លោកជាម យៀប ចេញមុខទាត់ចោលការលើកឡើងរបស់លោកសុន ឆ័យ
នៅរសៀលថ្ងៃព្រហស្បតិ៍ទី១២មីនា លោកជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មដែលជាគណៈកម្មការទី២ នៃរដ្ឋសភា បានចេញមុខទាត់ចោលនូវការលើកឡើងរបស់លោកសុន ឆ័យ ជុំវិញការចំណាយច្រើនហួសហេតុ និងបក្ខពួកនិយមនៅក្នុងរដ្ឋសភា។ នៅក្នុងសន្និសីទកាសែតមួយនៅវិមានរដ្ឋសភាលោកជាម យៀប បានបញ្ជាក់ថា ការលើកឡើងរបស់លោកសុន ឆ័យនោះ មិនមានភស្តតាង និងប្រភពច្បាស់លាស់នោះទេ។
ចុះផ្សាយនៅថ្ងៃ៖
ស្តាប់ - ០២:១៩
នេះមិនមែនជាលើកទីមួយទេ ដែលប្រធានគណៈកម្មការទីពីរនៃរដ្ឋសភា លោកជាម យៀប ដែលបានចេញមុខធ្វើសន្និសីទទាត់ចោលការលើកឡើងរបស់អនុប្រធានរបស់ខ្លួនលោកសុន ឆ័យ។ ក៏ប៉ុន្តែការទាត់ចោលនៅពេលនេះ គឺបានធ្វើតែពីរថ្ងៃប៉ុណ្ណោះបន្ទាប់ពីលោកសុន ឆ័យ បានថ្លែងប្រាប់អ្នកកាសែតអំពីការចំណាយច្រើនហួសហេតុ និងបក្ខពួកនិយមនៅក្នុងរដ្ឋសភាកាលពីថ្ងៃអង្គារ។
សូមជំរាបជូនថា បន្ទាប់ជួបប្រជុំជាលើកដំបូងជាមួយលោកឡេង ប៉េងឡុង អគ្គលេខាធិការរដ្ឋសភាកាលពីព្រឹកថ្ងៃអង្គារទី១០មីនា លោកសុន ឆ័យក្នុងនាមជាអនុប្រធានគណៈកម្មការទីពីរនៃរដ្ឋសភា បានថ្លែងប្រាប់អ្នកកាសែតពីបញ្ហាមិនប្រក្រតីមួយចំនួនដែលកំពុងកើតមាននៅក្នុងរដ្ឋសភាកម្ពុជា។ ក្នុងនោះបញ្ហាចាយវាយច្រើនហួសហេតុលើសម្ភារៈ និងបញ្ហាគ្រួសារនិយមនៅក្នុងរដ្ឋសភាគឺជាបញ្ហាចម្បងដែលលោកសុន ឆ័យ បានលើកឡើង។ ជាងនេះទៅទៀត លោកសុន ឆ័យ បានទាមទារលោកឡេង ប៉េងឡុងផ្តល់ឯកសារចំណាយរបស់រដ្ឋសភា ប៉ុន្តែអគ្គលេខាធិការរដ្ឋសភាមិនផ្តល់ឲ្យនោះទេ ដោយសុំពិគ្រោះយោបល់ជាមួយប្រធានរដ្ឋសភាជាសិនជាមុនសិន។
លោកជាម យៀប ក្នុងឋានៈជាប្រធានគណៈកម្មការទីពីរ បានប្រតិកម្មថា ការលើកឡើងរបស់លោកសុន ឆ័យនេះ មិនបានពិគ្រោះយោបល់ជាមួយលោកជាប្រធានជាមុនសិននោះទេ។ លោក ជាម យៀប ចាត់ទុកសម្តីរបស់លោកសុន ឆ័យថា គ្មានមូលដ្ឋាន និងគ្មានភស្តតាង គឺជាការនិយាយតាមការនឹកឃើញប៉ុណ្ណោះ។ បើតាមលោកជាម យៀប ការបញ្ជាទិញសម្ភារៈមួយចំនួនដូចជារថយន្តជាដើមនោះ គឺក្រសួងសេដ្ឋកិច្ចជាអ្នករៀបចំហើយរដ្ឋសភាគ្រាន់តែចាំទទួលយកប៉ុណ្ណោះ។ ចំណែកការចំណាយផ្នែកផ្សេងៗទៀតនោះ គឺលោកសុន ឆ័យ មិនប្រភពឯកសារ និង ភស្តតាងច្បាស់លាស់ ដើម្បីបញ្ជាក់នោះឡើយ។ ចំពោះបញ្ហាគ្រួសារនិយម ដែលលោកសុន ឆ័យ ចង់សំដៅលើលោកមិត្ត ការ៉ែន ដែលជាអគ្គលេខាធិការងនៃរដ្ឋសភា មិនត្រូវបានលោកជាម យៀប ថ្លែងបញ្ជាក់នៅក្នុងសន្និសីទកាសែតទេ។
លោកជាម យៀប បញ្ជាក់ទៀតថា របាយការណ៍ស្តីការចំណាយរបស់រដ្ឋសភា ត្រូវបានផ្តល់ឲ្យសមាជិកគណៈកម្មការទីពីររួចហើយរួមទាំងលោកសុន ឆ័យ ផងដែរ ប៉ុន្តែលោកសុន ឆ័យ បែរជានិយាយខុសពីការពិតទៅវិញ។ លោកប្រធានគណៈកម្មការទីពីរ បានគូសបញ្ជាក់ថា ការលើកឡើងរបស់លោកសុន ឆ័យ លោកមិនអាចទទួលយកបានទេ ព្រោះថា វាធ្វើប៉ះពាល់កេរ្តិ៍ឈ្មោះគណៈកម្មការទីពីរ និងរដ្ឋសភាទាំងមូល។
បើតាមប្រធានគណៈកម្មការទីពីររូបនេះ លោកនឹងជំរាបដល់ប្រធានរដ្ឋសភាលោកហេង សំរិន និងអនុប្រធានទីមួយលោកកឹម សុខា ដែលមកពីគណបក្សសង្គ្រោះជាតិ ដើម្បីចាត់វិធានការចំពោះករណីនិយាយបំផ្លើសរបស់លោកសុន ឆ័យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ