អាជ្ញាធរដោះលែងសកម្មជនដីធ្លីវិញ ក្រោយឃុំខ្លួនជាង១យប់១ថ្ងៃ
នៅរសៀលម៉ោងជាង ៤ ម្សិលមិញនេះ សកម្មជនដីធ្លីចំនួន ៦នាក់ ត្រូវបានអាជ្ញាធរខណ្ឌដង្កោដោះលែងឲ្យមានសេរីភាពឡើងវិញ បន្ទាប់ពីពួកគេត្រូវបានចាប់ឃុំខ្លួនកាលពីថ្ងៃអាទិត្យ។ រីឯមនុស្ស៤នាក់ផ្សេងទៀតដែលត្រូវចាប់ខ្លួននៅថ្ងៃតែមួយក៏ត្រូវបានដោះលែងរួចហើយដែរ។ ពួកគេទាំងនេះ ត្រូវបានចាប់ឃុំខ្លួននៅខណៈ ដែលកំពុងជួបជុំគ្នាបង្ហោះប៉ោងៗលើកចិត្តដល់អ្នកជាប់ឃុំនៅមុខពន្ធនាគារព្រៃស។
ចុះផ្សាយនៅថ្ងៃ៖
ស្តាប់ - ០២:១៤
សកម្មជនដីធ្លី ដែលត្រូវបានដោះលែងវិញកាលពីម្សិលមិញនេះ គឺ៥នាក់ជាសកម្មជនដីធ្លីមកពីតំបន់ថ្មគោល និងម្នាក់ទៀតនៅក្នុងតំបន់បឹងកក់ គឺលោកយាយ ង៉ែត ឃុន ឫគេស្គាល់ និងហៅជាទូទៅថាលោកយាយម៉ាមី។ លោកយាយម៉ាមីនេះ បើទោះបីជាគាត់ត្រូវបានដោះលែងវិញហើយក្តី ប៉ុន្តែគាត់នៅមានសភាពឈឺចុកចាប់ចង្កេះ ព្រោះត្រូវអាជ្ញាធរចាប់បោះដាក់ទៅលើឡាននៅពេលប្រមូលផ្តុំគ្នានៅមុខពន្ធនាគារព្រៃស។ នេះបើតាមការបញ្ជាក់ឲ្យដឹងពីកញ្ញាសុង ស្រីលាភ ដែលជាសកម្មជនដីធ្លីបឹងកក់ម្នាក់ទៀត ដែលស្និតនឹងលោកយាយម៉ាមី។
សកម្មជនដីធ្លីទាំង ៦នាក់នេះ ត្រូវបានដោះលែងវិញក្រោយពីពួកគេបានធ្វើកិច្ចសន្យាជាមួយអាជ្ញាធរខណ្ឌដង្កោ។ បើតាមកញ្ញាសុង ស្រីលាភ កិច្ចសន្យានោះ គឺអាជ្ញាធរតម្រូវឲ្យពួកគេឈប់ប្រមូលផ្តុំគ្នា ឈប់តវ៉ាដែលខុសទៅនឹងច្បាប់ ហើយអាជ្ញាធរក៏បានតម្រូវឲ្យពួកគេផ្តិតម្រាមដៃទាំង ១០លើកិច្ចសន្យាផងដែរ។ យ៉ាងណាក៏ដោយ កញ្ញាសុង ស្រីលាភ បានបញ្ជាក់ថា ពួកគេនឹងនៅតែបន្តការប្រមូលផ្តុំ និងតវ៉ាទៀត បើទោះបីបានចុះកិច្ចសន្យាក៏ដោយ។
សូមបញ្ជាក់ជូនថា អ្នកទាំង ៦នាក់នេះ និងអ្នកលក់ប៉ោងៗម្នាក់ព្រមទាំងកូនក្មេង ៣ទៀត សរុបទាំងអស់ចំនួន ១០នាក់ ត្រូវសមត្ថកិច្ចចាប់ខ្លួនកាលពីព្រឹកថ្ងៃអាទិត្យនៅមុខពន្ធនាគារព្រៃស ក្នុងពេលដែលពួកគេជួបជុំគ្នាបង្ហោះប៉ោងៗនៅទីនោះ។ គោលបំណងធំនៃការបង្ហោះប៉ោងៗនេះ គឺទាមទារឲ្យដោះលែងអ្នកស្រីទេព វណ្ណី ដែលសកម្មជនដីធ្លីនៅក្នុងតំបន់បឹងកក់ និងទាមទារឲ្យដោះលែងមន្ត្រីសង្គមស៊ីវិលផ្សេងទៀត។ បើតាមអ្នកតវ៉ា ការបង្ហោះប៉ោងៗទាំងនេះ គឺជាសារប្រាប់ដល់អ្នកជាប់ឃុំទាំងអស់នោះថា ពួកគេមិនឯកាឡើយ និងកុំបាក់ទឹកចិត្ត។
អ្នកស្រីទេព វណ្ណី តំណាងសកម្មជនដីធ្លីតំបន់បឹងកក់ ត្រូវតុលាការក្រុងភ្នំពេញបញ្ជាឲ្យឃុំខ្លួននៅក្នុងពន្ធនាគារជាថ្មីកាលពីថ្ងៃទី ១៧សីហា បន្ទាប់ពីអ្នកស្រី និងអ្នកស្រីបូវ សោភា ដែលសកម្មជនដីធ្លីតំបន់បឹងកក់ម្នាក់ទៀត ត្រូវបានអាជ្ញាធរចាប់ខ្លួនរួមគ្នាកាលពី ១៥សីហា ក្នុងពេលដែលពួកគេធ្វើយុទ្ធនាការថ្ងៃចន្ទពណ៌ខ្មៅ។ មែនទែនទៅ សំណុំរឿងនេះ ត្រូវបានបិទបញ្ចប់ហើយកាលពីថ្ងៃទី ២២សីហា ដោយអ្នកស្រីបូវ សោភា ត្រូវបានដោះលែងឡើងវិញ។ ក៏ប៉ុន្តែអ្នកស្រីទេព វណ្ណី ត្រូវឃុំខ្លួនបន្តទៀត ព្រោះអ្នកស្រីបានរងបទចោទដាច់ដោយឡែកមួយផ្សេងទៀត គឺបទហិង្សាដោយចេតនាមានស្ថានទម្ងន់ទោសតាមមាត្រា២១៨ នៃក្រមព្រហ្មទណ្ឌ។ បទល្មើសនេះបានប្រព្រឹត្តនៅក្បែរវិមានឯករាជ្យក្នុងសង្កាត់ទន្លេបាសាក់ ខណ្ឌដូនពេញ កាលពីថ្ងៃទី១៣ ខែមីនា ឆ្នាំ២០១៣កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ