ក្រសួងសុខាភិបាលអំពាវនាវឲ្យបង្កើនការប្រុងប្រយ័ត្ន ខណៈបុរសម្នាក់ស្លាប់ដោយសារជំងឺផ្ដាសាយជ្រូក
លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យនៃក្រសួងសុខាភិបាលកម្ពុជា បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្ន ខណៈកម្ពុជាទើបតែរកឃើញករណីស្លាប់របស់បុរសម្នាក់ ដោយសារជំងឺផ្ដាសាយជ្រូក។ ជំងឺផ្ដាសាយជ្រូក H1N1 ធ្លាប់រាតត្បាតកម្ពុជាកាលពីឆ្នាំ២០០៩ និងបានសម្លាប់ពលរដ្ឋខ្មែរយ៉ាងហោចណាស់៦នាក់។ បើទោះបីជាមានករណីស្លាប់ថ្មីដោយសារជំងឺនេះ នៅដើមឆ្នាំ២០១៦ក៏ដោយ លោកវេជ្ជបណ្ឌិត លី សូវ៉ាន់ បានគូសបញ្ជាក់ប្រាប់វិទ្យុបារាំងថា គ្រូពេទ្យនៅកម្ពុជាមានសមត្ថភាពគ្រប់គ្រាន់ក្នុងការព្យាបាលជំងឺ H1N1 នេះបាន ប្រសិនបញ្ជូនមកកាន់មន្ទីរពេទ្យទាន់ពេលវេលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
អ្នកជំងឺផ្ដាសាយជ្រូក H1N1 ដែលបានស្លាប់ កាលពីម៉ោង៤ទៀបភ្លឺ ថ្ងៃពុធទី២៤កុម្ភៈនេះ បានចូលសម្រាកព្យាបាលនៅមន្ទីរពេទ្យរុស្សីតាំងពីថ្ងៃទី១៦ខែកុម្ភៈ។ ៤ថ្ងៃបន្ទាប់ពីនោះ ពោលគឺនៅថ្ងៃទី២០ខែកុម្ភៈ ក្រសួងសុខាភិបាលបានបញ្ជាក់ថា បុរសនេះ មានផ្ទុកមេរោគផ្ដាសាយជ្រូក H1N1។ នៅក្នុងរយៈពេលជាង១សប្ដាហ៍នៃការសម្រាកព្យាបាលនៅមន្ទីរពេទ្យរុស្ស៊ី លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល អះអាងថា គ្រូពេទ្យខ្មែរនិងបរទេស បានខិតខំប្រឹងប្រែងអស់ពីសមត្ថភាព ដើម្បីព្យាបាលជួយសង្គ្រោះអ្នកជំងឺ។ ប៉ុន្តែជាការកត់សម្គាល់ អ្នកជំងឺមកកាន់មន្ទីរពេទ្យយឺតពេលបន្តិច ដោយមេរោគ H1N1 បានរាតត្បាតទៅដល់សួតរបស់អ្នកជំងឺរួចទៅហើយ។ មរណភាពរបស់អ្នកជំងឺផ្ដាសាយជ្រូក H1N1 ថ្មីនេះ គឺជារឿងដ៏គួរឲ្យសោកស្ដាយណាស់។ នេះបើតាមលោកវេជ្ជបណ្ឌិត លី សូវ៉ាន់។
សូមរំលឹកថា ជំងឺផ្ដាសាយជ្រូក H1N1 ធ្លាប់រាតត្បាតកម្ពុជាកាលពីឆ្នាំ២០០៩ និងបានសម្លាប់ពលរដ្ឋខ្មែរយ៉ាងហោចណាស់៦នាក់។ សព្វថ្ងៃ បើតាមការពន្យល់របស់លោក លី សូវ៉ាន់ មេរោគផ្ដាសាយជ្រូក H1N1 នេះ បានក្លាយជាមេរោគផ្ដាសាយធម្មតា និងជាផ្ដាសាយតាមរដូវកាលថែមទៀតផង។ កម្ពុជារកឃើញការឆ្លងជំងឺផ្ដាសាយជ្រូក H1N1 ជាច្រើនករណី ក្នុងមួយឆ្នាំៗ។ នេះបើតាមលោក លី សូវ៉ាន់។ ខណៈកម្ពុជាជួបប្រទះករណីស្លាប់ថ្មី របស់អ្នកជំងឺផ្ដាសាយជ្រូកក្នុងឆ្នាំ២០១៦នេះ ប្រធាននាយកដ្ឋានប្រយុទ្ធនឹងជំងឺឆ្លងរូបនេះ បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្ន ក៏ដូចជាតាមដានរោគសញ្ញានៃជំងឺផ្ដាសាយ។ រោគសញ្ញានៃជំងឺផ្ដាសាយជ្រូក H1N1 ដែលមានជាអាថិ៍ គ្រុនក្ដៅលើសពី៣៨អង្សារ ឈឺក ក្អក កណ្ដាស់ ឈឺសាច់ដុំ និងស្រៀវស្រាញក្នុងខ្លួន។
ក្នុងនោះ ប្រសិនបើមានជំងឺផ្ដាសាយ និងមានការឡើងកម្ដៅក្នុងខ្លួន អ្នកជំងឺត្រូវទទួលទានថ្នាំបញ្ចុះកម្ដៅ និងទទួលទានទឹកឲ្យបានច្រើន។ សម្រាប់អ្នកដែលចូលចិត្តហាត់កីឡា ត្រូវផ្អាកហាត់កីឡាសិន។ ក្នុងករណីដែលជំងឺផ្ដាសាយមិនបានធូរស្រាលក្នុងរយៈពេល៣ថ្ងៃទេ អ្នកជំងឺត្រូវទៅពិគ្រោះជាមួយគ្រូពេទ្យឲ្យបានទាន់ពេលវេលា។ បើទោះបីជាមានករណីស្លាប់ថ្មីដោយសារជំងឺនេះ នៅដើមឆ្នាំ២០១៦ក៏ដោយ លោកវេជ្ជបណ្ឌិត លី សូវ៉ាន់ បានគូសបញ្ជាក់ប្រាប់វិទ្យុបារាំងថា គ្រូពេទ្យនៅកម្ពុជាមានសមត្ថភាពគ្រប់គ្រាន់ក្នុងការព្យាបាលជំងឺ H1N1 នេះបាន ប្រសិនបញ្ជូនមកកាន់មន្ទីរពេទ្យទាន់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ