GMACថា ខ្លួនកំពុងក្លាយជាជនរងគ្រោះដោយការរឹតបន្តឹងច្បាប់ចំពោះរថយន្តធុនធំ
សមាគមរោងចក្រកាត់ដេរនៅកម្ពុជា )GMAC) នៅថ្ងៃទី១ខែកក្កដាម្សិលមិញ បានស្នើឲ្យរដ្ឋាភិបាលផ្ដល់ដំណោះស្រាយបណ្តោះអាសន្នមួយទាក់ទងការដឹកជញ្ជូនទំនិញ។ ការស្នើសុំនេះបន្ទាប់ពី GMAC មើលឃើញថា កំពុងក្លាយទៅជាជនរងគ្រោះដោយមិនដឹងខ្លួន ខណៈអាជ្ញាធរកំពុងរឹតបន្តឹងចំពោះរថយន្តធុនធំ ក្នុងការដឹកទំនិញចេញចូលកំពង់ផែក្រុងព្រះសីហនុ និងកំពង់ផែភ្នំពេញ។
ចុះផ្សាយនៅថ្ងៃ៖
ស្តាប់ - ០១:៥៤
សមាគមរោងចក្រកាត់ដេរនៅកម្ពុជាGMACបានគូសបញ្ជាក់ថា ពាក់ព័ន្ធនឹងការពង្រឹងការអនុវត្តន៍ច្បាប់ចរាចរណ៍ របស់គណៈកម្មការជាតិសុវត្ថិភាពចរាចរណ៍ផ្លូវគោក កាលថ្ងៃទី០៦ ខែមិថុនាមក សមាជិករបស់GMAC កំពុងក្លាយទៅជាជនរងគ្រោះនៅក្នុងការពង្រឹងច្បាប់ដោយមិនដឹងខ្លូន។ រងគ្រោះដោយសារថា វត្ថុធាតុដើមនាំចូល និងផលិតផលសម្រេចនាំចេញជាច្រើនរបស់សមាជិកGMAC ត្រូវកកស្ទះហើយអាចបង្កឲ្យខាតបង់ផ្នែកហិរញ្ញវត្ថុក៏ដូចជាទំនុកចិត្តពី អ្នកបញ្ជាទិញដែលផ្គត់ផ្គង់ទំនិញមិនទាន់ពេលវេលា។
ឆ្លើយនឹងកង្វល់នេះ លោក ហ៊ឹម យ៉ាន អគ្គស្នងការរងនគរបាលជាតិ លើកឡើងនៅក្នុងសន្និសីទកាសែតនៅថ្ងៃអង្គារ៍នេះថា បញ្ហារបស់GMAC មិនមែនដោយសារការរឹតបន្តឹងច្បាប់ទេ។ ប៉ុន្តែការយឺតយ៉ាវរបស់GMAC ដោយសារក្រុមហ៊ុនដឹកទំនិញ ឬម្ចាស់ក្រុមហ៊ុនមិនគោរពច្បាប់ចរាចរណ៍។
បើតាមលោក ហ៊ឹម យ៉ាន ទំនិញរាប់លានតោនបានដឹកចេញពីកំពង់ផែក្រុងព្រះសីហនុនិងកំពង់ផែក្រុងភ្នំពេញ ហើយពេលខ្លះកំពង់ផែក្រុងព្រះសីហនុកកស្ទះ ដែលការកកស្ទះនេះបង្ហាញឲ្យឃើញថា រថយន្តធុនធំទាំងនោះមិនហ៊ានចូលទៅត្រួតពិនិត្យ។
សូមជម្រាបជូនថា គិតត្រឹមរយៈពេលពីរសប្ដាហ៍ ពីថ្ងៃទី១៥ដល់ថ្ងៃទី៣០មិថុនា រថយន្តធុនធំប្រមាណជិតជា២ពាន់គ្រឿងបានដឹកទំនិញចេញចូលកំពង់ផែទាំងពីរ ហើយកំពង់ផែក្រុងព្រះសីហនុមានរថយន្តធុនធំចេញចូលច្រើនជាងកំពង់ផែក្រុងភ្នំពេញ។ ក្នុងនោះរថយន្តធុនធំជាង៣០០គ្រឿង រកឃើញភាពមិនប្រក្រតី ទាក់ទងឯកសារនិងបច្ចេកទេស ដែលបញ្ហាបច្ចេកទេសងាយប្រឈមនឹងគ្រោះថ្នាក់ចរាចរណ៍ ច្រើនជាងរថយន្តដែលរកឃើញឯកសារមិនប្រក្រតី។
ជាការកត់សម្គាល់ មួយផ្នែកនៃការរឹតបន្តឹងការត្រួតពិនិត្យរថយន្តធុនធំដែលឆ្លង់កាត់កំពង់ផែទាំង២ដើម្បីកាត់បន្ថយគ្រោះថ្នាក់ចរាចរណ៍ទ្រង់ទ្រាយធំកើតមានញឹកញាប់ក្នុងឆ្នាំ២០១៩
ខណៈគ្រោះថ្នាក់ចរាចរណ៍ប្រចាំត្រីមាសទី១ ឆ្នាំ២០១៩នេះ បានកើតឡើងចំនួន១០៧៦លើក បណ្តាលឲ្យស្លាប់មនុស្សចំនួន៥១៣នាក់ និង របួស ១៥៩២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ