បាក់ឌុបថ្ងៃទី២ចប់៖ បេក្ខជនប្រព្រឹត្តកំហុសឆ្គងចំនួន១៣ ករណីប៉ុណ្ណោះថយចុះបើធៀបទៅនឹងឆ្នាំកន្លងទៅ
ស្ថានភាពនៃការប្រលងក្នុងរយៈពេលពីរថ្ងៃនេះប្រព្រឹត្តទៅបានយ៉ាងល្អប្រសើរជាងឆ្នាំកន្លងទៅ ដោយហេតុថា មានការយោគយល់ សហការល្អពីសំណាក់អ្នកពាក់ព័ន្ធ ហើយបេក្ខជនបានព្យាយាមបំពេញកាតព្វកិច្ចរបស់ខ្លួន ទោះបីមានបញ្ហាអាកាសធាតុតាមតំបន់យ៉ាងណាក៏ដោយ ក៏ការប្រលងបានប្រព្រឹត្តយ៉ាងទៅជោគជ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
អត្ថបទដោយ៖ តាន់ គឹមច័ន្ទវាសនា និងហេង ពុធីរៈ
លោករស់ សាលីន អ្នកនាំពាក្យក្រសួងអប់រំ បានបញ្ជាក់ប្រាប់វិទ្យុបារាំងថា ថ្ងៃទី២នៃការប្រឡងបាក់ឌុប សម្រាប់ឆ្នាំសិក្សា២០១៦-២០១៧ ត្រូវបានបញ្ចប់ទៅយ៉ាងរលូន ក្នុងនោះក៏នៅតែមានបេក្ខជនមួយចំនួនប្រព្រឹត្តកំហុសឆ្គង ហើយត្រូវបានរៀបចំកំណត់ហេតុពិសេសចំនួន ១៣ករណី ក្នុងនោះករណីដកហូត ទូរសព្ទដៃ ០៦ករណី និងប៉ុន្មានករណីទៀត គឺប្ដូរលេខតុអង្គុយ លួចចម្លងសំណៅឯកសារ ជាដើម។ ក៏មានផងដែរបេក្ខជនមានបញ្ហាសុខភាពចំនួន ៧០ករណី ប៉ុន្តែអាចដំណើរការប្រឡងបន្តទៀតបាន បន្ទាប់ពីទទួលបានការសង្គ្រោះបឋម និងមាន ០៩ករណី ដែលមិនអាចបន្តការប្រឡងបាន។
ក្រសួងបានប្រកាសថ្ងៃទី២នៃការប្រលងបាក់ឌុបថា មានករណីបង្ហោះវិញ្ញាសារ និងអត្រាកំណែ នៃការប្រឡងសញ្ញាប័តមធ្យមសិក្សាចំណេះទូទៅ និងបំពេញវិជ្ជា សម័យប្រលងថ្ងៃទី ២១ សីហា។ ក្រសួង បានអោយដឹងថា មានគណនីឯកជនមួយដែលបានធ្វើការបង្ហោះនៅកាលពីយប់ថ្ងៃទី ២១ សីហា នូវអត្រាកំណែលើមុខវិជ្ជា ជីវវិទ្យា និងគីមីវិទ្យា ដើម្បីបំភ័ន្តមតិសាធារណជន និងបេក្ខជនប្រឡង។ ក្រសួងក៏បានធ្វើការប្រមាន ចាត់វិធានការតាមច្បាប់ ក្នុងករណីនៅតែបន្តបង្ហោះចែកចាយក្នុងអំឡុងពេលប្រលង។
អ្នកនាំពាក្យដដែលបានបញ្ជាក់ថា នៅថ្ងៃទី២៣ សីហា នឹងមានការវាយតម្លៃរួមពីអត្រាចំនួនសិស្សជាប់ ហើយនៅថ្ងៃ ១២ កញ្ញា នឹងមានការប្រកាសលទ្ធផលប្រលងនៅក្រុងភ្នំពេញ និងខេត្តកណ្តាល និងថ្ងៃទី ១៣ កញ្ញា នឹងមានការប្រកាសលទ្ធផលប្រលងទូទាំងប្រទេស។
សូមបញ្ជាក់ថា ក្នុងរយៈពេលពីរថ្ងៃនៃដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ឆ្នាំ២០១៧ មានបេក្ខជនបានចុះឈ្មោះប្រឡង សរុបចំនួនជាង១០១,៤១០ នាក់ ស្រី ៥០,០៤៩ នាក់ និងមានមណ្ឌលប្រឡងចំនួន ១៧៨ មណ្ឌល ក្នុងនោះថ្នាក់វិទ្យាសាស្ត្រ មាន ១០៨ មណ្ឌល និងថ្នាក់វិទ្យាសាស្ត្រសង្គម មាន ៧០ មណ្ឌល ត្រូវជា ៤០៩៣បន្ទប់ ទូទាំងប្រទេស។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ