះបើការដាក់ចេញនូវវិធានការនៃការគ្រប់គ្រងហានិភ័យ និងកំណែទម្រង់បានល្អ។
នៅក្នុងបទបង្ហាញ ស្តីពី ស្ថានភាព និងទស្សនវិស័យសេដ្ឋកិច្ចកម្ពុជានៅក្នុងវេទិកាសាធារណៈ ដែលរៀបចំឡើងដោយក្រសួងសេដ្ឋកិច្ច និងហិរញ្ញវត្ថុនៅថ្ងៃទី ៣០ មករានេះ បានកត់សំគាល់ថា ឆ្នាំ ២០២០ វិស័យកសិកម្មកម្ពុជានៅតែបន្តកំណើនទាប ខណៈវិស័យសំណង់នៅតែបន្តកំណើនខ្ពស់ ប៉ុន្តែវិស័យកាត់ដេរ សណ្ឋាគា និងភោជនីយដ្ឋាន នឹងថមថយចុះ ដោយសារតែការកើនឡើងយឺតនៃភ្ញៀវទេសចរក្រៅពីជនជាតិចិន។ គួរជំរាបជូនដែរថា ការរៀបចំវេទិកាសាធារណៈ ស្តីពី ការគ្រប់គ្រងម៉ាក្រូសេដ្ឋកិច្ច និងច្បាប់ស្តីពី ថវិការជាតិឆ្នាំ២០២០ នៅថ្ងៃទី ៣០ មករានេះ បានធ្វើឡើងក្រោយពីរដ្ឋសភា បានអនុម័តច្បាប់ ស្តីពី ថវិការជាតិសម្រាប់ឆ្នាំ២០២០។ ថវិការជាតិឆ្នាំ ២០២០ ដែលរដ្ឋាភិបាលកម្ពុជា បានបង្កើនខ្ទង់ចំណាយជាង៨ពាន់ (៨.២២៣) លានដុល្លារអាមេរិក ពោលគឺកើនឡើងជាង២ពាន់លានដុល្លារ ឬ ២២.៧% បើធៀបនឹងថវិការជាតិនៅឆ្នាំ២០១៩។ ការបង្កើនថវិការជាតិនៅឆ្នាំ២០២០នេះ ក៏ត្រូវបានធ្វើឡើង ដើម្បីត្រៀមទប់ទល់នឹងហានិភ័យ ដែលបង្កឡើងពីកត្តាខាងក្នុងនិងកត្តាខាងក្រៅ មកលើសេដ្ឋកិច្ចរបស់កម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ