NGOs សង្ឃឹមថាឧបការីរង ការបរទេសអាមេរិក ជួយឲ្យមានការពិភាក្សាគ្រប់ជ្រុងជ្រោយពីសេចក្តីព្រាងច្បាប់អង្គការក្រៅរដ្ឋាភិបាល
តាមការគ្រោងទុក នៅថ្ងៃទី ១មិថុនានេះ ឧបការីរងការបរទេសអាមេរិក លោក Scott Busby ត្រូវមកបំពេញទស្សនកិច្ចរយៈពេលពីរថ្ងៃ នៅកម្ពុជា។ ជាទស្សនកិច្ច ដែលតំណាងរដ្ឋាភិបាលអាមេរិករូបនេះ នឹងពិភាក្សាជាមួយមន្ត្រីរដ្ឋាភិបាលខ្មែរ ពីសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល។ ចំពោះដំណើរទស្សនកិច្ចនេះ អង្គការមិនមែនរដ្ឋាភិបាលនៅកម្ពុជា បានដាក់ក្តីរំពឹងថា យ៉ាងហោចណាស់ រដ្ឋាភិបាលខ្មែរ អាចនឹងយកអនុសាសន៍ខ្លះពីអាមេរិក ហើយអាចនឹងបើកចំហរឲ្យមានការពិភាក្សាគ្រប់ជ្រុងជ្រោយ មុននឹងសម្រេចអនុម័តច្បាប់ដ៏ចម្រូងចម្រាស់នេះ ក្នុងសប្តាហ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
លោក Scott Busby ឧបការីរងក្រសួងការបរទេសអាមេរិក ដែលទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ បានមកដល់ទីក្រុងភ្នំពេញហើយ នៅថ្ងៃទី ១មិថុនានេះ ដើម្បីផ្តើមដំណើរទស្សនកិច្ច រយៈពេល ២ថ្ងៃ។ ជាដំណើរទស្សនកិច្ច ដែលមន្ត្រីអាមេរិករូបនេះ នឹងជួបជាមួយមន្ត្រីខ្មែរ ដើម្បីពិភាក្សាពីសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល។ ហើយបន្ទាប់ពីជំនួបជាមួយមន្ត្រីរដ្ឋាភិបាលខ្មែរ លោកឧបការីរងការបរទេសអាមេរិក ក៏នឹងធ្វើសន្និសីទកាសែតមួយ នៅថ្ងៃទី ២មិថុនា មុននឹងត្រឡប់ទៅវិញផងដែរ។
លោកតឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាល ឬ NGO Forum បានប្រាប់វិទ្យុបារាំងថា ដំណើរទស្សនកិច្ចរបស់លោក Scott Busby នៅពេលនេះ គឺមានសារៈសំខាន់ខ្លាំងណាស់ សម្រាប់ធ្វើឲ្យសេចក្តីព្រាងច្បាប់មួយនេះ មានតម្លាភាពជាងមុន។ លោកសង្ឃឹមថា តំណាងសហរដ្ឋអាមេរិក អាចជួយផ្តល់អនុសាសន៍ខ្លះៗ ដល់រដ្ឋាភិបាលកម្ពុជា ប្រយោជន៍ដើម្បីបើកឲ្យមានការពិភាក្សាជាចំហរ និងគ្រប់ជ្រុងជ្រោយពីសេចក្តីព្រាងច្បាប់នេះ មុននឹងត្រូវអនុម័ត ក្នុងសប្តាហ៍នេះ។ តាមលោកតឹក វណ្ណារ៉ា ចង់ឬមិនចង់ កម្ពុជា គួរតែស្តាប់យោបល់ខ្លះពីអាមេរិក ព្រោះអាមេរិកជាប្រទេសផ្តល់ជំនួយធំមួយ ហើយក្នុងចំណោមអង្គការដែលចុះបញ្ជីនៅកម្ពុជា ក៏មានអង្គការអន្តរជាតិជាច្រើនផងដែរ។
យ៉ាងណាក៏ដោយ លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានបញ្ជាក់ថា ទោះបីមានការជួបពិភាក្សាគ្នារវាងរដ្ឋាភិបាលកម្ពុជា ជាមួយឧបការីរងក្រសួងការបរទេសអាមេរិកក៏ដោយ ប៉ុន្តែដំណើរការតាក់តែងសេចក្តីព្រាងច្បាប់នេះ នឹងមិនថយក្រោយនោះឡើយ។ ជាមួយគ្នានេះ លោកផៃ ស៊ីផាន សង្ឃឹមថា សេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល អាចនឹងត្រូវរដ្ឋាភិបាលអនុម័តនៅថ្ងៃសុក្រនេះ និងបញ្ជូនបន្តទៅឲ្យរដ្ឋសភា ដើម្បីពិនិត្យ និងអនុម័ត។
គួរជម្រាបជូនថា អង្គការក្រៅរដ្ឋាភិបាលមួយក្រុម កាលពីពីរសប្តាហ៍មុន បានរៀបចំដំណើរទស្សនកិច្ច ទៅកាន់សហរដ្ឋអាមេរិក ដើម្បីថ្លែងប្រាប់ពីបញ្ហា របស់សេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល ដល់ភាគីពាក់ព័ន្ធ។ បន្ទាប់ពីដំណើរទស្សនកិច្ចនោះ សហរដ្ឋអាមេរិក និងសហភាពអឺរុប បានសន្យាថា នឹងជួយផ្តល់យោបល់ ដើម្បីឲ្យរដ្ឋាភិបាល និងសភាកម្ពុជា បើកចំហរការពិភាក្សាពីខ្លឹមសារ និងមាត្រានីមួយៗនៃសេចក្តីព្រាងច្បាប់នេះសិន មុននឹងសម្រេចអនុម័តជាផ្លូវការ ក្នុងខែមិថុនានេះ។ នេះបើតាមលោកតឹក វណ្ណារ៉ា។
គួររម្លឹកជូនថា អង្គការសង្គមស៊ីវិល បានរិះគន់ថា រដ្ឋាភិបាលកម្ពុជា បានតាក់តែងសេចក្តីព្រាងច្បាប់នេះឡើង ដើម្បីរឹតត្បិតសិទ្ធិសេរីភាពក្នុងការធ្វើសកម្មភាពរបស់ខ្លួន។ ផ្ទុយពីការរិះគន់នេះ រដ្ឋាភិបាល បានបដិសេធ ដោយបញ្ជាក់ថា ច្បាប់នេះ គឺបង្កើតឡើង ដើម្បីលើកកម្ពស់កិច្ចសហប្រតិបត្តិការក្នុងភាពជាដៃគូរវាងរដ្ឋាភិបាល និងអង្គការសង្គមស៊ីវិលតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ