ក្រសួងដែនដីចេញសេចក្តីណែនាំ ឲ្យពង្រឹងគុណភាពនិងសុវត្ថិភាពសំណង់ ក្រោយករណីរលំបាក់អគារនៅខេត្តកែប
ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ១០ មករានេះ បានចេញសេចក្តីណែនាំថ្មីមួយ ស្តីពីការពង្រឹងគុណភាពនិងសុវត្ថិភាពសំណង់។ បន្ថែមលើនេះ កាលពីថ្ងៃម្សិលមិញ ក្រសួងក៏បានចេញសេចក្តីសម្រេចចាត់តាំងមន្ត្រីត្រួតពិនិត្យគុណភាពសំណង់នៅទូទាំងប្រទេស។ វិធានការនេះ ត្រូវបានគេមើលឃើញថា បានធ្វើឡើងក្រោយពីមានករណីដួលរលំអគារកម្ពស់០៧ជាន់នៅក្នុងខេត្តកែប ដែលបណ្តាលឲ្យកម្មករ៣៦នាក់ស្លាប់ និង២៣នាក់រងរបួស។
ចុះផ្សាយនៅថ្ងៃ៖
ស្តាប់ - ០២:០៥
សេចក្តីណែនាំថ្មីនេះ បានដាក់បំរាមយ៉ាងតិច៥ចំណុច ជាពិសេសហាមដាច់ខាតការសាងសង់សំណង់ដែលគ្មានលិខិតអនុញ្ញាត ការអនុវត្តការងារសាងសង់ឬរុះរើដោយអ្នកគ្មានអាជ្ញាបណ្ណឬវិញ្ញាបនបត្របញ្ជាក់ការអនុញ្ញាត ឲ្យប្រកបអាជីវកម្មដែលផ្តល់ដោយក្រសួងរៀបចំដែនដី នគរូបនីយកម្ម និងសំណង់ជាដើម។ ក្រៅពីនេះ សេចក្តីណែនាំ ដែលចេញដោយលោក ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់នេះ ក៏បានហាមដាច់ខាតចំពោះការដ្ឋានសំណង់ណា ដែលដំណើរការសាងសង់ ឬរុះរើដោយគ្មានវិស្វករប្រចាំការដ្ឋាន ការស្នាក់នៅក្នុងអគារដែលកំពុងសាងសង់ និងការប្រើប្រាស់សំណង់គ្រប់ប្រភេទ ដោយគ្មានវិញ្ញាបនបត្រប្រើប្រាស់ ឬលិខិតបិទការដ្ឋាន ដែលផ្តល់ដោយអាជ្ញាធរមានសមត្ថកិច្ចជាដើម។
ក្នុងករណីពិនិត្យឃើញអំពើល្មើសនឹងបម្រាមខាងលើ អាជ្ញាធរមានសមត្ថកិច្ចត្រូវចេញលិខិតផ្អាកការដ្ឋានសាងសង់ជាបន្ទាន់។ ហើយក្នុងករណីនៅតែបន្ត នោះអាជ្ញាធរមានសមត្ថកិច្ចត្រូវកសាងសំណុំរឿងបញ្ជូនទៅកាន់តុលាការតែម្តង។ នេះបើយោងតាមខ្លឹមសារនៃសេចក្តីណែនាំនេះ។ ក្នុងសេចក្តីណែនាំនេះ ក្រសួងក៏បានជំរុញឲ្យអាជ្ញាធរមានសមត្ថកិច្ចយកចិត្តទុកដាក់អនុវត្តន៍លើគោលការណ៍ និងវិធានការចំនួន៥ផ្សេងទៀតរួមមាន៖ ការពិនិត្យទៅលើលិខិតអនុញ្ញាតសាងសង់ ជួសជុល និងរុះរើ, លិខិតអនុញ្ញាតបើកការដ្ឋានសំណង់, ការរៀបចំការដ្ឋាន, ដំណើរការការដ្ឋានសាងសង់ និងការងារត្រួតពិនិត្យ និងបញ្ជាក់សំណង់ជាដើម។
គួរជំរាបជូនថា វិធានការនេះ បានធ្វើឡើងក្រោយពីមានករណីនៃការរលំបាក់អគារកម្ពស់០៧ជាន់នៅក្នុងខេត្តកែប កាលពីថ្ងៃទី ០៣ មករា ដែលបណ្តាលឲ្យកម្មករសំណង់៣៦នាក់ស្លាប់ និង២៣នាក់បានរងរបួស រួមទាំងករណីមួយចំនួនទៀត ដូចជា ករណីនៅខេត្តព្រះសីហនុ និងខេត្តសៀមរាប ជាដើម។
បន្ថែមលើវិធានការនេះ កាលពីថ្ងៃទី០៩ មករា ក្រសួងរៀបចំដែនដី នគរូបនីយកម្មនិងសំណង់ ក៏បានចេញសេចក្តីសម្រេចចាត់តាំងមន្ត្រីត្រួតពិនិត្យគុណភាពសំណង់នៅទូទាំងប្រទេសផងដែរ។ មន្ត្រីត្រួតពិនិត្យគុណភាពសំណង់នេះចែកចេញជាពីរក្រុម។ ក្រុមទី១ គឺក្រុមមន្ត្រីត្រួតពិនិត្យសំណង់ជារួម ដឹកនាំដោយលោក ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងក្រុមទីពីរ គឺក្រុមមន្ត្រីត្រួតពិនិត្យសំណង់នៅតាមរាជធានី ខេត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ