បន្ទាប់ពីវាយប្រហារខ្លាំងៗទៅលើ លោក ហ៊ុន សែន លោក សម រង្ស៊ីចង់យកថ្ងៃ៩វិច្ឆិកាទៅជាថ្ងៃផ្សះផ្សាជាតិ
លោក សម រង្ស៊ី ដែលកំពុងមានវត្តមាននៅសហរដ្ឋអាមេរិកបានសរសេរលិខិតមួយទៅកាន់លោក Coly Seck ប្រធានក្រុមប្រឹក្សាសិទ្ធិមនុស្សនៃអង្គការសហប្រជាជាតិដើម្បីឲ្យអង្គការពិភពលោកនេះជួយធានាថាការវិលត្រឡប់របស់លោកនៅថ្ងៃ៩ខែ វិច្ឆិកាខាងមុខ គឺជាឱកាសមួយប្រែក្លាយពីការប្រឈមមុខដាក់គ្នាទៅរកកិច្ចសន្ទនា និងការផ្សះផ្សាជាតិឡើងវិញ។ ប៉ុន្តែពីខាងរដ្ឋាភិបាលវិញអះអាងថា គឺមិនអាចបន្ទន់ជំហរជាមួយលោក សម រង្ស៊ី បានឡើយព្រោះប្រធានបក្សប្រឆាំងរូបនេះបានដើរហួសបន្ទាប់ក្រហមហើយ។
ចុះផ្សាយនៅថ្ងៃ៖
«យើងអំពាវនាវឲ្យក្រុមប្រឹក្សាសិទ្ធិមនុស្សអង្គការសហប្រជាជាតិ និងសហគមន៍អន្តរជាតិធានាថាការវិលត្រឡប់នៅថ្ងៃ៩វិច្ឆិកា ឆ្នាំ ២០១៩ របស់ក្រុមមន្រ្តីបក្សប្រឆាំង ត្រូវបានប្រែក្លាយទៅជាឱកាសមួយត្រឡប់ទៅរកកិច្ចសន្ទនា និងការផ្សះផ្សាជាតិ»។ នេះជាខ្លឹមសារនៅក្នុងលិខិតជាភាសាអង់គ្លេសរបស់ លោក សម រង្ស៊ី ផ្ញើទៅកាន់លោក Coly Seck ប្រធានក្រុមប្រឹក្សាសិទ្ធិមនុស្សនៃអង្គការសហប្រជាជាតិកាលពីសប្តាហ៍មុន។
ផ្អែកតាមខ្លឹមសារបែបនេះ ត្រូវបាន លោក ប៉ា ងួនទៀង នាយកមជ្ឈមណ្ឌលកម្ពុជាដើម្បីប្រព័ន្ធផ្សាយឯករាជ្យ វិភាគថា «សារបែបនេះល្អជាងសារថា ចូលមកចាប់លោក ហ៊ុន សែន» ប៉ុន្តែលោកមានចម្ងល់ថា សារជាភាសាខ្មែរនិយាយផ្សេង និង ជាភាសាអង់គ្លេសផ្សេងអញ្ចឹង តើសារមួយណាពិតប្រាកដ?
យ៉ាងណាក៏ដោយ លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានអះអាងថា លោក សម រង្ស៊ី បានដើរហួស«បន្ទាត់ក្រហមហើយ»។ លោកអះអាងថា រដ្ឋាភិបាលនឹងអនុវត្តសាលដីកាចាប់ខ្លួនលោក សម រង្ស៊ី ដោយគ្មានការផ្លាស់ប្តូរជំហទេ ហើយថែមទាំងព្រមានទៀតថា បុគ្គលណាដែលទៅទទួលប្រធានគណបក្សប្រឆាំងរូបនេះនឹងជាប់ទោសទៀតផង។
ក៏ប៉ុន្តែលោកស្រី Rhona Smith អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សប្រចាំកម្ពុជា បានលើកឡើងនៅក្នុងរបាយការណ៍ប្រចាំឆ្នាំរបស់លោកស្រីទៅក្រុមប្រឹក្សាសិទ្ធិមនុស្សដោយផ្តល់អនុសាសន៍ឲ្យមានការបើកចំហឡើងវិញ សម្រាប់កិច្ចសន្ទនានយោបាយរវាងរដ្ឋាភិបាល និងបក្សប្រឆាំងនៅកម្ពុជា។
ចំណែក លោក សម រង្ស៊ី ក៏បានបញ្ជាក់ក្នុងលិខិតរបស់លោកទៅកាន់ប្រធានក្រុមប្រឹក្សាសិទ្ធិមនុស្សនៃអង្គការសហប្រជាជាតិថា គណបក្សសង្គ្រោះជាតិប្តេជ្ញាចិត្តអនុត្តន៍តាមអនុសាសន៍របស់អ្នករាយការណ៍ពិសេសដើម្បីបង្កើតកិច្ចសន្ទនា និងការផ្សះផ្សា ខណៈសកម្មជនបក្សប្រឆាំងជិត៣០នាក់កំពុងជាប់ឃុំខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ