លោកម៉ម សុណង់ដូ ចេញមុខរិះគន់ពីទំនាក់ទំនងមេបក្សប្រឆាំងនិងបក្សកាន់អំណាចនៅសៀមរាប
លោកម៉ម សូណង់ដូ ប្រធានវិទ្យុសំបុកឃ្មុំ និងជាអតីតប្រធានគណបក្សសំបុកឃ្មុំសង្គមប្រជាធិបតេយ្យនៅថ្ងៃពុធនេះ បានសរសេររិះគន់ លោកសម រង្ស៊ី ប្រធានគណបក្សសង្គ្រោះជាតិ ដែលបានបង្ហាញភាពស្និទ្ធស្នាលជាមួយលោកនាយករដ្ឋមន្ត្រី ហ៊ុន សែន នៅក្នុងពិធីបើកកម្មវិធីអង្គរសង្ក្រាន្តឆ្នាំថ្មីដែលបានរៀបចំធ្វើឡើងនៅឯខេត្តសៀមរាបកាលពីថ្ងៃអង្គារម្សិលមិញ។ លោកម៉ម សុណង់ដូ ដែលធ្លាប់គាំទ្របក្សប្រឆាំងក្នុងការបោះឆ្នោតជាតិកាលពីខែកក្កដាឆ្នាំ២០១៣ បានសរសេរនៅលើទំព័រ Facebookថា “ដូរ ឬមិនដូរ ទៅជាស្អិតរមួត ដូចក្រមួនទៅវិញ។
ចុះផ្សាយនៅថ្ងៃ៖
ស្តាប់ - ០២:៣៤
លោកម៉ម សុណង់ដូ ប្រធានស្ថានីយ៍វិទ្យុសំបុកឃ្មុំបានសរសេររិះគន់លោកសម រង្ស៊ី ប្រធានគណបក្សសង្គ្រោះជាតិ នៅលើទំព័រ Facebook ផ្លូវការរបស់លោក នៅថ្ងៃពុធទី១៥ខែមេសានេះ ខណៈមនុស្សមួយចំនួនបានរក្សាភាពស្ងៀមស្ងាត់ ហើយអ្នកខ្លះទៀតកំពុងតែវិភាគ ពីឥរិយាបថរបស់មេបក្សប្រឆាំងនិងបក្សកាន់អំណាចដែលមិនគួរឱ្យជឿ។ មិនគួរឱ្យជឿ ព្រោះតែលោកនាយករដ្ឋមន្ត្រី ហ៊ុន សែន ហាក់បានបន្ទន់ឥរិយាបថយ៉ាងខ្លាំង ដោយបានទទួលស្វាគមន៍លោក សម រង្ស៊ី និងភរិយា តាំងពីនៅលើវេទិកាបើកអង្គរសង្ក្រាន្ត រហូតដល់ការដើរទស្សនាពិព័រណ៍ និងផ្ទាំងទស្សនីយភាពនានា រួមគ្នា ដែលត្រូវបានដាក់តាំងនៅក្នុងព្រឹត្តិការណ៍អង្គរសង្ក្រាន្តឆ្នាំថ្មីនេះ។ រូបភាពទាំងនោះ ត្រូវបានផ្សព្វផ្សាយគ្រប់ស្ថានីយ៍ទូរទស្សន៍ក្នុងស្រុក ដែលគេមិនដែលឃើញសោះ ពីវត្តមានរបស់លោក សម រង្ស៊ី និងភរិយា នៅលើវេទិការរួមគ្នា ជាមួយលោកនាយករដ្ឋមន្ត្រី ហ៊ុន សែន និងភរិយា ដែលធ្លាប់តែវាយប្រហាររិះគន់គ្នាទៅវិញទៅមក ដើម្បីស្វែងរកឧត្តមភាពខាងផ្នែកនយោបាយនាពេលកន្លងមក។
នៅក្នុងទិដ្ឋភាពបែបនេះ លោកម៉ម សុណង់ដូ អតីតប្រធានគណបក្សសំបុកឃ្មុំសង្គមប្រជាធិបតេយ្យផងនោះ បានសរសេរនៅលើទំព័រហ្វេសប៊ុក កាលពីយប់ថ្ងៃទី១៤មេសាថា "ដូរ ឬមិនដូរ ទៅជាស្អិតរមួត ដូចក្រមួនទៅវិញ បើមិនខ្មេះទេ ងាប់ទៅជាខ្មោចល្អជាង!"។ ជាមួយនឹងពាក្យរិះគន់ធ្ងន់ៗបែបនេះ លោក ម៉ម សុណង់ដូ ក៍បានចែករំលែករូបភាពរបស់លោក សម រង្ស៊ី និងលោកនាយករដ្ឋមន្ត្រី ហ៊ុន សែន ឱ្យមិត្តភ័ក្ររបស់លោកបានឃើញផងដែរ។
ជាការពិត វាជារឿងដ៍កំរមួយ ដែលមេបក្សប្រឆាំង លោក សម រង្ស៊ី និងលោក ហ៊ុន សែន ដែលធ្លាប់ជាគូរសត្រូវខាងផ្នែកនយោបាយដ៍ជូចត់ បែរមកជាត្រូវរូវគ្នាចាក់ទឹកមិនលិចទៅវិញ។ លោកនាយករដ្ឋមន្ត្រី ហ៊ុន សែន កាលពីថ្ងៃអង្គារថែមទាំងបានហៅលោកសម រង្ស៊ី ថា ជាសមភាគី និងជាដៃគូដ៏ល្អមួយរបស់លោក។
ផ្ទុយពីការរិះគន់របស់លោក ម៉ម សុណង់ដូ ក្នុងនោះ ក៏មានអ្នកគាំទ្រតាមហ្វេសប៊ុកខ្លះបានសរសេរគាំទ្រថា "វប្បធម៌ថ្មីដ៏វិជ្ជមាន កើតចំថ្ងៃសង្ក្រានឆ្នាំមមែ សប្តសក្តិ ព.ស ២៥៥៩ ត្រូវនឹងថ្ងៃអង្គារទី១៤ ខែមេសា ឆ្នាំ២០១៥ ចេញពីទឹកដីដ៏ពិសិដ្ឋនៃកម្ពុជរដ្ឋក្រុងអង្គរ គឺ"វប្បធម៌មានសែន មានស៊ី" "វប្បធម៌ខ្មែរតែមួយ វាសនាតែមួយ" "គ្មានខ្មែរណាជាសត្រូវ" និងខ្លះថា "ខ្មែរត្រូវតែ និយាយគ្នា ទោះជាអ្នកនយោបាយជើងចាស់ក៏ដោយ កូនអ្នកនយោបាយជើងចាស់ក៏ដោយ អ្នកនយោបាយ ជើងថ្មីក៏ដោយ" ។ កាលពីថ្ងៃអង្គារ លោក សម រង្ស៊ី ជាប្រធានក្រុមតំណាងរាស្ត្រមតិភាគតិចនៅរដ្ឋសភាផងនោះ បានបញ្ជាក់ដែរថា វត្តមានរបស់លោកនៅលើវេទិការអង្គរសង្ក្រាន្តនេះ គឺជានិមិត្តរូប នៃការបង្រួបបង្រួមជាតិ និងឯកភាពជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ