សង្គមស៊ីវិលស្នើជាថ្មីទៅរដ្ឋាភិបាលបង្កើតគោលនយោបាយគាំពារអ្នកស្រឡាញ់ភេទដូចគ្នា
សង្គមស៊ីវិលធ្វើការពាក់ព័ន្ធនិងក្រុមអ្នកស្រឡាញ់ភេទដូចគ្នាបានស្នើជាថ្មីទៅកាន់រដ្ឋាភិបាល បង្កើតគោលនយោបាយច្បាស់លាស់មួយ ឬច្បាប់គាំពារអ្នកស្រឡាញ់ភេទដូចគ្នាដើម្បីជាផ្នែកមួយគេចផុតពីការរើងអើងនិងការមាក់ងាយក្នុងសង្គម។ ការស្នើសុំធ្វើឡើងបន្ទាប់ពីក្រុមអង្គការសង្គមស៊ីវិល ចេញសេចក្ដីថ្លែងការណ៍គាំទ្រប្រសាសន៍លោក ផៃ ស៊ីផាន អ្នកនាំពាក្យរដ្ឋាភិបាលដែលថាកម្ពុជាគ្មានច្បាប់ប្រឆាំងនឹងក្រុមអ្នកស្រឡាញ់ភេទដូចគ្នាទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ទោះបីជាមានការគាំទ្រពីសំណាក់រដ្ឋាភិបាលនិងមិនមានការជំទាស់សម្រាប់អាពាហ៍ពិពាហ៍អ្នកស្រឡាញ់ភេទដូចគ្នានៅកម្ពុជាក៏ដោយ តែសង្គមស៊ីវិល និងក្រុមអ្នកស្រឡាញ់ភេទដូចគ្នា ចង់ឲ្យរដ្ឋាភិបាលបង្កើតគោលនយោបាយច្បាស់លាស់មួយឬច្បាប់ដើម្បីបញ្ជាក់ពីការគាំពារដល់ពួកគេ។
ហ៊ានស្នើយ៉ាងដូច្នេះក៏ដោយសារតែសង្គមស៊ីវិលសង្កេតថា កន្លងមកបញ្ហានេះក៏ត្រូវបានគាំទ្រដោយ លោកនាយករដ្ឋមន្ត្រី ហ៊ុន សែន តាមរយៈសន្ទរកថាមួយកាលពីឆ្នាំ២០១២និងថ្មីៗនេះតាមរយៈការបង្ហាញជំហរគាំទ្រជាថ្មីរបស់មន្រ្តីរដ្ឋាភិបាល លោក ផៃ ស៊ីផាន។
លោក ផៃ ស៊ីផាន ដែលបាននិយាយថា «កម្ពុជាគ្មានច្បាប់ប្រឆាំងនឹងក្រុមអ្នកស្រឡាញ់ភេទដូចគ្នាហើយក៏គ្មានការហាមឃាត់ពួកគេមិនឲ្យស្រឡាញ់គ្នាទៅវិញទៅមកដែរ»។ នេះជាការបញ្ជាក់របស់ លោក នួន ស៊ីដារ៉ា អ្នកសម្របសម្រួលនិន្នាការភេទនិងអត្តសញ្ញាណយេនឌ័រនៃមជ្ឈមណ្ឌលសិទ្ធមនុស្ស។
លោក នួន ស៊ីដារ៉ាបន្តថា ប្រសិនបើកម្ពុជាមានច្បាប់និងគោលនយោបាយគាំទ្រអ្នកស្រឡាញ់ភេទដូចគ្នានឹងធ្វើឲ្យសង្គមកម្ពុជារស់នៅក្នុងសុខដុមនីយកម្មតាមរយៈការរស់នៅស្មើភាពគ្នាដោយគ្មានការរើសអើង។ ម្យ៉ាងទៀតកម្ពុជានឹងក្លាយជាប្រទេសដំបូងគេក្នុងទ្វីបអាស៊ីដែលទទួលស្គាល់អាពាហ៍ពិពាហ៍ភេទដូចគ្នាតាមផ្លូវច្បាប់។ ព្រោះនាពេលបច្ចុប្បន្ននេះ ការលាបព័ណ៌ ការរើសអើងនិងមាក់ងាយមកលើអ្នកស្រឡាញ់ភេទដូចគ្នាតែងតែកើតមានជារឿយៗដែលជាហេតុមួយធ្វើឲ្យពួកគេបាត់បង់ឱកាសការងារក្នុងសង្គម។
លោក យ៉ាន សេដ្ឋាណាវុធ ដែលអះអាងថា ជាអ្នកស្រឡាញ់ភេទដូចគ្នាមកពីបណ្ដាញចតុមុខឲ្យដឹងថា គឺលោកចង់បានការគាំទ្រតែម្យ៉ាងពីរដ្ឋាភិបាលនិងពលរដ្ឋធ្វើយ៉ាងណាកុំឲ្យមានការរើសអើងមកលើអ្នកស្រឡាញ់ភេទដូចគ្នា និងមានឱកាសការងារក្នុងសង្គមដូចមនុស្សធម្មតា។ លោកបន្ថែមថា លោកកំពុងស្វែងរកការគាំទ្របន្ថែមពីភាគីពាក់ព័ន្ធនៅក្នុងប្រទេសកម្ពុជាចំពោះសិទ្ធអ្នកស្រឡាញ់ភេទដូចគ្នា។
បើតាមតួលេខមួយបង្ហាញកាលពីឆ្នាំ២០១២នៅកម្ពុជា ក្រុមបុរសស្រឡាញ់បុរស មានចំនួនជាង២៥ម៉ឺននាក់ ស្រ្តីស្រឡាញ់ស្រ្តីជិត១០ម៉ឺននាក់។ សរុបជារួមមក ក្រុមទាំងពីរនេះបូកនិងភេទទីបីមានចំនួន៣៦ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ