មន្ត្រី៖ កម្ពុជាកំពុងជួលអ្នកជំនាញការចិនឲ្យរៀបចំទីក្រុងកំពង់សោមឡើងវិញ ជាទីក្រុងសេដ្ឋកិច្ចពិសេសពហុបំណង
កម្ពុជាកំពុងជួលអ្នកជំនាញការមកពីទីក្រុងស៊ិនជិនរបស់ចិន ដើម្បីរៀបចំផែនការមេ (Master Plan) ក្នុងការអភិវឌ្ឍន៍ទីក្រុងកំពង់សោមឡើងវិញ។ ការរៀបចំទីក្រុងកំពង់សោមឡើងវិញ គឺរៀបចំឲ្យដូច ឬប្រហាក់ប្រហែលនឹងទីក្រុងស៊ិនជិនរបស់ចិន ជាប៉ូលសេដ្ឋកិច្ចពិសេសពហុបំណង។
ចុះផ្សាយនៅថ្ងៃ៖
ស្តាប់ - ០២:០១
មន្ត្រីជាន់ខ្ពស់រដ្ឋាភិបាលកម្ពុជាបានអះអាងថា ខ្លួនបាននិងកំពុងជួលអ្នកជំនាញការមកពីទីក្រុងស៊ិនជិនប្រទេសចិន ដើម្បីរៀបចំអភិវឌ្ឍទីក្រុងកំពង់សោមឡើងវិញ។ គឺរៀបចំ ឲ្យក្លាយជាទីក្រុងសេដ្ឋកិច្ចពិសេសពហុបំណង ដូចទៅនឹងទីក្រុងស៊ិនជិនរបស់ចិន។ នេះបើតាមការលើកឡើងរបស់លោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ៣០ មករា។ ប៉ុន្តែលោកមិនបានបញ្ជាក់ថា តើកម្ពុជាបានចំណាយប្រាក់ប៉ុន្មានដើម្បីជួលអ្នកជំនាញការរបស់ចិនឲ្យមករៀបចំខេត្តព្រះសីហនុឡើងវិញនេះទេ ហើយថា តើកម្ពុជានឹងចំណាយថវិការប៉ុន្មាន ដើម្បីរៀបចំខេត្តព្រះសីហនុឡើងវិញនៅឡើយដែរ។
ការលើកឡើងនេះ គឺបន្ទាប់ពីទីក្រុងកំពង់សោម មួយរយៈពេលចុងក្រោយនេះ បានជួបភាពស្ងប់ស្ងាត់ អគារមួយចំនួនត្រូវបានបោះបង់ចោល ដោយសារតែការចាកចេញយ៉ាងគំហុករបស់ជនជាតិចិន នៅក្រោយពីរដ្ឋាភិបាលកម្ពុជា បានសម្រេចបិទល្បែងអនឡាញ កាលពីចុងឆ្នាំ២០១៩ រួចមក។
លោក វង្សី វិស្សុត បានថ្លែងនៅក្នុងវេទិការសាធារណៈ ស្តីពី ការគ្រប់គ្រងម៉ាក្រូសេដ្ឋកិច្ច និងច្បាប់ស្តីពី ថវិការជាតិ ឆ្នាំ២០២០ កាលពីថ្ងៃទី ៣០ មករា ថា ដើម្បីជួយឲ្យខេត្ដព្រះសីហនុមានសន្ទុះខ្លាំងក្លាឡើងវិញ រដ្ឋាភិបាលកម្ពុជាបានដាក់ចេញនូវវិធានការមួយចំនួន តួយ៉ាងដូចជា៖ ការកសាងហេដ្ឋារចនាសម្ព័ន្ធ និងការរៀបចំផែនការមេ (Master Plan) សម្រាប់អភិវឌ្ឍន៍ខេត្ដព្រះសីហនុឡើងវិញ។ គឺរៀបចំឲ្យក្លាយជាតំបន់សេដ្ឋកិច្ចពិសេសពហុបំណង ដូចទៅនឹងទីក្រុងស៊ិនជិនរបស់ប្រទេសចិនដូច្នេះដែរ។ លោកបន្ដថា ការអភិវឌ្ឍន៍ខេត្ដព្រះសីហនុ ឲ្យក្លាយទៅជាប៉ូលសេដ្ឋកិច្ចពិសេសពហុបំណង គឺមិនអាចពឹងផ្អែកទៅលើល្បែងហ្គេមអនឡាញនោះឡើយ តែជាទីក្រុងឧស្សាហកម្ម បច្ចេកវិទ្យា និងសេវាកម្មវិញ។ គម្រោងនេះ ដឹកនាំផ្ទាល់ដោយលោកនាយករដ្ឋមន្ត្រី ហ៊ុន សែន និងអមដោយឧបនាយករដ្ឋមន្ត្រីចំនួនពីររូប ជាអ្នកទទួលខុសត្រូវ។
យ៉ាងណាក្តី អ្នកជំនាញផ្នែកសេដ្ឋកិច្ចកម្ពុជា បានមើលឃើញថា ខេត្តព្រះសីហនុនឹងបន្តរញ៉េរញ៉ៃមិនក្រោម៥ឆ្នាំទៀតទេ ទើបអាចរៀបចំបានស្រួលបួលឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ