កម្ពុជានឹងលើកផែនការ អភិវឌ្ឍថាមពល និងហេដ្ឋារចនាសម្ព័ន្ធ ទៅជជែកកិច្ចប្រជុំមេគង្គ-ឡានឆាង
លោកឧបនាយករដ្ឋមន្រ្តី ហោ ណាំហុង នឹងដឹកនាំគណៈប្រតិភូចូលរួមកិច្ចប្រជុំរដ្ឋមន្រ្តីការបរទេសនៃកិច្ចសហប្រតិបត្តិការមេគង្គ-ឡានឆាងលើកទី៤ នៅថ្ងៃទី១៦ ខែធ្នូ ស្អែកនេះ នៅប្រទេសឡាវ។ កិច្ចប្រជុំនេះធ្វើឡើងក្រោមប្រធានបទ «ពង្រឹងភាពជាដៃគូ ដើម្បីវិបុលភាពរួម»។ ក្នុងនោះ កម្ពុជានឹងលើកផែនការអភិវឌ្ឍថាមពល និងហេដ្ឋារចនាសម្ព័ន្ធក្នុងកិច្ចប្រជុំមេគង្គ-ឡានឆាង។ តើកម្ពុជាទទួលបានប្រយោជន៍អ្វីខ្លះពីកិច្ចប្រជុំមេគង្គ-ឡានឆាង?
ចុះផ្សាយនៅថ្ងៃ៖
មិនចំពោះតែកម្ពុជាឡើយ ប្រទេស៤ផ្សេងទៀតក្នុងប្លកអាស៊ានរួមមាន៖ ឡាវ វៀតណាម មីយ៉ាន់ម៉ា ថៃ ក៏ទទួលបានប្រយោជន៍ពីកិច្ចប្រជុំនៃកិច្ចសហប្រតិបត្តិការមេគង្គ-ឡានឆាង នេះដែរ តាមរយៈការទម្លាក់កញ្ចប់ថវិកាពីប្រទេសចិន។ ប៉ុន្តែមុនទទួលបានកញ្ចប់ថវិកាពីប្រទេសចិន ប្រទេសទាំង៥ ត្រូវធ្វើផែនការអភិវឌ្ឍប្រទេសរៀងៗខ្លួនជាមុនសិន មុននឹងចេញសេចក្ដីសម្រេចក្នុងការទម្លាក់កញ្ចប់ថវិកានៅក្នុងកិច្ចសហប្រតិបត្តិការមេគង្គ-ឡានឆាងនេះ។
សម្រាប់កម្ពុជា ផែនការអភិវឌ្ឍប្រទេសគឺមានទស្សនវិស័យច្រើនដែលផ្ដោតទៅលើការអភិវឌ្ឍផ្នែកថាមពល ហេដ្ឋារចនាសម្ព័ន្ធ និងធនធានមនុស្ស ជាដើម។ នេះបើតាមលោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា។
តាមគម្រោង នៅកិច្ចប្រជុំរដ្ឋមន្រ្តីការបរទេសនៃកិច្ចសហប្រតិបត្តិការមេគង្គ-ឡានឆាងលើកទី៤ ចាប់ពីថ្ងៃទី១៦ដល់ថ្ងៃទី១៧ខែធ្នូ មានឯកសារចំនួន២នឹងត្រូវអនុម័តគឺ៖ សេចក្តីប្រកាសរួមរបស់កិច្ចប្រជុំរដ្ឋមន្រ្តីការបរទេសលើកទី៤ នៃកិច្ចសហប្រតិបត្តិការ មេគង្គ-ឡានឆាង, និងរបាយការណ៍វឌ្ឍនភាព ស្តីពីការអនុវត្តផែនការសកម្មភាព៥ឆ្នាំ របស់កិច្ចសហប្រតិបត្តិការមេគង្គ-ឡានឆាង ឆ្នាំ២០១៨។
សូមបញ្ជាក់ថា កិច្ចសហប្រតិបត្តិការមេគង្គ-ឡានឆាង ជាកិច្ចសហប្រតិបត្តិការមួយ បង្កើតឡើងដើម្បីពង្រឹងទំនាក់ទំនងពាណិជ្ជកម្ម ការផ្សាភ្ជាប់រវាងប្រជាជន ការអភិវឌ្ឍ និងសន្តិសុខតំបន់មេគង្គ ក្រោមគំនិតផ្តួចផ្តើមរបស់ចិន។ ដោយសារកិច្ចសហប្រតិបត្តិការនេះធ្វើឡើងក្រោមគំនិតផ្ដួចផ្ដើមរបស់ចិន ទើបនាំឲ្យមានការរិះគន់ថា ចិនជាអ្នកទទួលបានប្រយោជន៍ច្រើនជាងប្រទេសនៅបណ្ដោយទន្លេមេគង្គ៥ផ្សេង។ ប៉ុន្តែ រដ្ឋាភិបាលកម្ពុជា អះអាងថា តិចឬច្រើន គឺប្រយោជន៍ទទួលបានស្មើគ្នានៅក្នុងចំណោមប្រទេសដែលចូលរួមនៅក្នុងកិច្ចសហប្រតិបត្តិការនេះ។
គួររំឭកថា កិច្ចសហប្រតិបត្តិការមេគង្គ-ឡានឆាង ត្រូវបានបង្កើតឡើងក្នុងឆ្នាំ ២០១៥ដោយមានសមាជិកសរុបប្រាំមួយគឺ៖ កម្ពុជា ចិន ឡាវ មីយ៉ាន់ម៉ា ថៃ និងវៀតណាម ដោយផ្តោតសំខាន់លើសសរស្តម្ភបី និងមានវិស័យអាទិភាពចំនួនប្រាំ។ សសរស្តម្ភបីនោះរួមមាន នយោបាយ, សន្តិសុខ, សេដ្ឋកិច្ច, ការអភិវឌ្ឍ, ព្រមទាំងសង្គម និងទំនាក់ទំនងប្រជាជនទៅប្រជាជន។
ចំណែកវិស័យអាទិភាពចំនួនប្រាំមានដូចជាការផ្សាភ្ជាប់, កិច្ចសហប្រតិបត្តិការជំរុញសមត្ថភាពផលិត, កិច្ចសហប្រតិបត្តិសេដ្ឋកិច្ចឆ្លងដែន, កិច្ចសហប្រតិបត្តិការនៃការគ្រប់គ្រងទឹកនិងកសិកម្ម, និងកិច្ចសហប្រតិបត្តិការក្នុងការកាត់បន្ថយភាពក្រីក្រ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ