ACU ឃាត់ខ្លួនមន្ត្រីអាដហុក៤ នាក់ និងអគ្គលេខាធិការរង គ.ជ.ប ម្នាក់
មន្ត្រីសង្គមស៊ីវិលចំនួន៤រូប និងមន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត១រូប ត្រូវបានACU សម្រេចឃាត់ខ្លួន និងគ្រោងបញ្ជូនសំណុំរឿងទៅតុលាការ ដោយចោទប្រកាន់ថាមានពាក់ព័ន្ធនឹងអំពើពុករលួយ។ ការសម្រេចឃាត់ខ្លួននេះ ធ្វើឡើងបន្ទាប់ពីការសាកសួររយៈពេល២ថ្ងៃ ជុំវិញការចោទប្រកាន់របស់ កញ្ញា ខុម ចាន់តារាទី ហៅស្រីមុំ ដែលថា មន្រ្តីសង្គមស៊ីវិលណែនាំនាងឱ្យនិយាយកុហកប្រាប់សមត្ថកិច្ច ពីទំនាក់ទំនងស្នេហាជាមួយលោក កឹម សុខា។ ចំណែកមន្រ្តី UN ម្នាក់ទៀត ដែលមិនបានចូលខ្លួនមកបំភ្លឺនោះ ACU នឹងចេញលិខិតនាំខ្លួនតែម្តង។
ចុះផ្សាយនៅថ្ងៃ៖
ស្តាប់ - ០១:៣៦
បុគ្គលដែលត្រូវបាន ACU ឃាត់ខ្លូននោះរួមមាន មន្ត្រីសង្គមស៊ីវិលចំនួន៤រូប គឺប្រធានផ្នែកស៊ើបអង្កេតសមាគមអាដហុក លោក នី សុខា អនុប្រធានពីររូបនៃផ្នែកស៊ើបអង្កេត គឺលោក យី សុខសាន្ត និងលោក ណៃ វ៉ងដា អ្នកស្រី លឹម មុន្នី មន្ត្រីអង្កេតជាន់ខ្ពស់អាដហុក ព្រមទាំង លោក នី ចរិយា អគ្គលេខាធិការរង គ.ជ.ប។
ថ្លែងប្រាប់ក្រុមអ្នកសារព័ត៌មាន នៅអង្គភាពប្រឆាំងអំពើពុករលួយ ថ្ងៃទី២៩ ខែមេសានេះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានអះអាងថា ការសម្រេចចិត្តឃាត់ខ្លួននេះ ដោយសារតែចម្លើយអ្នកទាំង៥នាក់នេះ មានភាពស៊ីសង្វាក់គ្នាទៅនឹងភស្តុតាង ដែលប្រមូលបានដោយ ACU។ អង្គភាពប្រឆាំងអំពើពុករលួយ បានឃាត់ខ្លួនអ្នកទាំង៥រូបនោះ កាលពីយប់ថ្ងៃព្រហស្បតិ៍ទី២៨ ហើយនឹងត្រូវបញ្ជូនទៅកាន់សាលាដំបូងរាជធានីភ្នំពេញ ក្នុងរយៈពេល៤៨ម៉ោង។
ចំពោះករណីមន្ត្រី UN លោក ស៊ឺន សាលី ដែលមិនទាន់បានចូលខ្លួនបំភ្លឺនោះ លោក ឱម យ៉ិនទៀង បានលើកឡើងថា អង្គភាពនឹងបន្តធ្វើតាមច្បាប់ គឺត្រូវនាំខ្លួន លោក ស៊ឺន សាលី ដើម្បីសាកសួរតែម្ដង។ យ៉ាងណាក៏ដោយ ប្រធាន ACU រូបនេះពុំបានបញ្ជាក់កាលបរិច្ឆេទជាក់លាក់ទេ។
ដោយឡែក លោកស្រី ធីតា ឃឹះ នាយិកាអង្កការសីលកា និងលោកស្រីមេធាវី ទ្រី ឈួន ដែលត្រូវបានអនុញ្ញាតឱ្យចាកចេញបន្ទាប់ពីសាកសួររួចនោះ លោក ឱម យ៉ិនទៀង អះអាងថា គឺដោយសារចម្លើយពួកគាត់ច្បាស់លាស់ត្រឹមត្រូវជាងអ្នកដែលចោទប្រកាន់គាត់។ លោកប្រធាន ACU ជឿថាគាត់មិនមានការពាក់ព័ន្ធអ្វីនោះទេ ព្រោះអ្នកទាំងពីរបានបំពេញការងារស្របតាមវិជ្ជាជីវៈ និងតួនាទីជា NGO ពិតប្រាកដ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ