ឯកអគ្គរដ្ឋទូតអាមេរិក ប្រាប់ប្រមុខការទូតខ្មែរថា អាមេរិក នឹងមិនជ្រៀតជ្រែកផ្ទៃក្នុងកម្ពុជាឡើយ
លោក ប្រាក់ សុខុន រដ្ឋមន្ត្រីការបរទេសកម្ពុជា នៅថ្ងៃទី២៤តុលានេះ បានទទួលជួប លោក W.Patrick Murphy ឯកអគ្គរដ្ឋទូតអាមេរិកថ្មីប្រចាំកម្ពុជា។ ក្នុងជំនួបនោះ លោក W.Patrick Murphy បញ្ជាក់ជំហរនៅចំពោះមុខប្រមុខការទូតខ្មែរថា សហរដ្ឋអាមេរិក នៅក្នុងអាណត្តិការងាររបស់លោក នឹងមិនជ្រៀតជ្រែក ចូលកិច្ចការផ្ទៃក្នុង របស់កម្ពុជាឡើយ។
ចុះផ្សាយនៅថ្ងៃ៖
ស្តាប់ - ០២:០៨
ជំហររបស់ លោក W.Patrick Murphy យ៉ាងដូច្នេះត្រូវបានគូសបញ្ជាក់បន្ថែមដោយ លោក កុយ គួង អ្នកនាំពាក្យក្រសួងការបរទេសកម្ពុជា នៅថ្ងៃទី២៤តុលានេះ។ បើតាមលោក កុយ គួង ឯកអគ្គរដ្ឋទូតអាមេរិកថ្មី បញ្ជាក់ជំហរថា សហរដ្ឋអាមេរិកគ្មានគោលនយោបាយ ជ្រៀតជ្រែក ចូលកិច្ចការផ្ទៃក្នុង របស់កម្ពុជាឡើយ ហើយផ្ទុយមកវិញនៅក្នុងអាណត្តិរបស់លោកគឺគាំទ្រកម្ពុជា និងធ្វើជាដៃគូរអភិវឌ្ឍដ៏សំខាន់របស់កម្ពុជា។
បើទោះជាបង្ហាញជំហរមិនលូកលាន់កិច្ចការផ្ទៃក្នុងកម្ពុជាសម្រាប់បច្ចុប្បន្ន និងអនាគតក៏ដោយ តែលោក W.Patrick Murphy មិនភ្លេចសួរនាំឡើយ ជុំវិញករណីឃុំខ្លួន លោក កឹម សុខា។ ការឃុំខ្លួនលោក កឹម សុខា ត្រូវបានប្រមុខការទូតកម្ពុជា លោក ប្រាក់ សុខុន បានឆ្លើយតបថា កំពុងស្ថិតក្នុងដំណាក់កាលស៊ើបអង្កេតរបស់តុលាការនៅក្នុងសំណុំរឿងក្បត់ជាតិរបស់គាត់។
ដោយឡែកចំពោះការរក្សាជំហរធ្វើជាដៃគូរអភិវឌ្ឍដ៏សំខាន់របស់កម្ពុជា លោក ប្រាក់ សុខុន បានអរគុណអាមេរិកដែលបានផ្ដល់ការអនុគ្រោះផ្នែកសេដ្ឋកិច្ចមកកម្ពុជាទាក់ទងទៅនឹងការអនុគ្រោះពន្ធGSP។ បន្ថែមលើនេះលោកក៏បានស្នើនៅចំពោះមុខ លោក W.Patrick Murphy ធ្វើយ៉ាងណាជួយសម្រួលដោះស្រាយបញ្ហានៃការចាប់បញ្ជូនពលរដ្ឋខ្មែរត្រឡប់កម្ពុជាដោយឈរលើគោលការណ៍មនុស្សធម៌។
លោក គិន ភា ប្រធានទំនាក់ទំនងអន្តរជាតិនៃរាជ្យបណ្ឌិតសភាកម្ពុជាមើលឃើញថា ទំនាក់ទំនងរវាងកម្ពុជានិងអាមេរិកដែលធ្លាប់មើលមុខគ្នាមិនចំ អាចប្រែប្រួលមុខមាត់ថ្មីតាមរយៈជំហរលោក W.Patrick Murphy។ ប៉ុន្តែយ៉ាងណាក៏ដោយលោក គិន ភា នៅរងចាំមើលបន្តទៀតជុំវិញទំនាក់ទំនងការបរទេសរវាងប្រទេសទាំងពីរ ខ្លាចមានការប្រែប្រួលនាពេលខាងមុខ។
សូមជម្រាបជូនថា ជំនួបរវាងលោក ប្រាក់ សុខុន និងលោក W.Patrick Murphy នៅថ្ងៃទី២៤តុលានេះ ធ្វើឡើងមួយថ្ងៃបន្ទាប់ពីលោក W.Patrick Murphy បានជួបលោកនាយករដ្ឋមន្ត្រី ហ៊ុន សែន នៅថ្ងៃទី២៣តុលា។ នៅក្នុងជំនួបនោះភាគីទាំងពីរបានអះអាងដូចគ្នាក្នុងការពង្រឹងនិងពង្រីកទំនាក់ទំនងដែលមានស្រាប់។ សម្រាប់លោកនាយករដ្ឋមន្ត្រីមើលឃើញថា កន្លងមកកម្ពុជា និងសហរដ្ឋអាមេរិកបានសហការគ្នារួចហើយ លើវិស័យអប់រំ វិស័យសុខាភិបាលជាដើម។ បន្ថែមលើនេះលោក ហ៊ុន សែន ក៏បានស្នើឯកអគ្គរដ្ឋទូតអាមេរិកគាំទ្រកម្ពុជាដែលត្រៀមធ្វើជាប្រធានអាស៊ាននៅឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ